Елордада Ә.Мәмбетов пен Т.Жүргенов атындағы көшелер пайда болды

Елордада Ә.Мәмбетов пен Т.Жүргенов атындағы көшелер пайда болды

         Астана мәслихатының депутаттарының шешімімен елордадағы бірқатар көшелерге жаңа атау берілді. Ономостикалық комиссия ұсынысы бойынша көпшіліктің наразылығын тудырып жүрген бірнеше көшенің аты қазақшаланды.

         Атап айтар болсақ, "Алматы" ауданында Хусейн бен Талал көшесі пайда болады, ол бұрын 23-17 жобалық атаумен аталып жүрген еді. Сонымен қатар, Кенен Әзірбаев (бұрынғы 23-31), Темірбек Жүргенов көшесі (бұрынғы А19) пайда болады. Ал, бұрынғы Хусейн бен Талал көшесі енді Ұлы Дала даңғылы деп аталады. Сонымен бірге, Иван Панфилов атындағы көше Сәкен Жүнісов көшесі болып өзгертіліп, Бейімбет Майлин көшесі мен А193 көшесі біріктіріледі.

         Еңбекшілер көшесін нөмірі 36-шы көшемен біріктіріп, Әлихан Бөкейханов даңғылы деген атау беріледі. "Сарыарқа" ауданындағы тура солай аталатын көшеге Әзірбайжан Мәмбетовтың есімі беріледі. "Есіл" ауданында бұрын жобалық атаулармен ғана аталып жүрген 10 көшеге жаңа атау берілетін болады.

         Сондай көшелердің бірі Е10 бұдан былай Орынбор деп аталады. Сонымен қатар, мұнда Нияз би, Нұрпейіс Байғанин, Сұлтанбек Қожанов, Қайым Мұхамедханов, Никола Тесла, Рабиға Есімжанова, Саттар Ерубаев, Ханшайым Сүнбике және Бұқар жырау атты көшелер пайда болады. Бұл шешім әділет органдарында тіркелгеннен соң 10 күнтізбелік күн ішінде күшіне енеді.