22 شىلدە: اتاۋلى كۇندەر مەن ماڭىزدى وقيعالار

1939 جىلى 22 شىلدەدە اتىراۋ وبلىستىق ولكەتانۋ مۇراجايى اشىلدى. ونىڭ قورىندا ولكە، تابيعات، مادەنيەت پەن ونەر جادىگەرلەرىنىڭ 50 مىڭنان استام ءتۇرى بار.

1992 جىلى قازاقستان مەن ۋكراينا اراسىندا ديپلوماتيالىق قارىم-قاتىناس ورنادى.

1993 جىلى قازاقستان رەسپۋبليكاسى جانە بۇرىنعى وداقتاس رەسپۋبليكالاردىڭ شارۋاشىلىق سۋبەكتىلەرىنىڭ اراسىنداعى ەسەپتەردى رەتتەستىرۋ ماقساتىندا قر مينيسترلەر كابينەتى جانە قر ۇلتتىق بانكى قازاقستانداعى شارۋاشىلىق سۋبەكتىلەرىنە شارت جاساسىپ، ساۋدا مامىلەلەرىن ىسكە اسىرۋ كەزىندە بۇرىن سسسر قۇرامىنا كىرگەن ءار رەسپۋبليكادا ءوز قولما-قول اقشاسىز ءرۋبلىنىڭ جانە ۇلتتىق ۆاليۋتاسىنىڭ اينالىمدا بولعانىن، سونداي-اق ولاردىڭ قولما-قول اقشاسىز «قازاقستان رۋبلىنە» اينالدىرىلاتىن باعامىن ەسكەرۋدى مىندەتتەدى. «قازاقستان ءرۋبلىنىڭ» باعامىن ۇلتتىق بانك رەسمي باعام رەتىندە بەلگىلەپ وتىردى.

2009 جىلى اتىراۋدا جايىق وزەنىنىڭ ۇستىمەن وتەتىن جاڭا ەكى كوپىردى پايدالانۋعا بەرۋ سالتاناتتى ءراسىمى ءوتتى. جالپى ۇزىندىعى 800 مەتر بولاتىن ءبىر كوپىر «پريۆوكزالنىي» شاعىن اۋدانىن اۋەجايمەن جالعاستىردى. كوپىردەگى قوزعالىس ءتورت جولاقتى، ونىڭ تاۋلىگىنە 5 مىڭ ءاۆتوموبيلدى وتكىزۋ مۇمكىندىگى بار. جولاۋشىلار ءۇشىن ەنى 2،5 مەترلىك اياقجولدار كوزدەلگەن. ەكىنشى كوپىر «جيلگورودوك» شاعىن اۋدانىندا قالانىڭ ەۋروپالىق جانە ازيالىق بولىكتەرىن قوستى. ونىڭ جالپى ۇزىندىعى – 693 مەتر. ول دا تاۋلىگىنە كەمىنە 5 مىڭ ءاۆتوموبيلدى وتكىزۋگە ەسەپتەلگەن.

2010 جىلى ەڭبەكشىقازاق اۋدانىنىڭ اقشي اۋىلىندا تەمىرشى داركەمباي شوقپار ۇلىنىڭ اتىنداعى قولدانبالى ونەر مۋزەيى اشىلدى. بىرەگەي مۋزەيدىڭ ءبىر بولىمىندە بەلگىلى تەمىرشى د.شوقپار ۇلىنىڭ ءوز قولىمەن جاساعان بۇيىمدارى، جيناعان زاتتارى، ونىڭ ءومىرى مەن شىعارماشىلىعىنا ارنالعان كىتاپتار، گازەت-جۋرنال ماقالالارى، ۆيدەوفيلم ديسكىلەرى بار. د. شوقپار ۇلى – قولدانبالى ونەردىڭ تانىمال شەبەرى، ەتنوگراف عالىم، قر سۋرەتشىلەرى جانە ديزاينەرلەرى وداعىنىڭ مۇشەسى، قازاقستاننىڭ لەنين كومسومولى سىيلىعىنىڭ لاۋرەاتى.

2013 جىلى ورالحان بوكەيدىڭ 70 جىلدىعىنا ارناپ، جازۋشىنىڭ ەكسكليۋزيۆتى تاڭدامالى شىعارمالار جيناعىن شىعاردى. ونىڭ شىعارمالارى ورىس، اعىلشىن، فرانتسۋز، نەمىس، جاپون، اراب، قىتاي جانە باسقا دا شەتەل تىلدەرىنە اۋدارىلدى.

