Бұрынғы шенеунік Атырау облысының әкімін сотқа берді

Бұрынғы шенеунік Атырау облысының әкімін сотқа берді

Облыстық жұмыспен қамтуды үйлестіру және әлеуметтік бағдарламалар басқармасының экс басшысы Серік Қамидолла Атырау облысының әкімі Махамбет Досмұхамбетовті сотқа берді, деп хабарлайды АқЖайық. Ол өзін қызметтен босатқанына келіспейді. Қамидолла «АЖ» тілшісіне талап арыз бергенін растады, бірақ түсініктеме беруден бас тартты. Еске салсақ, биыл наурызда оны сыбайлас жемқорлыққа қарсы қызметкерлер пара алды деген күдікпен ұстаған еді. АқЖайық облыстық соттың баспасөз қызметінің хабарламасын келтіреді, талап арыз 8 шілдеде Атырау облысының мамандандырылған ауданаралық әкімшілік сотының өндірісіне түскен. Онда Қамидолла облыс әкімінің 2021 жылғы 05 мамырдағы өкімінің күшін жоюды сұрайды. - Талап арызға сәйкес, Атырау облысының әкімі биыл 5 мамырда С.Қ.Қамидолланы жұмыспен қамтуды үйлестіру және әлеуметтік бағдарламалар басқармасының басшысы лауазымынан босату туралы өкім шығарған. Өкімге Атырау қаласының №2 сотының үкімі негіз болған. Оған сәйкес, С.Қ.Қамидолла ҚР Қылмыстық кодексінің 361-бабының 1-тармағы («Қызметтік өкілеттіктерді теріс пайдалану») бойынша кінәлі деп танылды. Бірақ Қылмыстық кодекстің 65-бабының 1-тармағы («Шынайы өкiнуiне байланысты қылмыстық жауаптылықтан босату») бойынша қылмыстық жауапкершіліктен босатылды. Талапкер соттан осы өкімнің күшін жоюды сұрайды, - деп хабарлады «АЖ» сауалына баспасөз қызметі.