− Советқали Қамаубайұлы, жұрттың бәріне болмаса да біразына мемлекет мүддесін қорғайтындардың алғы шебінде салқын ақыл мен сергек ойдың адамдары саналатын дипломаттардың жүретіні белгілі. Сондықтан әңгімені бүгінде орныққан, толысып жетілген қазақ дипломатиясының тарихынан бастасақ. − Тәуелсіздіктен бұрынғы кезең туралы айтсақ, ІІ дүниежүзілік соғыстан кейін Біріккен Ұлттар Ұйымы құрылғанда КСРО-ның сол кездегі басшысы И.Сталин 15 одақтас республиканың бәрін БҰҰ-ға мүше қылғысы келді. Соған дайындалып, Қазақстан Сыртқы істер министрлігінің штаты да, тұрған жері − бәрі кеңейтілген болатын. Одан бұрын, 1944 жылғы ақпанда «Кеңестік республикаларға сыртқы қатынастар саласында өкілеттілік ұсыну туралы және осыған байланысты Сыртқы істер халық комиссариатын жалпыкеңестіктен кеңестік-республикалық Халық комиссариатына қайта құру туралы» КСРО заңы қабылданғаннан кейін одақтас республикаларда Сыртқы істер министрі лауазымы пайда болған-ды. Заң бойынша сол тұста барлық одақтас республикалардың шетелдермен тікелей қарым-қатынас жасауға құқығы болса да, барлық негізгі сыртқы саяси функцияларды КСРО Сыртқы істер министрлігі атқарды. Осылайша, 1944-1974 жылдарда республикамыздағы Сыртқы істер министрінің міндетін Қазақ КСР Министрлер кеңесі төрағасының орынбасарлары қоса атқарды. Алғашқы министр (ол кезде бұл лауазым Қазақ КСР Сыртқы істер халық комиссары деп аталатын) болып Төлеген Тәжібаев тағайындалды. Бірақ АҚШ пен Батыс елдері қарсы болғаны себепті КСРО-ның ұсынысы өтпей, соғыс кезінде зардап шеккен Ресей Федерациясы мен Украина, Беларусь ғана БҰҰ-ға мүше болып, өзге республикаларға ондай құқық берілмей қалды. Дегенмен елімізде бұл ведомство сақталып, 1944-1991 жылдар аралығында Төлеген Тәжібаев (үш рет), Қайырғали Байғалиев, Асқар Закарин, Өтешқали Атамбаев, Әди Шәріпов, Балжан Бөлтірікова, Мәлік Фазылов, Мүсілім Базарбаев, Михаил Есенәлиев, Ақмарал Арыстанбекова секілді белгілі тұлғалар Қазақ КСР Сыртқы істер министрі лауазымын атқарды. Бұлардың арасында төрт адам (А.Закарин, Ө.Атамбаев, Ә.Шәріпов, Б.Бөлтірікова) Сыртқы істер министрі қызметін Қазақ КСР Министрлер кеңесі төрағасының орынбасары лауазымымен қоса алып жүрді. − Өзіңіз дипломатия саласына кеңестік дәуірде келген екенсіз... − 1958 жылы Балқаш қаласында орта мектепті бітірген соң, білім қуып Алматыға келдім. Өзі ауыр жұмыстың қиындығын көрген соң, мені де қиналмасын деп ойлаған шығар, анам мұғалім болғанымды қалайтын. Ал мен Шет тілдер институтына барғым келеді. Дегенмен анамның қалауын жасап, ҚазПИ-дің физика-математика факультетіне құжатымды тапсырғаныммен, бір емтиханнан сүрініп, оқуға түсе алмадым. Келесі жылы жүрек қалауым болған Алматы педагогикалық Шет тілдер институтының неміс тілі факультетіне ешбір кедергісіз, барлық сыннан жеңіл өтіп, студент қатарына қосылдым. 1964 жылы институтты бітірген соң мені сонда оқытушылыққа қалдырды. 