Пеш жарылған: ШҚО-да көп балалы аналарға берілген үйде жарылыс болды (видео)
Пеш жарылған: ШҚО-да көп балалы аналарға берілген үйде жарылыс болды (видео)
ШҚО Күршім ауданында көпбалалы аналарға берілген жаңа үйлердің бірінің пеші жарылды. Azattyq Ruhy- ның мәліметінше, бұл жағдай осымен екінші рет қайталанып отыр, деп хабарлайды Turkystan.kz.
Бұдан бұрын пәтерлердің бірін су алып, артынша пеш жарылған еді. Ешкім зардап шекпеген. Бірақ мәселе шешілгені былай тұрсын, оқыс оқиға екінші рет қайталанған. Аталған мәселені «Үйлесім» қоғамдық бірлестігінің жетекшісі Жұлдыз Ақтанжанова өзінің Facebook-парақшасында жазды.
«Бұл пештердің ақауы бар екенін, эксплуатацияға жарамсыз екенін осы әлеуметтік желіде бірнеше рет жазғанмын. Бірақ сол кезде әкім тарапынан жиналыс жасап, аналарды алдап, уәде берумен ғана шектелді. "Бұл пештердің жарылуы бі-ақ рет болды, енді қайталанбайды, Алматыдан басқа пештер әкеліп орнатамыз" деген сынды уәделер әлі күнге шейін қарқынды орындалып жатқан жоқ! Бюджет ақшасы резиновый емес деп айтыпты Д.Кажанов. Бюджет резиновый болмаса, адамның да өмірі ойыншық емес! "Нерезиновый" бюджет туралы әуел баста осы пештерді мемлекеттік сатып алу порталында тапсырыс бергенде ойлану керек болған деп ойлаймын. Әкім тек орнын босатып қане қоймай, 2019-2021 жылдары осы ауданға бөлінген қаражат есебіне толық тексеру жүргізілуін талап етемін», - деп жазды Жұлдыз Ақтанжанова.Оның айтуынша, жарылыс болғанда балалар сабақта болыпты. Видеоматериалда көрсетілгендей, оқиға салдарынан жаңадан салынған үйдің қабырғасы қирап, төбесі жарылған.
«Ертең Қазақстан Республикасы ең маңызды күнді атап өтпек! Күршім ауданының әкімі Дулат Кажанов осы күнге «керемет» сый жасап берді. Күршім ауданы ЖКХ басшысы денсаулығына байланысты демалыста, аудан әкімінің орынбасары Шораяқов мырза еңбек демалысында. Аналардың жаңа тұрғын үйге қатысты мәселелі сұрақтары бар екенін біле тұра, немқұрайлық танытып, адам өмірінің қауіпсіздігіне желүсті қараған әкім орнын босатсын», - дейді Жұлдыз Ақтанжанова.Оқиға орынында қазір арнайы жұмыс тобы құрылды. Аудан әкімдігі болса мәселеге тұрғындардың өздерін кінәлап отыр.
«Орын алған жағдай бойынша төтенше жағдайлар бөлімінің басшысы, аудан прокурорының орынбасары, полиция бөлімінің басшысы, аудандық маслихат хатшысы және ауылдық округі әкімінен жұмыс тобы құрылып, пештің жарылу себебін анықтауда. Төтенше жағдайлар алдын ала деректері бойынша ақаулық жылыту қазандығының (судың жеткіліксіз мөлшері) дұрыс пайдаланылмағандығынан болған. Адам шығыны жоқ. Оқиға жергілікті атқарушы органдардың арнайы бақылауында. Болған жағдайдың себебі анықталғаннан кейін қосымша хабарланатын болады.
А. Шахмардан