Семей әкімдігі 23 миллион теңгеге шырша орнатты

Семей тұрғындарын жергілікті әкімдік сатып алған екі шыршаның құны алаңдатты. Құны бюджетке 23 миллион теңгеге шыққан шырша желіде қызу талқыға түсті, деп хабарлады turkystan.kz.

Шыршалардың құны белгілі болған соң, тұрғындар тауар мен бағаның сәйкес келмейтінін және бағасы тым қымбат екенін айтты.

Қалалық тұрғын үй-коммуналдық шаруашылық (ТКШ) бөлімінде айтылған сынға қатысты жауап берілді. «Орал шыршасы» деп аталатын жасанды ағаштар Мәскеуден сатып алынған. Біреуінің биіктігі – 19 метр, ал екіншісі – 18 метр.

Сондай-ақ, ТКШ бөлімінде сатып алу құнына тек шыршалар ғана емес, сонымен қатар бірқатар ілеспе шығындар, соның ішінде әшекейлер де кіретіні айтылды.

«Бұл шыршалар мынадай бөліктерден тұрады: орталық алаңдағы ұзындығы 200 сантиметр «Жұлдыз» тәжі; 10 метрден 200 дана жарық диодты гирляндалар, «Жұлдыз» ойыншығы – 47 сантиметрден 25 дана, «Жұлдыз» ойыншығы – 36 сантиметрден 220 дана, 245 жұлдыз тәрізді қоректендіру адаптері», – деп хабарлады ТКШ бөлімінде.

Сонымен қатар бөлінген қаражатқа Мәскеуден көлік шығындары және құрастыру шығындары, салық кіретіні атап өтілді.

Ұқсас жаңалықтар

Back to top button