1966 жылы өміріме үлкен бетбұрыс әкелген бір оқиға болды: сол кезде ГДР Орталық партия комитетінің Герхард Науман деген жауапты қызметкерінің бірі Қазақстанға Жастар ұйымы жұмысымен танысуға келген-ді. Институтта сабақ беріп тұрған жерімнен ректор шақыртып алып, тездетіп Қазақстан ЛКСМ Орталық комитетінің бірінші хатшысы Өзбекәлі Жәнібековке баруым керегін айтты. Сөйтіп, Өзбекәлі ағамыздың қалауымен бір апта бойы Науманның қасында аудармашы болдым. Қызметім ол кісіге ұнаса керек, жоғары жаққа мен туралы жағымды пікір айтыпты. Содан 1967 жылы ҚазКСР Сыртқы істер министрлігіне қызметке өттім. Ол кезде министріміз осындай жоғары дәрежеге өз білім-білігімен жеткен Балжан Бөлтірікова еді. Байсалды, салмақты кісі. Кез келген мәселені шешуде батыл, өткір шешім қабылдайтын. Ол тұста Сыртқы істер министрлігі қазіргідей аса айбарлы мекеме емес, 10-12 адам жұмыс істейтін шағын құрам. Көбіне консулдық, протоколдық жұмыстар жүргізеді, сол сияқты сырттан келген түрлі делегацияны қабылдап, шығарып салу қызметін атқарады. Алғашқы жұмысым консулдық-құқықтық сұрақтар бөлімінде басталды. Өз міндетімді уақытында ойдағыдай орындап жүрдім. Жоғарыда айтқандай, бастығымыз – Балжан Бөлтірікова. ҚазКСР Министрлер кеңесі төрағасының орынбасары ретінде Қазақстанның бүкіл әлеуметтік, білім, мәдениет, ғылым, спорт, идеология саласына басшылық жасайтын ол кісі бір күні мені өзіне көмекші етіп алғысы келетінін айтты. Басында ол ұсынысты қобалжумен қабылдасам да, Балжан Бөлтірікқызы өзі қолдаған соң жұмысты игеріп кеттім. Сөйтіп, бұл қызметті 1973 жылға дейін атқардым. Одан соң білім саласына кетіп, 1992 жылға дейін сонда жұмыс істедім. − Тәуелсіз Қазақстанның Сыртқы істер министрлігі құрылған кезде соның негізін қалағандардың қатарында болдыңыз. Жаңа қазақ дипломатиялық құрылымы қалай пайда болды? − 1991 жылы КСРО тарап, еліміз тәуелсіздікке қол жеткізді. Жер қойнауы қазынаға толы болғанымен, әлемге танымал емес жас мемлекеттің халықаралық беделін көтеріп, экономикалық жағынан дамуы үшін өзге елдермен алыс-беріске негізделген келіссөздер жасау қажеттігі туды. Міне, осы кезде елдің сыртқы саясатын Қазақстанның Тұңғыш Президенті Нұрсұлтан Назарбаевтың ұстанған саясатына сай жүргізу үшін сауатты да күшті ведомство құру күн тәртібінде тұрды. Өйткені жас мемлекеттің аяғынан тік тұрып, дүниежүзіндегі дамушы, дамыған мемлекеттерімен тең дәрежеде тұрып сөйлесуі үшін сыртқы саясаттың мықты болуы қажет екені белгілі. Бірақ бұл оңай жұмыс емес-ті. Жаңадан құрылғалы жатқан Сыртқы істер министрлігі бұған дейінгі ведомстводан 20 есе үлкен болатын. Бұрын бұл ведомствоның штаттық құрамы 15 адам болса, енді сол кездегі жоба бойынша Сыртқы істер министрлігінің орталық аппаратында 300-ден аса, шетелдегі өкілдіктер мен елшіліктерде 400-ден аса маман, кадрлар жұмыс істеуі тиіс еді. Ал ол кезде Сыртқы істер министрлігі құрылған бойда жоғары дәрежеде жұмыс істеп кете беретін мамандар тапшы болатын. Бірақ бұл дипломатия саласында қазақтар жоқ дегенді білдірмейді, кеңестік кезде олар болды және әрқайсысы әр жақта жүрді. Сыртқы саясатты жүзеге асыратын басты тұлға дипломаттар болғандықтан, кәсіби қазақ дипломатиясын жасақтау да ең маңызды жұмыс. Сондықтан Сыртқы істер министрлігіне халықаралық қатынастар мамандарын тауып, елшілерге іріктеу жүргізу қажет еді. Оның үстіне сол тұста елімізде дипломат мамандар дайындайтын оқу орны жоқ болатын. Міне, осылардың бәрін қысқа уақыт ішінде шешу керек. Сол кезде Елбасымыз Нұрсұлтан Әбішұлының өзі бұл мәселені тікелей қадағалап, әлемнің түрлі елдерінде дипломатиялық қызметте жүрген қазақ азаматтарын тәуелсіз