الماتىدا بانك ماڭىندا اتىس بولدى

الماتىدا تيميريازەۆ پەن ماركوۆ كوشەلەرىنىڭ قيىلىسىندا ورنالاسقان «الاتاۋ گراند» بيزنەس ورتالىعىنىڭ ماڭىندا اتىس بولدى، – دەپ حابارلايدى Tengrinews.kz. ايتا كەتەيىك، بيزنەس ورتالىقتىڭ ىشىندە «سبەربانك» پەن ۆتب بانكتەرىنىڭ بولىمشەلەرى ورنالاسقان.

كۋاگەرلەردىڭ ايتۋىنشا، اتىس تۇسكى ۋاقىتتا بولعان. بانك بولىمشەسىنىڭ كۇزەتشىسى بيزنەس ورتالىقتىڭ الدىندا اتىس بولعانىن حابارلاعان. كۇزەتشىنىڭ ايتۋىنشا، اتىستان بانك كليەنتى زارداپ شەكتى.

پوليتسيا قىزمەتكەرلەرى «ۆتب» بولىمشەسىنىڭ ىشىندە جۇمىس ىستەپ جاتىر. وقيعا ورنى قورشاۋعا الىنعان جوق، بىراق بيزنەس ورتالىققا ەشكىمدى كىرگىزبەي جاتىر.

سونداي-اق، ۆتب بانكىنىڭ وكىلدەرى وسى وقيعاعا قاتىستى پىكىرىن ءبىلدىردى. Tengrinews.kz تىلشىسىنە بانكتىڭ ءباسپاسوز قىزمەتىندەگىلەر بانك كليەنتىنە شابۋىل جاسالدى دەگەن اقپاراتتىڭ باق-تا پايدا بولۋىنا بايلانىستى بانكتىڭ بارلىق بولىمشەلەرى قاۋىپسىزدىك شارالارىن كۇشەيتە وتىرىپ، شتات رەجيمىندە جۇمىس ىستەپ جاتقانىن مالىمدەدى.

«الاتاۋ گراند» بيزنەس ورتالىعىنان شىققان ەر ادامعا شابۋىل بانك اۋماعىنان تىس جەردە بولعان. بىزگە بەلگىلى بولعانداي، اتالعان وقيعا بويىنشا قازىرگى كەزدە جەدەل تەرگەۋ شارالارى جۇرگىزىلۋدە جانە قاجەتتىلىك جاعدايىندا بانكتىڭ قاۋىپسىزدىك قىزمەتى قۇقىق قورعاۋ ورگاندارىنا كومەگىن بەرۋگە دايىن. تولىق اقپاراتتى جەدەل تەرگەۋ شارالارى اياقتالىسىمەن قۇقىق قورعاۋ ورگاندارى بەرەدى دەپ ويلايمىز»،  – دەدى بانكتەگىلەر.

بانكتىڭ جارناما جانە قوعاممەن بايلانىس ءبولىمىنىڭ باسشىسى تاتيانا شەۆچەنكونىڭ ايتۋىنشا، 25 قازاندا «تسەنتركرەديت» بانكىندە بەلگىسىز ەكى ادام كۇزەتشىگە شابۋىل جاساۋ وقيعاسىنان كەيىن ۆتب بانكىندە قاۋىپسىزدىك شارالارى كۇشەيتىلگەن.

ەسكە سالايىق، وسىعان دەيىن دە الماتىداعى بانكتەردىڭ بىرىنە شابۋىل جاسالعانى حابارلانعان بولاتىن. بەلگىسىز ەكەۋ كۇزەتشىنىڭ قارۋىن الىپ كەتكەن. ءتارتىپ ساقشىلارىنىڭ ايتۋىنشا، قازىرگى ۋاقىتتا قالادا «دابىل» ۇستاۋ جوسپارى جاريالانعان بولاتىن. ال كەيىنىرەك كۋاگەر بانك كۇزەتشىسىنە جاسالعان شابۋىل جايلى ايتىپ بەرگەن ەدى.

ۇقساس جاڭالىقتار

Back to top button