Қазақстанда ресейлік «Спутник Лайт» вакцинасы өндірілуі мүмкін - Алексей Цой

ҚР Денсаулық министрі Алексей Цой Ресейден «Спутник Лайт» вакцинасын әкелуге қатысты алдын ала келісім жүріп жатқанын мәлімдеді. «Бүгінде ресейлік әріптестерімізбен «Спутник Лайт» вакцинасын жеткізу туралы келісім жүргізіп жатырмыз. Бұл екпенің «Спутник V»-дан айырмашылығы жоқ, тек бірінші компоненті бөлек», - деді А. Цой. Министрдің айтуынша, әзірге аталған екпе түрін елімізге жеткізу мерзімі белгісіз. «Сонымен қатар Ресей «Спутник Лайт» вакцинасын қанша көлемде ұсына алатыны туралы нақтылап жатырмыз. Себебі олардың ішкі нарығында да сұраныс бар. Ресей жағынан коммерциялық ұсыныс түсе сала, іске кірісетін боламыз. Бізге вакцина үлкен көлемде қажет емес, өйткені елімізде ревакцинация жүріп жатыр және оның өз кезеңі бар. Жалпы алғанда жаңа жылға дейін қайта вакцина алушылар үшін екпе көлемі жеткілікті», - дейді ол. Сондай-ақ, А.Цой Қарағандыдағы фармацевтикалық кешенге «Спутник Лайт» вакцинасының тәжірибелік партиясы жеткізілгенін және бүгінде оны өзімізде өндіру жағы қаралып жатқанын жеткізді.