«АSTANA» телеарнасына жаңа басшы тағайындалды

Бүгін «Nur Otan» партиясының хатшысы Әлібек Әлденей «АSTANA» телеарнасының ұжымына жаңа бас директорды таныстырды. Жаңа басшы бұрын «NUR Media» холдингі бас директорының орынбасары қызметін атқарған Әзизхан Әбілдинов.

Ә.Әлденей телеарнаның бұрынғы басшысы Құрманбек Жұмағалидың атқарған жұмысын атап өтті. Телеарна Қ.Жұмағалидің басшылығымен 2020-2021 жылдары еліміздің жетекші телеарналарының ТОП-4-іне енді. Биылғы жылдың сегіз айының қорытындысы бойынша телеарнаның орташа үлесі жалпы телебағдарламаның 10 пайызын құрайды. Телеарнаның материалдық-техникалық базасы жаңартылды. 

«Nur Otan» партиясының қолдауымен 2020-2021 жылдары  Тәуелсіздіктің 30 жылдығына орай бірқатар табысты медиажобаларды іске асырылды. Бұл – «Тәуелсіздіктің 7 қыры» фильмдер топтамасы, «Быть первым», «Без права на ошибку», «Өмір-дастан» роликтері, «Из первых уст» интерактивті бағдарламасы, «Қазақстан» музыкалық клипі. Тележобаларда Тәуелсіздіктің 30 жылы ішінде Қазақстанның қалыптасуындағы Тұңғыш Президент – Елбасы Нұрсұлтан Әбішұлы Назарбаевтың тарихи рөлін ашуға ерекше назар аударылған. 

Ә. Әлденей «Астана» телеарнасының жаңа басшысы Әзизхан Әбілдиновті таныстыра отырып, оның 2017 жылдан бастап «Nur Media» холдингінде БАҚ мәселелерімен айналысқанын атап өтті. Сонымен қатар, ҚР Президенті Әкімшілігінде, орталық және жергілікті мемлекеттік органдарда жұмыс істегенін айтты. Оның тікелей қатысуымен «Nur Media» холдингінде бірқатар интернет жобалар құрылды.

«Nur Otan» партиясының хатшысы қазіргі таңда «АSTANA» телеарнасына маңызды міндеттер қойылып отырғанын айтты. Телеарнаның жоғары рейтінгін, қаржылық көрсеткіштерін және табыстылығын сақтап қалу қажеттігін ескертті.

«Nur Otan» партиясының және мемлекеттік саясаттың басым бағыттарын тиімді насихаттауды қамтамасыз ету қажет. Телеарнаның жаңалықтары өзекті және халықтың шынайы проблемаларын көрсетуі шарт. Мұның бәрі жаңа басшының менеджементтік тиімділігінің көрсеткіші болмақ», – деді партия хатшысы.

Back to top button