2014 جىلى قازاقستاننىڭ 8 نىسانى – الماتى وبلىسىنداعى قايالىق، قارامەرگەن، تالعار جانە جامبىل وبلىسىنداعى اقتوبە ستەپنينسكوە، اقىرتاس، قۇلان، قوستوبە، ورنەك يۋنەسكو-نىڭ الەمدiك مۇرالارى تىزىمىنە ەنگىزىلدى.

2014 جىلى استانا قالاسىنىڭ اكىمى يمانعالي تاسماعامبەتوۆكە قازاقستان مەن يۋنەسكو اراسىنداعى قارىم-قاتىناستىڭ نىعايۋىنا قوسقان ۇلەسى ءۇشىن يۋنەسكو-نىڭ « ۇلى جىبەك جولى» كۇمىس مەدالى تابىس ەتىلدى. ي. تاسماعامبەتوۆ 18 جىل بويى يۋنەسكو ۇلتتىق كوميسسياسىن باسقارعان، ال « ۇلى جىبەك جولى» مەدالى سوڭعى 20 جىل بويى ەشكىمگە تابىستالماعان. 2015 جىلى الماتىنىڭ 1000 جىلدىعى يۋنەسكو-نىڭ مەرەيتويلىق داتالار تىزىمىنە ەنگىزىلدى.

2017 جىلى «ەۋرازيا» ءحىىى حالىقارالىق كينوفەستيۆالىنىڭ ۇيىمداستىرۋ كوميتەتى «كينەماتوگراف ونەرىنە قوسقان ۇلەسى ءۇشىن» سىيلىعىن بەكىتتى. وسىناۋ جوعارى ناگرادا قازاق ونەرىنىڭ اتى اڭىزعا اينالعان جۇلدىزى، حالىق ءارتىسى بيبىگۇل تولەگەنوۆاعا تابىستالدى.

2017 جىلى تۇركيانىڭ قارا تەڭىز جاعاسىنداعى سامسۋن قالاسىندا الەمنىڭ 97 ەلىنەن جينالعان 3105 سپورتشى اراسىنداعى ءحىىى سۋردليمپيادا ويىندارى باستالدى. قازاقستان اتىنان جارىسقا قوستانايلىقتار – مۇكىس سپورتشىلار اراسىنداعى 2016 جىلعى الەم چەمپيوناتىنىڭ كۇمىس جۇلدەگەرلەرى دانيار ەسكەندىروۆ پەن قانات قوڭقاباەۆ قاتىسىپ، قولا مەدالدى يەلەندى.

2018 جىلى قازاقتىڭ تانىمال اقىنى، ءانشىسى ءارى كومپوزيتورى ەستاي بەركىمباەۆتىڭ ۇرپاقتارى ەكىباستۇزداعى مۋزەيگە ونىڭ جەكە زاتتارىن تابىستادى. 1939 جىلى ەستاي الماتىدا جازۋشىلار وداعىنىڭ وتىرىسىنا قاتىسقان كەزدە ەكى چەمودان ساتىپ العان. سونىڭ ءبىرىن نەمەرەسى زەكەن اپايعا، ەكىنشىسىن نەمەرە اعاسى قىزداربەك اتاعا سىيلاعان. قىزداربەك اتانىڭ نەمەرەلەرى چەموداندى مۋزەيگە اكەلدى. ەستاي بەركىمباەۆ (1874-1946) – قازاقتىڭ تانىمال اقىنى، ءانشىسى ءارى كومپوزيتورى، قازاقستان كومپوزيتورلار وداعىنىڭ العاشقى مۇشەلەرىنىڭ ءبىرى (1939)، قازاق سسر ەڭبەك سىڭىرگەن ونەر قايراتكەرى (1939).

2019 جىلى نۇر-سۇلتان قالاسىندا قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتى – مەملەكەتتىك اقپاراتتىق كوممۋنيكاتسيالىق الاڭ قۇرىلدى. ونىڭ ماقساتى – مەملەكەتتىك بيلىك ورگاندارى مەن قوعامنىڭ ءوزارا ءىس-قيمىلىنىڭ ءتيىمدى تەتىگىن قۇرۋ، سونداي-اق مەملەكەتتىك ورگاندار مەن بۇقارالىق اقپارات قۇرالدارىنىڭ ءوزارا قارىم-قاتىناسىن قامتاماسىز ەتۋ.

ۇقساس جاڭالىقتار

Back to top button