ولەگ چۋگۋنكوۆ: قازاق ەلىندە تۋعان كەز كەلگەن ازامات قازاق ءتىلىن ءبىلۋى كەرەك

بۇگىندە «Nur Otan» پارتياسىنىڭ اۋماقتاعى فيليالىنىڭ وكىلدەرى ءتۇرلى اك­تسيالار مەن ءىس-شارالار وتكىزىپ، اپتا سايىن ەل ءىشىن ارالاپ، جۇرت­شى­لىقپەن كەزدەسۋلەر وتكىزىپ ءجۇر. حالىقتىڭ الەۋمەتتىك جاعدايىن، تۇرمىس سا­پاسىن جاقسارتۋعا باعىتتالعان باعدارلامالار دا وڭ ناتيجە بەرىپ جاتىر. وسى ورايدا شىعىس قازاقستان وبلىسى بويىنشا قانداي جۇمىس اتقارىلعانىن ءبىلۋ ماق­ساتىندا «Nur Otan» پارتياسى شقو فيليالى توراعاسىنىڭ ءبىرىنشى ورىن­باسارى ولەگ چۋگۋنكوۆتى اڭگىمەگە تارتقان ەدىك.

– «Nur Otan» پارتياسىنىڭ 2025 جىلعا دەيىنگى سايلاۋالدى باعدارلاماسىندا حا­لىقتىڭ ءال-اۋقاتىن كوتەرىپ، مەملەكەتتىڭ دامۋىن جەدەلدەتۋگە بايلانىستى ماڭىز­دى ماسەلەلەر قامتىلعان. شىعىس قازاق­ستان وبلىسىندا پارتيا باعدارلاماسى قالاي ورىندالىپ وتىر؟ ەلدەگى ەڭ نەگىزگى ءما­سەلە – تۇرعىنداردىڭ باسپانالى بولۋى، ازاماتتاردى جۇمىسپەن قامتۋ. وسى سالا بويىنشا قانداي شارۋالار ات­قارىل­دى؟
– جالپى، «Nur Otan» پارتياسىنىڭ شىعىس قا­زاقستان وبلىسى بويىنشا سايلاۋالدى باع­دار­لاماسىن ىسكە اسىرۋ جونىندەگى جول كار­تا­سىنا 182 ءىس-شارا ەنگىزىلىپ، 24 نىسانالى ين­دي­كاتور ايقىندالدى. الداعى بەس جىل ىشىندە 2،5 مىڭ شاقىرىم اۆتوجول مەن 12 كوپىرگە ورتاشا جوندەۋ جۇرگىزىلىپ، 400-دەن استام تۇرعىن ءۇي سالىنادى. سونداي-اق بۇقارالىق سپورت­تى قولداۋ ماقساتىندا 11 دەنەشى­نىق­تىرۋ-ساۋىقتىرۋ كەشەنى جانە 6 سپورت ءمودۋلى سا­لىنباق. سونداي-اق 2025 جىلعا دەيىن وبلى­سى­مىزدىڭ تۇرعىندارى تازا اۋىزسۋمەن تو­لىقتاي قامتىلادى. سونىمەن قاتار ساي­لاۋال­دى باعدارلامادا ءبىلىم، دەنساۋلىق ساقتاۋ، جاڭا جۇمىس ورىندارىن اشۋ، باسپانامەن قام­تا­ما­سىز ەتۋ ماسەلەلەرى تولىقتاي قامتىلعان. ات­قارىل­عان شارۋالاردى سۇراساڭىز، سەمەي قا­لا­سىندا يادرولىق مەديتسينا ورتالىعى، ريد­دەردە قاتتى تۇرمىستىق قالدىقتاردى سۇرىپ­تاۋ جانە قايتا وڭدەۋ بويىنشا تسەح، شەمو­نايحا اۋدانىندا رۋليحا اۋىلىندا ءسۇت-تاۋار فەرماسى پايدالانۋعا بەرىلدى. وسكەمەندە 2 بالا­باقشا اشىلدى. بۇدان باسقا كوپبالالى وت­باسىلاردى تۇرعىن ۇيمەن قامتاماسىز ەتۋ ماسەلەسى دە نازاردان تىس قالعان جوق. 2017 جى­لى 485 وتباسى باسپانالى بولسا، بىلتىر بۇل كورسەتكىش بەس ەسەگە ارتىپ، 2 536 وتباسى قو­نىس تويىن تويلادى. بيىل جەكە ينۆەس­تور­لاردىڭ كومەگىمەن وبلىس اۋماعىندا 191 تۇر­عىن ءۇي سالۋ جوسپارلانىپ وتىر. وسىلايشا ءوڭىرى­مىزدە ەڭ وزەكتى سانالاتىن باسپانا ماسە­لە­سىنىڭ شەشىلۋىنە بار كۇشىمىزدى سالىپ جا­تىر­مىز.
