«Өскемен титан магний комбинаты» 4,5 миллион теңге айыппұл төледі

«Өскемен титан магний комбинаты» 4,5 миллион теңге айыппұл төледі

Өткен жылдың 21 желтоқсанында кәсіпорын аумағынан ауаға қою түтін тараған, деп хабарлады turkystan.kz «Хабар 24» арнасына сілтеме жасап. Осыдан соң жұрт өндірісте жарылыс болды деп әлеуметтік желіде қауесет таратты. Шығыс Қазақстан облыстық Экология департаменті бірден жоспардан тыс тексеру жүргізіп, ауадағы хлор мөлшері рұқсат етілгеннен төрт жарым есе жоғары екенін анықтады. Экологтар бір айға жуық жүргізген кешенді тексерудің ресми қорытындысын енді жариялады. Өндірістің ауаны ластағаны нақты дәлелденді. Кәсіпорын қондырғыларды тазалау бойынша жасалатын жұмыстарды өңірлік Экология департаментімен келісіп атқаруы тиіс еді. Алайда құзырлы органдарды ескертпеген. – Мекеменің айтуы бойынша, хлораторлы құрылғыда төрт фурманы бір мезгілде тазалаған. Сына нәтижесі бойынша көміртегі оксиді 8.9 есеге асу байқалған. Сутегі хлоры 2,1 есе байқалған. Аталған барлық заңбұзушылықтар бойынша мекемеге 4,5 миллион теңге айыппұл салынды. Қазіргі күні айыппұл төленді, - деді облыстық Экология департаменті басшысының орынбасары Рауан Тұраров.