جاڭالىقتار

جامبىلداعى جارىلىس: ءىز-ءتۇزسىز جوعالعان جاۋىنگەردى شوپان كورگەن

بايزاقتاعى جارىلىس بولعان اسكەري بازانىڭ 30 گەكتار اۋماعى وق-دارىدەن قالعان جارىقشاقتاردان تولىق تازارتىلدى. بۇل تۋرالى qazaqstan.tv حابارلادى.

اپات بولعان جەردە 300-دەن استام سارباز جۇمىس ىستەپ جاتىر.

وسى اۋماقتان ءىز-ءتۇزسىز جوعالعان جاۋىنگەر، اسكەري سەرجانت باۋىرجان داۋىتباەۆتى ىزدەستىرۋ ءۇشىن جۇزگە جۋىق ادام جۇمىلدىرىلعان. 50 ارنايى تەحنيكا مەن ونعا جۋىق ساپەر بار.

جارىلىس بولعان كۇنى تاۋدى بەتكە الىپ بارا جاتقان اسكەري فورماداعى ادامدى جاقىن ماڭدا قوي باعىپ جۇرگەن شوپان كورگەن. الايدا، ول قويشىنىڭ شاقىرعانىنا ءۇن قاتپاعان. جاۋاپتىلاردىڭ سوزىنشە، كونتۋزيا الىپ، ەسىن بىلمەۋى مۇمكىن. سوندىقتان تاۋلى ايماقتار دا ءجىتى ىزدەستىرىلىپ جاتىر.

28349 اسكەري ءبولىم كومانديرىنىڭ ورىنباسارى رۋسلان جىلقىباەۆ: «ءبىزدىڭ قارۋلاس دوسىمىز، سەرجانت باۋىرجان داۋىتباەۆتى ىزدەۋ جۇمىسىن توقتاتپايمىز. وسى كۇنگە دەيىن اتا-انا، باۋىرلارىمەن ءار جاساپ جاتقان قادامىمىز تۋرالى حابارلاپ وتىرمىز. باۋىرجاندى تاپپايىنشا، ءبىز جۇمىسىمىزدى دوعارمايمىز»، – دەدى.

Back to top button