مەملەكەت باسشىسى قۇربان ايت مەيرامىمەن قۇتتىقتادى

مەملەكەت باسشىسى قاسىم-جومارت توقاەۆ قۇربان ايت مەرەكەسىمەن قۇتتىقتادى، دەپ حابارلايدى اقوردانىڭ ءباسپاسوز قىزمەتى.

ارداقتى اعايىن! سىزدەردى كۇللى مۇسىلمان قاۋىمى ءۇشىن قاستەرلى قۇربان ايت مەرەكەسىمەن شىن جۇرەكتەن قۇتتىقتايمىن! بۇل – قايىرىمدىلىق پەن جاناشىرلىق، ىزگىلىك پەن يماندىلىق سياقتى اسىل قاسيەتتەردى دارىپتەيتىن ۇلىق مەيرام. سالت-داستۇرىمىزبەن بەرىك ۇشتاسقان اتا ءدىنىمىز – ەلدىڭ رۋحاني تۇتاستىعىن ساقتاۋعا ىقپال ەتەتىن باستى قۇندىلىقتىڭ ءبىرى. قۇربان ايت قاشاندا بارشا جۇرتتى بەرەكە-بىرلىككە ۇندەيدى. ەل ازاماتتارىن باۋىرمال بولۋعا شاقىرىپ، بۇكىل حالقىمىزدىڭ ىرىس-ىنتىماعىن ارتتىرادى. مۇسىلمان بالاسى بۇل كۇندەرى وتباسى اماندىعى مەن ەل تىنىشتىعى ءۇشىن قۇرباندىق شالىپ، جوق-جىتىككە كومەكتەسەدى، مۇقتاج جاندارعا قامقورلىق تانىتادى. وسىنداي ىزگى نيەت پەن ساۋاپتى ءىس ەل-جۇرتتىڭ ءبىر-بىرىمەن ەتەنە ارالاسۋىنا، ءوزارا سىيلاستىق پەن جاقسىلىققا جول اشادى. قۇربان ايتتىڭ ۇلاعاتى مەن ونەگەسى ءبىزدىڭ رۋحاني قۇندىلىقتارىمىزبەن ۇندەسەدى. بۇگىنگى مەرەكەنىڭ ءمان-ماڭىزى وسىندا دەپ بىلەمىن. شالعان قۇرباندىقتارىڭىز، دۇعا-تىلەكتەرىڭىز قابىل بولسىن! ايتتان ايتقا امان-ەسەن جەتە بەرەيىك!

ۇقساس جاڭالىقتار

Back to top button