Ираннан келген қандастар Солтүстік Қазақстан облысына барды

Ираннан келген қандастар Солтүстік Қазақстан облысына барды

Ираннан қандастар Солтүстік Қазақстан облысына барды, деп хабарлайды "Хабар 24". Қандастардың отбасыларына жалдамалы тұрғын үй берілді. Мәселен, Петропавлдан 120 шақырым жерде Николаевка ауылында "Еңбек" бағдарламасына қатысушылар үшін 30 үй салынды. Оларға қандастардың бір бөлігі қоныстанады. 20 отбасы Ираннан Ақтауға, Ақтаудан Нұр-Сұлтанға және елордадан солтүстікке келді. Олар үш елді мекенге қоныстанды. "Мен ата-бабаларымның Отанына келгеніме қуаныштымын. Жұбайым да қуанышты. Балалардың ана тілін білгенін, мәдениетін сақтағанын қалаймыз. Сондықтан біз осында көшуге шешім қабылдадық", - деді елге төрт баласымен көшіп келген қандас Нажиб Казак. Николаевкада Ираннан келген 10 қандас отбасы бір көшеге қоныстанды. Олар азаматтықты рәсімдеп, жұмыс табуы керек. Кейбіреулер өз ісімен айналысуды жоспарлап отыр. "Келушілердің арасында (61 адам) ер адамдар көп, олар механизаторлар, дәнекерлеушілер, құрылысшылар, дәрігер бар. Әйелдер арасында тігіншілер көбінесе жүн өңдеумен айналысады, алдағы уақытта жүн өңдеу және ұлттық стильде кілем өндіру бойынша 20- ан астам жұмыс орнын құруды жоспарлап отыр", - деді Дүниежүзілік қазақтар қауымдастығының облыстық филиалының басшысы Арман Сүйіндіков. Естеріңізге сала кетейік, 15 қыркүйекте Маңғыстау облысына Ираннан 53 қандас ұшып келген болатын.