جاڭالىقتار

باس سانيتار دارىگەردى سوتقا بەرگەن 35 ادامنىڭ شاعىمى بويىنشا شەشىم شىقتى

باس سانيتار دارىگەردى سوتقا بەرگەن 35 ادامنىڭ شاعىمى بويىنشا شەشىم شىقتى، دەپ حابارلايدى Sputnik.kz.

نۇر-سۇلتان قالاسىنىڭ اكىمشىلىك سوتىنا 35 ادام ارىزدانعان. بارلىعى باس مەملەكەتتىك سانيتار دارىگەردىڭ قاۋلىسىنداعى تالاپتاردى زاڭسىز دەپ تانۋدى تالاپ ەتكەن. سوت ماتەريالدارىنا سايكەس، ارىزدانۋشىلار ۆاكتسينا الماعان جۇمىسكەرلەر ءۇشىن مىندەتتى پتر-تەست ەنگىزۋ، پروفيلاكتيكالىق ەكپە جاساۋ، سونداي-اق ۆاكتسينا سالدىرماعانداردى جۇمىسقا كىرگىزبەۋ سياقتى تارماقتاردى زاڭسىز دەپ سانايدى.

اكىمشىلىك سوت باس مەملەكەتتىك سانيتار دارىگەر شىعارعان قاۋلىلاردىڭ ءبىر بولىگىن زاڭسىز دەپ تانۋ جانە كۇشىن جويۋ تۋرالى شاعىمدى قاناعاتتاندىرۋدان باس تارتتى.

«سوت قاۋلىلاردى شىعارۋ كەزىندە زاڭناما نورمالارىنىڭ بۇزىلۋىن انىقتاعان جوق. ازاماتتاردىڭ ەڭبەك قۇقىقتارى بۇزىلماعان، ويتكەنى COVID-19-عا قارسى ۆاكتسينالانباعان جۇمىسكەر كەپىلدەندىرىلگەن ەڭبەك قۇقىقتارىن ساقتايدى، ەڭبەك فۋنكتسيالارىن قاشىقتان جۇزەگە اسىرۋعا رۇقسات ەتىلەدى. ول ءۇشىن قاجەتتى جاعدايلار جاسالۋدا»، – دەلىنگەن سوت ۇكىمىندە.

«انىقتالعان ءمان-جايلاردىڭ ءبارىن، جالپى الەمدىك ينفەكتسيامەن كۇرەسۋگە باعىتتالعان شارالاردى قابىلداۋدىڭ قاجەتتىلىگىن ەسكەرە كەلىپ، سوت باس سانيتار دارىگەردىڭ قاۋلىلارىن زاڭسىز دەۋگە نەگىز جوق دەپ تاپتى»، – دەدى سۋديا.

Back to top button