Отанымызға қызмет етуге шақырды. Ол нәтижелі іс болды. Сол шақырумен келгендер арасында дипломатия саласында ысылған, мол тәжірибеге ие 12 маман қазақ болды. Еліміздің Сыртқы істер министрлігінің негізін қалаған бұл тұлғалардың бәрінің де тәуелсіз қазақ дипломатиясы тарихында лайықты орындары бар. Азат Қазақстанның тұңғыш Сыртқы істер министрі болып Төлеутай Сүлейменов тағайындалды. Ол 1977-1980 жылдары КСРО Сыртқы істер министрлігі Дипломатиялық академиясының тыңдаушысы, одан соң КСРО Орта Шығыс елдері бөлімінің бірінші хатшысы, 1981-1985 жылдары Ауғанстандағы КСРО Бас өкілдігінің Мазари-Шариф қаласындағы консулы, 1985-1988 жылдары КСРО Сыртқы істер министрлігінің Орта Шығыс елдері бөлімінің кеңесшісі, 1988-1991 жылдары Ирандағы КСРО елшілігінің кеңесшісі қызметін атқарған еді. Осылайша, кеңестік дипломатияның сынынан өткен Төлеутай Ысқақұлы аз уақыттың ішінде өз маңына дипломат мамандарды шоғырландырып, жас тәуелсіз мемлекетті шетелдерге таныстырып, келелі келіссөз жүргізуде өте үлкен жұмыс атқарды. 1994 жылы Қазақстанның АҚШ-тағы елшісі болса, кейін Венгрия, Бельгия, Польша мемлекеттерінде елшілік қызметте болды. Қазақстан Республикасы Сыртқы істер министрінің бірінші орынбасары болып тағайындалған Сәлім Құрманғожин Алматы педагогикалық Шет тілдер институтынан соң, КСРО Сыртқы істер министрлігінің Жоғары дипломатия мектебін бітіріп, ҚазКСР Сыртқы істер министрлігінде екінші, бірінші хатшы, соңынан 1963-1967 жылдары Біріккен Араб Республикасындағы КСРО елшілігінің 3-хатшысы, 1967-1973 жылдары КСРО Сыртқы істер министрлігінде жауапты қызметкер, 1973-1978 жылдары КСРО-ның Стамбұл қаласындағы консулы, 1978-1984 жылдары КСРО Сыртқы істер министрлігі Бас хатшылығының кеңесшісі, 1984-1989 жылдары Эфиопиядағы КСРО елшілігінің кеңесшісі, 1989-1992 жылдарда КСРО Сыртқы істер министрлігі елшіліктермен жұмыс ісінің сарапшысы болған. Тәуелсіз Қазақстанның Сыртқы істер министрінің бірінші орынбасары лауазымынан соң еліміздің Венгриядағы елшісі болды. КСРО Сыртқы істер министрлігі Мәскеу мемлекеттік халықаралық қатынастар институтын бітірген соң 1975 жылы КСРО Сыртқы істер министрлігіне жұмысқа кірісіп, Сингапур Республикасындағы кеңестік елшілікте жұмыс істеген, 1984-1985 жылдары КСРО Сыртқы істер министрлігінде қызметте болған, 1991 жылға кейін Пекиндегі кеңестік елшілікте екінші хатшы, бірінші хатшы және кеңесші лауазымдарын атқарған Қасым-Жомарт Тоқаев тұңғыш Қазақстан Республикасы Сыртқы істер министрінің орынбасары болып тағайындалды. 1993 жылы Сыртқы істер министрінің бірінші орынбасары және 1994 жылы Қазақстанның Сыртқы істер министрі болып тағайындалды. Сыртқы істер министрі лауазымында 10 жыл еңбек еткен (1994-1999, 2002-2007) Қасым-Жомарт Кемелұлы әлемде ядролық қаруды таратпау ісіне белсене қатысып, үлкен еңбек сіңірді. Қазақстанның ядролық қарудан өз еркімен бас тартуы ‒ халықаралық саясатта Қазақстанның атын шығарған аса маңызды дипломатиялық жетістік еді. Қазақстанның екінші Президенті Қасым-Жомарт Тоқаев халықаралық саясатта да аса ірі дипломатиялық қызмет атқарған ірі тұлға. Оның посткеңестік елдер арасында алғаш рет 2011 жылғы 12 наурыз бен 2013 жылғы 16 қазан аралығында БҰҰ бас хатшысының орынбасары және БҰҰ бас хатшысының Қарусыздану