– رەسپۋبليكا بويىنشا پارتيا ءوز قۇرامىن ءبىرشاما جاڭارتىپ، قوعامداعى وزەكتى ماسەلەنى شەشۋگە ىقپال ەتەتىن ماڭىز­دى جوسپارلار قۇردى. وڭىردەگى پار­تيا قۇرامى قانشالىقتى جاڭاردى؟
– شىعىس قازاقستان وبلىسى بويىنشا پراي­مەريزگە 1 054 ادام قاتىستى. ناتيجەسىندە پار­تيالىق تىزىمگە 542 كانديدات ەندى. وبلىس بويىن­شا «Nur Otan» پارتياسىنىڭ جاڭادان ساي­لانعان دەپۋتاتتىق فراكتسياسى 243 دەپۋ­تاتتان تۇرادى، بۇل دەپۋتاتتاردىڭ جالپى سا­نىنىڭ 83،8 پايىزى. پارتيا باسشىلىعى مەن مەملەكەت باسشىسى قويعان مىندەتتەردى تو­­لىعىمەن ورىندادىق دەپ ايتا الامىن، ءويت­كەنى سايلانعان دەپۋتاتتاردىڭ 30 پايىز­دان استامى – ايەلدەر، ال 20 پايىزى – 35 جاسقا دەيىن­گى جاستار.
ايتا كەتەرلىگى، پارتيانى قايتا جاڭعىرتۋ با­عىتىنداعى تاپسىرماسىنا سايكەس، اۋماقتىق في­ليالدار، باستاۋىش پارتيا ۇيىمدارى پار­تيانىڭ جۇمىسىن جەتىلدىرۋ بويىنشا ۇلكەن جۇمىس اتقاردى. پارتيادان 35 مىڭعا جۋىق مۇشە شىعارىلىپ، پرايمەريز كەزىندە پارتيا قاتارى باسقا بەلسەندى تۇلعالارمەن تولىقتى.
تاعى ءبىر ماڭىزدى جايت، پرەزيدەنتتىڭ «حا­لىق ۇنىنە قۇلاق اساتىن مەملەكەت» تۇجى­رىم­داماسىن باسشىلىققا الا وتىرىپ، دەپۋ­تات­تىق فراكتسيالاردىڭ، سايلانبالى جانە كون­سۋلتاتيۆتىك-كەڭەسشى ورگانداردىڭ جۇمىس تاسىلدەرى مەن ادىستەرىن تۇبەگەيلى وزگەرتىپ، «ار­دا­گەرلەردى ارداقتايىق»، «كەدەرگىسىز كەلە­شەك»، «قۇتتى مەكەن»، «باقىتتى وتباسى» جانە «جاستار – وتانعا» پارتيالىق جوبالارىنا تىڭ سەرپىن بەردىك. جاھاندى جايلاعان پاندە­ميا كەزىندە پارتيا ءبىرىنشى بولىپ قيىن جاع­دايعا تاپ بولعان تۇرعىندارعا كومەك قولىن سوز­دى. BIRGEMIZ رەسپۋبليكالىق اكتسياسى ايا­سىندا كومەككە مۇقتاج جاندارعا، اتاپ ايت­ساق، مۇمكىندىگى شەكتەۋلى جاندارعا، سول كىسىلەرگە قارايلاسىپ وتىرعان وتباسىلارعا، اتا-اناسىنان ايىرىلعان بالالارعا، كوپ­با­لالى جانە از قامتىلعان وتباسىلارعا، تىل ەڭبەك­كەر­لەرىنە، جالعىز تۇراتىن قارتتارعا 50 000 تەڭگە كولە­مىندە قارجىلاي كومەك كورسەتىلدى.
– «Nur Otan» پارتياسى جانىنداعى «Jas Otan» جاستار قاناتى – ەلىمىزدەگى جاس­تار­دىڭ باسىن قوساتىن بىردەن-ءبىر ساياسي كۇش. شىعىس جاستارىنىڭ ساياسي بەلسەندىلىگىن ارتتىرىپ، ەلدىڭ ەرتەڭى ءۇشىن جۇمىلۋىنا پارتيا قانداي مۇمكىندىكتەر جاساپ وتىر؟
– ءيا، دۇرىس ايتاسىز. جاستارمەن جۇمىس – پارتيالىق جۇمىستىڭ باسىم باعىتتارىنىڭ ءبىرى. پرەزيدەنت قاسىم-جومارت توقاەۆ «تاۋەل­سىز­دىك بارىنەن قىمبات» اتتى ماقالاسىندا جاس­تاردىڭ بولاشاقتا اتقارار ءرولىن، مەم­لە­كەت ءۇشىن ماڭىزى وراسان ەكەنىنە باسا ءمان بەر­گەن بولاتىن.
