Сәтбаевта зорланған 5 жасар қыздың ісі: сотталған ерлі-зайыптының жазасы жеңілдетілмейді

Сәтбаевта зорланған 5 жасар қыздың ісі: сотталған ерлі-зайыптының жазасы жеңілдетілмейді

Сәтбаевта зорланған 5 жасар қыздың ісі: сотталған ерлі-зайыптының жазасы жеңілдетілмейді
ашық дереккөзі
Қарағанды облыстық соты Сәтбаев қаласында 5 жасар қызды зорлау ісіне кінәлі деп танылған ерлі-зайыптыларға қатысты үкімді өзгеріссіз қалдырды, – деп жазды ҚазАқпарат. Сәтбаев қаласында бес жасар қызды зорлау ісі бойынша сотталған ерлі-зайыптылардың жазасы жеңілдетілмейтін болды. Сотталғандар мен қорғаушылар сот үкімімен келіспей, апелляциялық шағым берген болатын. Сот алқасы бірінші сатыдағы соттың үкімін өзгеріссіз қалдырды. Айыпталған ерлі-зайыптылардың күйеуі өмір бойына сотталса, әйелі – 22 жылға бас бостандығынан айырылған болатын. Олар Қылмыстық кодекстің үш бабы бойынша кінәлі деп танылды: сексуалдық сипаттағы зорлық-зомбылық әрекеттерін жасағаны (ҚК 121-бабы 4-бөлігі), жас баланы зорлағаны (ҚК 120-бабы 4-бөлігі), денсаулығына ауыр зиян келтіргені үшін (ҚК 106-бабы 2-бөлігі 3-тармағы),5),11). «Сотталғандардың кінәсі жәбірленушінің, куәгерлердің айғақтарымен, сараптама қорытындысымен расталған. Бұл жаза олар жасаған қылмыстардың ерекше ауырлығын ескере отырып әділ болып табылады. Заңның талаптарына сәйкес (ҚК 46-бабы 4-бөлігі) өмір бойына бас бостандығынан айыру әйелдерге тағайындалмайды, сондықтан П-ның жұбайы 22 жыл түрмеде отырады. Үкім заңды күшіне енді», - деп хабарлады Қарағанды облыстық сотының баспасөз қызметі. Естеріңізге сала кетейік, бұл оқиға биыл 23 шілдеде болды. Сәтбаев қаласының полициясына Жезқазған тұрғыны өзінің 5 жасар қызы жоғалып кеткенін хабарлаған. Сәтбаев қалалық полиция бөлімінің бүкіл құрамы мен волонтерлер іздеу салып, нәтижесінде 5 жасар баланы көпқабатты үйдегі пәтерлердің бірінен тапты. Бұл іс бойынша 58 жастағы ер адам ұсталған болатын. Ол 6 қазан күні Қарағанды қаласының тергеу изоляторында өзіне қол салды.