Жаңалықтар

«Медицина қызметкерлері заң бұзған жоқ»: Орманда өлі табылған пациентке қатысты қызметтік тексеру аяқталды

Дәрігерлер Аршалы қаласында қайтыс болған науқасқа қатысты жүргізілген қызметтік тергеудің қорытындысын жариялады. Комиссия қорытындысы бойынша Аршалы аудандық ауруханасының медицина қызметкерлері қолданыстағы заңнама нормаларын бұзған жоқ, деп хабарлайды ҚазАқпарат.

Ақмола облысы денсаулық сақтау басқармасының мәліметінше, 60 жастағы науқас 2021 жылғы 21 тамызда Шортанды аудандық ауруханасының жолдамасы бойынша Аршалы аудандық ауруханасының стационарына түскен.  Келесі күні сағат 19:41-де жағдайдың теріс динамикасы мен ауырлығын ескере отырып, консилиумның шешімімен ол қарқынды терапия палатасына, ал 26 тамызда жалпы палатаға ауыстырылған. Ведомствода атап өткендей, 6 қыркүйек сағат 13:15 кезінде науқасқа жазылып шыққаны айтылды. Әйел баласы келгенде ғана бөлімшеден шығатынын жеткізген. Сағат шамамен 14:15-те науқас медбикеге ұлының келгенін және үйіне шыққысы келетінін айтады. Әрі қарай кезекші медбике оған бөлімшеден шығуға көмектескен. Тек сағат 16:00-де науқасқа бір ұлы келді, оған олар әйелдің кетіп қалғанын хабарлайды. Осыдан кейін әйелді іздеу шаралары басталды.

«Сағат 17:00-де іздеуге медицина қызметкерлері де қосылды. Қызметкерлер такси жүргізушілерімен сұхбаттасып, жақын маңдағы барлық сауда нүктелерін, науқастың фотосуреті бар дүкендерді аралап шықты. Екі күн бойы дәрігерлер Ұлттық ұлан №6505 әскери бөлімінің әскери қызметшілерімен бірге түнгі сағат 01:00-ге дейін іздестіру жұмысын жүргізді. Біз саяжай учаскелерін аралап, жақын маңдағы барлық қараусыз қалған ғимараттарды аралап, өзен бойымен жүрдік. Екі күннің ішінде іздеуге 60-тан астам адам жұмылдырылды», – деді ведомстводан.

Жедел-іздестіру шаралары барысында полицейлер Аршалы кентінде орналасқан бейнебақылау камераларының жазбасын қарап, Аршалы мен Нұр-Сұлтан арасында тасымалдайтын такси жүргізушілерінен жауап алды, адам көп жиналатын орындарға бағдарлар жапсырды, Аршалы ауданы полиция бөлімінің жеке құрамын бағдарлады. Ақбұлақ, Ижевское ауылының, Аршалы станциясының аумағын аралады. Нәтижесінде 9 қыркүйекте вокзал маңындағы орман алқабынан әйелдің денесі табылды.

«Сол күні шұғыл түрде Ақмола облыстық денсаулық сақтау басқармасының басшысы, Медициналық және фармацевтикалық бақылау комитетінің аумақтық департаменті, заң қызметтері басшысының орынбасары бастаған комиссия құрылды. 10 қыркүйекте басқарма басшысы Нариман Сыздықов Аршалы аудандық ауруханасының инфекциялық стационарын аралап шықты. Стационардың материалдық-техникалық жағдайы қанағаттанарлық. Инфекциялық стационардың бірінші қабатында бейнебақылау камералары бар. Басқарма басшысы санитарлық нормаларды сақтай отырып, ұжыммен этика және деонтологияны қатаң сақтау мәселесі бойынша жұмыс кездесуін өткізді», – деп жазылған хабарламада.

Сонымен қатар, қызметтік тергеуді объективті және жан-жақты жүргізу үшін денсаулық сақтау басқармасы басшысының 10 қыркүйектегі бұйрығымен бас дәрігер Альбина Анюхина қызметінен уақытша шеттетілді.

«Әрекетке қабілетті пациентті шығару туралы мәліметтерді сенім білдірген адамдарға беру мәселесі заңды түрде айқындалмаған. Тиісінше, Аршалы аудандық ауруханасының медицина қызметкерлері қолданыстағы заңнама нормаларын бұзған жоқ», – деп түйіндеді ведомстводан.

 

Back to top button