Жаңалықтар

Құлдықта ұстап, ұрып, қорқытқан: Өз-өзіне қол салған ер адамның туыстары әділдік іздейді

Шымкентте өз өзіне қол салған ер адамның туыстары әділдік іздейді. Олар ер адамды мұндай қадамға баруға біреулер итермелегеніне сенімді, деп хабарлайды 31 арнаның «Информбюро» жаңалықтар бөлімі.

Тұрғындар қайғылы оқиғаға азық-түлік дүкенінің иесін кінәлап отыр. Отбасы дүкеннен азық-түлікті қарызға алып жүріп 300 мың теңгеге қарыз болып қалған. Бұл ақшаны қаза болған ер адам өз күшімен жабуға қанша тырысса да, қарыздың мөлшері кемімеген.

Марқұм Бақытжан Оңалбеков 30 қыркүйек өзіне қол жұмсаған. Соңғы жарты жылда отбасының қарызын қайтару үшін мал баққан. Өз маңдай терімен 300 мың теңге жинаған. Қожайын оған қой бағуды ұсынған, бірақ туыстарының айтуынша Бақытжан нағыз құлдыққа жегілген.

«Қаласа боқтайды, ойына келсе ұра салады деп баламның өзі мойындаған. Егер бір рет ұрса, онда екінші рет те қол көтеретініне сенімдімін. Ол үш рет қашып кеткен, алайда оны тауып алып, қайта жұмысқа жеккен. Ең соңғы рет мен өзім оған: «Соңғы бес күн қалды, адал еңбегіңмен өтеп қайт” деп жіберген едім. Егер бұлай боларын білгенде, ешқашан жібермес едім ғой», – дейді Бақытжанның анасы Аягөз Бердалиева.

Марқұмның соңында 2 жасар баласы қалды. Анасының айтуынша, қайғылы оқиға болатын күні малдың иесі бес қойының жоғалып кеткенін айтқан. Және осы үшін тағы да 300 мың теңге талап етіп, “қолы ұзын” екенін айтып қорқытқан.

«Біз кеше Леңгірге бардық, онда бізге күдіктінің бірі Сайрамда жол полициясы болып істейтінін айтты. Мейлі заң қызметкері болсаң да, сенің бөтен біреудің баласын бұлай қорлауға қақың жоқ еді. Сенің де өз балаларың өсіп келе жатыр», – дейді марқұмның анасы.

Туыстары Бақытжан малын баққан отардың иесінің нөмірін ұсынған, бірақ ол марқұмның онда еңбек етпегенін айтады. Туыстары полицияға арыз түсірді. Тергеу жұмыстарына байланысты ер адамның денесі әлі жер қойнына тапсырылмаған. Түркістан облыстық полиция департаменті өз кезегінде аталған іс басшылықтың тікелей назарында екенін жеткізіпті.

Back to top button