Алматы тауларынан табылған қыз жансақтау бөлімінде жатыр

Бұл туралы қалалық қоғамдық денсаулық сақтау басқармасы мәлімдеді. Таудан табылған Әлия Қамиева төтенше жағдайлар кызметінің бригадасымен №7 қалалық клиникалық ауруханасының қабылдау бөліміне жеткізілді.

«Реанимацияда мультидисциплинарлық топ жан-жақты тексеріп қарады, барлық қажетті зертханалық-диагностикалық зерттеуді жүргізілді. Түскен кездегі жағдайы ауыр, сөйлей алмайды. Әрі қарай бақылау және емдеу үшін анестезиология, қарқынды терапия және реанимация бөлімшесіне жатқызылды», – деп хабарлады Алматы қоғамдық денсаулық сақтау басқармасы.

Бұған дейін, турист қызды таудан түсіру үшін тікұшақ жіберілген болатын.

Еске салайық, 31 жастағы Әлия Қамиева 5 шілдеде үйінен шығып кетіп, қайтып оралмаған. Оның анасы 7 шілде күні құтқарушыларға жүгінді. Куәгерлер алматылық қызды соңғы рет Үлкен Алматы көлінің маңынан көрген. Іздестіру-құтқару жұмысына құтқарушылар қатысып, барлық күш-құрал жіберілді: республикалық жедел-құтқару жасағының қызметкерлері, «109» құтқару қызметі, 75 волонтер атсалысты.

Back to top button