ءبىز وسكەلەڭ ۇرپاقتىڭ جاسامپازدىق الەۋە­تىن دۇرىس ارناعا باعىتتاپ، ونى ءتيىمدى پاي­دا­لانا ءبىلۋىمىز كەرەك. قازىر «Jas Otan» جاستار قا­­ناتىنىڭ قاتارىندا 8،5 مىڭ جاس بار. وب­لىس­قا قاراستى ءار قالا مەن اۋداندا جاستاردى قولداۋ جونىندەگى قوعامدىق كەڭەس قۇرىلعان. بۇل كەڭەستەردىڭ جۇمىسىنا ءماسليحات دەپۋ­تات­تارى، ستۋدەنتتەر، بيزنەس-قۇرىلىمداردىڭ، ازا­­­ماتتىق سەكتوردىڭ وكىلدەرى اتسالىسادى. وعان قوسا، وڭىردە جاس دەپۋتاتتار كورپۋسى ينس­تيتۋتى قۇرىلدى. ونىڭ قۇرامىنا 53 جاس كىردى (ونىڭ ىشىندە 5-ەۋى – وبلىستىق ءماسلي­حات­تىڭ، 13-ءى – قالالىق، 35-ءى – اۋداندىق ءماس­لي­حات دەپۋتاتتارى). تاعى ءبىر ايتا كەتەرلىگى، وسى جىلدىڭ ءساۋىر ايىندا «Nur Otan» پارتياسى شىعىس قازاقستان وبلىستىق فيليالىنىڭ جانىنان «جاستاردى قولداۋ جونىندەگى وڭىرلىك كەڭەس» قۇرىلدى. كەڭەستىڭ ماقساتى – قوعامدا جاستاردى تولعاندىراتىن وزەكتى ماسەلەلەردىڭ شە­شىمىن تابۋعا تىرىسۋ، پارتيانىڭ ساي­لاۋالدى باعدارلاماسىنداعى جوسپارعا سايكەس، جاستاردى جۇمىسقا ورنالاستىرۋ، ساپالى بىلىممەن، باسپانامەن قامتاماسىز ەتۋ. مۇنىڭ بارلىعى جۋىردا بەكىتىلگەن «Jas Otan» جاستار قاناتىنىڭ «جاستار – وتانعا» جول كارتاسى ار­قىلى ىسكە اسىرىلاتىن بولادى.
– بيىل قازاقستان تاۋەلسىزدىگىنە – 30 جىل. قازاقستاندا ءتۇرلى ەتنوس وكىلدەرى تاتۋ-ءتاتتى ءومىر ءسۇرىپ جاتىر. ءسىزدىڭ مەم­لەكەتتىك تىلدە ەركىن سويلەيتىنىڭىزدى بىلە­مىز. وسى ورايدا قازاق ءتىلىن قالاي مەڭ­گەر­گەنىڭىزدى اڭگىمەلەپ بەرسەڭىز؟ جالپى، ءسىز­دىڭ ويىڭىزشا مەملەكەتتىك ءتىلدى ۇيرەنۋگە ءبىزدىڭ ەلدە جاعداي جاسالعان با؟
– مەن شىعىس قازاقستان وبلىسى ءۇرجار اۋ­دا­نىنىڭ جاربۇلاق اۋىلىندا دۇنيەگە كەل­دىم. بالا كۇنىمنەن قازاق بالالارمەن بىرگە وي­ناپ، بىرگە ءجۇردىم. ءوزىم تۋىپ-وسكەن جار­بۇلاق ورتا مەكتەبىندە قازاق تىلىندە وقىدىم. جوعارى وقۋ ورنىن دا قازاق توبىندا، ناق­تىراق ايتسام، قازاق ءتىلى مەن قازاق ادەبيەتى ءپا­نى­نىڭ مۇعالىمى ماماندىعى بويىنشا وقىپ ءبى­تىر­دىم. ەڭبەك جولىمدى سەمەي قالاسىنداعى №32 مەكتەپتەن باستاپ، سوسىن وسكەمەن قا­لاسىنداعى №38 مەكتەپتە قازاق ءتىلى مەن قازاق ادە­بيەتى پانىنەن ساباق بەردىم.
بار ايتارىم، قازاق ەلىندە تۋعان كەز كەلگەن ازا­مات قازاق ءتىلىن ءبىلۋى كەرەك. قازىر كوپ ۇلت­تان تۇراتىن تاۋەلسىز ەلىمىزدە قاي ءتىلدى مەن­گەرە­مىن دەسە دە، ەش كەدەرگى جوق. جاستاردىڭ كوزى اشىق، كوكىرەگى وياۋ بولۋى ءۇشىن مەملەكەت بارىن­شا قولداۋ كورسەتىپ جاتىر. ەڭ باستىسى، قازاقستان ازاماتىنىڭ ءتىل ۇيرەنۋگە دەگەن نيە­تى بولۋى كەرەك، نيەت بولسا مەملەكەتتىك ءتىل­دى مەڭگەرۋدىڭ ەش قيىندىعى جوق.

سۇحباتتاسقان
بەيبىت توقتارباي

Back to top button