Редакциядан: Қазір еліміздің жоғары оқу орындарында шетелдегі қандастардың балалары көптеп білім алып жатыр. Оларға көбіне студенттер үйінен орын берілген. Алаңсыз білім алуына толық жағдай жасалған. Қандастарға ұстаздар білім беріп қана қоймай, оларға демеу болып, әрбір шешуші сәтте жанынан табылып жүр. Төмендегі материалдағы тағылымды оқиға – соның айқын куәсі.
2018 жылы Қытай Халық Республикасынан Таңнұр Қайшыбекқызы есімді қандасымыз Л.Гумилев атындағы ЕҰУ-ға оқуға келді. Ол орта мектепті Қытайдың Құлжа қаласы Нылқы ауданынан бітіріпті. Қазір ол – Физика-техникалық факультетінің «Физика мұғалімдерін даярлау» мамандығы бойынша 3-курс студенті. Анасының есімі – Гүлсия.
Мен Таңнұрдың кураторы едім. Ол маған биыл қыркүйек айының соңында Марат деген жігітке тұрмысқа шыққалы жатқанын айтты. Қазан айының ортасына қарай ұзатылмақшы, сосын тойы болады екен. «Менің ата-анам Қытайда тұратынын білесіз ғой, ол кісілерді көрмегелі 3 жылдан асты. Менің болашақ жарым Марат тұрмысқа шығуға ұсыныс жасады. Болашақ ата-енем де Қытайда тұрады, бірақ ол кісілер қазір Қазақстанға 6 ай мерзімге уақытша келді. Қытайда жігіт жақ менің әке-шешемнің алдынан өтіп, құда түсті. Ата-анам болашақ құдаларын көріп, көңілдері толып, маған баталарын берді. Өкінішке қарай, шекараның жабық болуына байланысты әке-шешем тойға келе алмайды. Ал мен қазір өз жасауымды дайындап, тұрмысқа шығуға дайындалып жатырмын», – деді. – Апай, менің қиналып тұрғаным, бұл жақта мені шығарып салатын туған-туыстарым жоқ. Қайдан ұзатылатынымды білмеймін. Шашымды тарап, бұрымымды өріп беретін жеңгелерім де жоқ, бұл жақта, – деді. Содан мен «Ендеше мен сені кураторың ретінде өзім ұзатамын, кафедра оқытушыларына айтамын. Бата беріп, сені өзіміз ұзатамыз, сен ештеңеге алаңдама» дедім. Кафедраға келіп, «физика мұғалімдерін даярлау» мамандығын ашқан кафедра доценті Жадыра Ермековамен ақылдастым. Жадыра Керімбайқызы «онда, біз күйеу баламен танысайық, қандай жігітке, қандай отбасына барады, өзіміз сөйлесейік», – деді.
Қазан айының басында күйеу баламен Жадыра Керімбайқызы екеуміз кездестік, оның отбасы туралы білдік. Ата-анасы оқыған, қызмет істейтін кісілер екен, көңіліміз толды. Марат біздің Еуразия ұлттық университеті Ақпараттық технологиялар факультетінің түлегі екен. Қазір өзінің шағын бизнесімен айналысады. «Әке мен бала» деген үлкен фотостудиясы бар екен.
Сол күні келіп кафедра ұжымына жаңалықты айттық, олар бірауыздан «қолдаймыз, ұзатамыз» деді. Кафедра атынан кілем алып беретін болдық. Жадыра Керімбайқызы екеуміз қыздың өзіне алтын жинақ, күйеу балаға сағат сыйлаймыз деп келістік.
Кафедра доценттері Жадыра Ермекова, Батсайы Садықовамен бірге қызымызды барлық салт-дәстүрді сақтап ұзаттық. Жадыра Керімбайқызы Таңнұрдың шашын өріп, мен шығарып салу әнімді айтып, батамызды беріп, шығарып салдық. Тәтті, жеміс-жидек толы қоржындарымызды дайындап, алып бардық. Таңнұрмен бірге ата-енесі Бейсенжан мен Сарқытхан құдалардың үйіне Жадыра Керімбайқызы екеуміз еріп барып, құтты орнына қондырдық.
Құдалар ҚХР-ның Бұратала қаласынан келген қандас бауырлар екен. Рулары – Найман. Бізді ол кісілер «Еуразия ұлттық университетімен құда болдық» деп мәз-мейрам болып, құшақ жая қарсы алды.
Қытайдағы қандас бауырларымыздың қызын, ата-анасын, туыстарын шалғайда екенін білдірмей, осылай ұзатып, тойына құда болып барған біздерге құдалар дән риза болды.
Қазір Таңнұр қызымыз өз отбасында ибалы келін, сүйікті жар болып, бақытты өмір сүріп жатыр.
Ғибрат Сағындықова,
Л.Гумилев атындағы ЕҰУ доценті,
физика-математика ғылымдарының кандидаты
