Әкімдік балық өсіруді құрылыс компаниясына тапсырған

Бүгін «Атамекен» ҰКП алаңында Қайырбек Сүлейменовтің төрағалығымен Кәсіпкерлердің құқығын қорғау және сыбайлас жемқорлыққа қарсы іс-қимыл кеңесінің отырысы өтті, деп хабарлады turkystan.kz.

Кеңес жұмысына мемлекеттік органдар, бизнес және салалық қауымдастықтардың өкілдері қатысты. Жиында құқығы бұзылған кәсіпкерлердің өтініштері қаралды.

Кеңестен көмек сұрағандардың бірі – Ақтөбе облысының «Ардағым» шаруа қожалығының басшысы Момынжан Қали. Ол құнды, сирек кездесетін және жойылып кету қаупі бар балық түрлерін өсіру бойынша мемлекеттік сатып алу кезінде өзінің құқығы бұзылғанын мәлімдеді. Өйткені Ақтөбе облысының Табиғи ресурстар және табиғатты пайдалануды реттеу басқармасы мемлекеттік сатып алуды балық өсіруге еш қатысы жоқ құрылыс компаниясына тапсырған.

 «Ақтөбе облысының Табиғи ресурстар және табиғатты пайдалануды реттеу басқармасы лауазымды тұлғаларының біліктілік талаптарына сәйкес келмейтін жеткізушіге байқауға қатысуға рұқсат беруі мемлекеттік сатып алулар туралы заңнаманы анық бұзғанын көрсетеді. Ал байқауды өткізу мерзімдерін негізсіз созу сирек кездесетін және құнды балық түрлерінің шабақтарын өсіру бойынша мемлекет жоспарлаған шараларға кедергі келтіреді», – деп атап өтті Қайырбек Сүлейменов.

Кеңес Мемлекеттік ішкі аудит комитетінің Ақтөбе облысы бойынша департаментіне байқау өткізу кезінде Мемлекеттік сатып алу туралы заңнаманың бұзылуына жол бергені үшін облыстық басқарманың кінәлі лауазымды тұлғаларын әкімшілік жауапқа тартуды сұрады.

Дәулет АСАУ

 

Ұқсас жаңалықтар

Back to top button