تۇركىستان وبلىسىنان ماڭعىستاۋعا تاعى دا 4 ۆاگون مال ازىعى جونەلتىلدى

بۇگىن تۇركىستان وبلىسى، ورداباسى اۋدانى، بادام ستانساسىنان ماڭعىستاۋ وبلىسىنا 5 مىڭ باۋ، ياعني، 110 توننا ءشوپ تيەلگەن 4 ۆاگون ءشوپ جىبەرىلدى، دەپ حابارلايدى «Nur Otan» پارتياسى تۇركىستان وبلىستىق فيليالىنىڭ ءباسپاسوز قىزمەتى.

بۇل يگى ءىس-شارا «Nur Otan» پارتياسى تۇركىستان وبلىستىق فيليالىنىڭ ۇيلەستىرۋىمەن، ورداباسى اۋدانى اكىمدىگىنىڭ ۇيىمداستىرۋىمەن وتكىزىلدى.
باتىستاعى قۋاڭشىلىق بۇكىل ەلدى الاڭداتتى. ونىڭ ىشىندە تۇركىستان وبلىسىنىڭ تۇرعىندارى دا شاما كەلگەنشە ارەكەت ەتىپ، كومەگىن جولداپ جاتىر. بۇل رەتتە وتانشىل جاس قۇرمەت تالاپقازىنىڭ باستاماسى قوعامعا قوزعاۋ سالعانىن ايتا كەتكەن ءجون.
تۇركىستان وبلىسىنىڭ اكىمى ءو.شوكەەۆتىڭ اتسالىسۋىمەن «قازاقستان تەمىر جولى» ۇلتتىق كومپانياسى» اكتسيونەرلىك قوعامىمەن كەلىسىم جاسالىپ، لوگيستيكا ماسەلەسى شەشىلگەنى بەلگىلى. «Nur Otan» پارتياسىنىڭ تۇركىستان وبلىستىق فيليالى دا اتالعان اكتسيونەرلىك قوعامىنا حات جولداپ، قولداۋىنا يە بولدى. اۋماقتاعى فيليالدار يگى ىسكە جۇمىلدىرىلدى. وسى ارقىلى ورداباسى اۋدانىنىڭ جاناشىر ازاماتتارى، بەلسەندى تۇرعىندارى ۇسىنعان كومەك ماڭعىستاۋ وبلىسىنا جىبەرىلىپ وتىر.
«Nur Otan» پارتياسى ورداباسى اۋداندىق فيليالى توراعاسىنىڭ ءبىرىنشى ورىنباسارى الياسقار بەردىمۇراتتىڭ ايتۋىنشا، ورداباسى اۋدانى اكىمدىگى مەن پارتيانىڭ جەرگىلىكتى فيليالى جەم-ءشوپ ماسەلەسىن باقىلاۋعا العان.
«بۇگىنگى يگى اكتسياعا اۋدان كولەمىندەگى «باتسۋ ۆودوكانال» جشس، «ورداباسى تاس» جشس، شارۋا قوجالىقتارى، اۋداندىق ءماسليحات دەپۋتاتتارى، «Nur Otan» فراكتسياسىنىڭ مۇشەلەرى، ەرىكتى ازاماتتار، اۋدان تۇرعىندارى ۇلەس قوستى. «Nur Otan» پارتياسىنىڭ وزگە اۋداندارداعى فراكتسيا مۇشەلەرى دە ءوز اۋىلدارىندا يگى ىسكە ۇلەس قوسىپ جاتىر. ءبىز – ماڭعىستاۋ جۇرتىمەن بىرگەمىز!»، – دەيدى ءا.بەردىمۇرات.
«ءشوپ جيناۋ ءۇشىن اۋدان بويىنشا 5 بەكەت ۇيىمداستىرىلىپ، 5 مىڭ باۋدان استام ءشوپ جينالدى. جالپى ورداباسى اۋدانىندا مال ازىعى جەتكىلىكتى دەڭگەيدە. بىراق جىلداعىداي بىتىك ءشوپ بولماۋىنا بايلانىستى اۋدان اكىمى باعلان باتىرشاەۆتىڭ باستاماسىمەن ءاربىر اۋىل وكرۋگتەرىندە مال ازىعىن جيناۋ بەكەتتەرى اشىلدى. ول جەرگە جەم-ءشوپ قورى جينالۋ ۇستىندە. وزەن بويىنداعى قامىستار دا ورىلۋدا. وسى قور ارقىلى قىستا الەۋمەتتىك از قامتىلعان، مال ازىعىن جيناۋعا شاماسى جوق، ەر-ازاماتتارى جوق وتباسىلارعا جەم-ءشوپ بەرىلەدى. اۋدان اكىمدىگى قىسقى ناۋقانعا دايىندىقتى باستاپ كەتتى»، – دەيدى ورداباسى اۋداندىق اۋىل شارۋاشىلىعى ءبولىمىنىڭ باسشىسى ءابىلدا الىبەكوۆ.
ءشوپتى جيناۋعا جانە ارتۋعا اۋداننىڭ ەرىكتىلەرى، بەلسەندى ازاماتتارى، جاسوتاندىقتار جانە وزگە دە وتانشىل جاندار كومەك كورسەتتى. بادام ستانساسىنان جولدانعان مال ازىعى ماڭعىستاۋ وبلىسىنىڭ شەتپە، قۇرىق جانە جەتىباي ستانسالارىنا جەتكىزىلەدى. ول جاقتا كومەكتى كۇتىپ الىپ، ۇلەستىرەتىن ازاماتتار بەكىتىلگەن.

ۇقساس جاڭالىقتار

Back to top button