Ақтөбеде екі баланы қағып, қашып кеткен жүргізуші іздестірілуде

Ақтөбеде екі баланы қағып, еш көмек көрсетпей кетіп қалған жүргізушіні полиция іздеп жатыр, – деп жазды ҚазАқпарат. Болжам бойынша «Hundai» маркалы автокөлігінің жүргізушісі Ақтөбе қаласындағы Ораз Тәтейұлы мен Мәңгілік ел көшелерінің қиылысында балаларды қағып, алғашқы медициналық көмек көрсетпестен белгісіз бағытқа қашып кеткен. Аталған жол-көлік оқиғасының куәгерлері жедел жәрдем мен полицияны шақырған. «Қазіргі уақытта полиция қызметкерлері жол-көлік оқиғаларының кінәлісін анықтау және ұстау бойынша жедел-іздестіру іс-шараларын жүргізіп жатыр. Кәмелетке толмаған екі бала облыстық балалар ауруханасына жеткізіліп, медициналық көмек көрсетілгеннен кейін үйіне жіберілді. Полиция департаменті осы жол-көлік оқиғасының куәгерлерін 102 нөміріне хабарласуды сұрайды»,- деп хабарлады облыстық ПД баспасөз қызметі.