ҚР Бас прокурордың орынбасары Болат Дембаев қазақстандықтарға ТЖ режимін бұзғаны үшін жауапкершілік барын ескертті, деп хабарлады turkystan.kz.
ҚР Президентінің Жарлықтарына сәйкес төтенше жағдай енгізілген жерде мынадай негізгі шаралар мен уақытша шектеулер көзделген:
еркін жүріп-тұруға, оның ішінде көлік құралдарының кіруі мен шығуына шектеулер белгіленді;
жеке тұлғалардың жеке басын куәландыратын құжаттарды тексеру, жеке тексеру, олардың заттарын, Көлік құралдарын тексеру;
бейбіт жиындарға, ереуілдерге және басқа да бұқаралық іс-шараларға тыйым салынады.
Қосымша уақытша шектеу шаралары ретінде сағат 23:00-ден 07:00-ге дейін коменданттық сағат енгізілді, қаруды, оқ-дәрілерді, жарылғыш заттарды, этил спиртін және алкоголь өнімдерін сатуға тыйым салынды, жеке тұлғалардан қару мен оқ-дәрілерді уақытша алып қою көзделген.
«Заңның 20-бабына сәйкес коменданттық сағат қағидаларын бұзған жеке тұлғаларды полиция қызметкерлері немесе әскери патрульдер коменданттық сағат аяқталғанға дейін, ал жеке басын куәландыратын құжаттары жоқ адамдарды-олардың жеке басын анықтағанға дейін, бірақ ішкі істер органы бастығының немесе оның орынбасарының шешімі бойынша 48 сағаттан асырмай ұстауы тиіс», - деді Болат Дембаев.
Ұсталған адамдар және олардың алып жүрген заттары мен көлік құралдары тексерілуі мүмкін.
Бас прокурордың орынбасарының мәлімдеуінше, төтенше жағдай режимінің көрсетілген талаптарын бұзғаны үшін кінәлі адамдар қылмыстық және әкімшілік жауапкершілікке тартылады.
Осылайша, билік өкілінің заңды талабына немесе өкіміне бағынбау, сондай-ақ төтенше жағдай кезеңінде тыйым салынған ереуілге басшылық ету және ұйымдардың жұмысына кедергі келтіру ҚР ҚК 379 және 401-баптары бойынша 2 жылға дейін бас бостандығынан айыруға әкеп соғады.
ҚК-нің 274-бабына сәйкес төтенше жағдай кезінде көрінеу жалған ақпарат тарату 3 жылдан 7 жылға дейін бас бостандығынан айыруға жазаланады. Төтенше жағдай кезінде қаруды, оқ-дәрілерді, жүріп-тұру құралдарын, әскери техниканы немесе өзге де әскери мүлікті қасақана жою немесе бүлдіру 10 жылдан 12 жылға дейін бас бостандығынан айыру түріндегі жазаны көздейді (ҚК 459-бабы).
Төтенше жағдай режимін бұзғаны үшін, төтенше жағдай кезінде құқық тәртібін бұзуға итермелейтін әрекеттер үшін (ӘҚБтК-нің 478-бабы) тиісінше 15 және 30 тәулікке дейін әкімшілік қамауға алу көзделген.
«Заңдылықты қамтамасыз ету мақсатында, «Прокуратура туралы» Заңның 31-бабын Басшылыққа ала отырып, азаматтарды өткізілетін іс-шараларға түсіністікпен қарауға, ішкі істер органдары мен уәкілетті органдар қызметкерлерінің заңды талаптарын сақтауға, оларға қажетті жәрдем көрсетуге шақырамыз», - деді ол.