жөніндегі конференциядағы жеке өкілі рангіндегі БҰҰ Женевадағы бөлімшесінің бас директоры қызметін атқаруы ‒ қазақ халқы үшін үлкен жетістік. Түрлі елдердің жоғары дәрежелі атақтарының иесі Қасым-Жомарт Кемелұлы халықаралық қатынастар мәселелері бойынша көптеген мақаланың және 9 кітаптың авторы. Бұдан басқа Қазақстан Сыртқы істер министрлігі құрылуында зор еңбегі бар Меңжан Ғиззатов, Ибрагим Аманғалиев, Болат Нұрғалиев, Қайрат Исағалиев, Қайыр Омаров, Нұрлан Дәненов секілді дипломаттардың атын құрметпен атай кеткен дұрыс. − Тәуелсіз Қазақстанның шетелдердегі алғашқы елшіліктері қалай ашылды және алғашқы елшілеріміз кімдер болды? − 1992 жылғы 2 шілдеде Қазақстанның Тұңғыш Президенті Нұрсұлтан Назарбаев «ҚР Сыртқы істер министрлігі туралы», «Қазақстан Республикасының елшілігі туралы» және «ҚР Төтенше және өкілетті елшісінің негізгі міндеттері мен құқықтары туралы» ережелерді бекіту жөніндегі Жарлыққа қол қойған соң, Елбасының осы Жарлықтарын басшылыққа ала отырып, шетелдерде Қазақстанның елшіліктері мен өкілеттіктерін құру ісі басталды. Шынын айту керек, шетелдердегі елшіліктерді ашу көптеген қиындықтарды жеңуі керек еді. Тіпті, ол кезде Қазақстанмен қарым-қатынас жасағысы келетін кез келген елде елшілік ашуға мүмкіндік жоқ еді. Өйткені бұрын Қазақстанның өзінің дербес елшіліктері болмаған соң алғашқы кезекте елшілікке керекті ғимарат, елшілік қызметкерлері тұратын үй, олардың балаларын балабақша мен мектепке орналастыру, отбасына жағдай жасау, елшілік қызметкерлеріне арналған автокөліктердің болуы секілді мәселелер бар. Ол кезде мұның бәрін шешу өте қиын болды. Дипломатиялық дәрежең АҚШ, Ұлыбритания, Франция, Ресей, Қытай секілді әлемнің алпауыт елдерімен бірдей болуы үшін жаңағы мәселелердің бәрін шешу керек, ал оның бәрі қаражатқа тірелетін. Енді ғана тәуелсіздігін алып жатқан Қазақстанда қаржы тапшылығы болды. Солай болса да тәуелсіздіктің алғашқы екі жылында шетелдерде Қазақстанның 17 елшілігі ашылды. Елшілікті құр ашып қоя алмайсың, оның атқаратын миссиясы үлкен. Онда саясаттан бастап сан-салалы айналысу қажет болатындықтан, бұған сай білікті маман кадрлар керек. Сол үшін шетелдерге елші болып баратын адамдардың білім-білігі мен шаруашылық, экономикалық жұмыстардағы тәжірибесі терең сараптаудан өтіп, елімізде басшы қызметтерде болған тұлғалар мен зиялы қауым өкілдері іріктелді. Ал алғашқы елшілерге келетін болсақ, Түркияға сол кезде Мәскеудегі КСРО Министрлер кеңесіндегі Қазақстанның тұрақты өкілі болып тұрған Қанат Саудабаев, Ресей Федерациясына Шымкент облыстық советінің төрағасы Виктор Темірбаев, Германия Федерациясына Талдықорған облыстық советінің төрағасы Сағымбек Тұрсынов, Францияға Экономика министрі Тілеухан Қабдрахманов, Бельгияға Қазақстан Республикасы Сауда-өнеркәсіптік Палатасы президиумының төрағасы (кейіннен НАТО жанындағы Қазақстан Республикасы өкілдігінің басшысы) Әуесхан Қырбасов, АҚШ-қа КСРО-ның Канададағы елшілігінің экономика жөніндегі кеңесшісі Әлім Жанбуршин, Италияға ақын, қоғам қайраткері Олжас Сүлейменов, Қырғызстанға ақын, қоғам қайраткері Мұхтар Шаханов, Өзбекстанға Сыртқы істер министрінің орынбасары болған Сайлау Батыршаұлы, Қытайға шығыстанушы ғалым Мұрат Әуезов, Қазақстанның Біріккен Ұлттар Ұйымындағы өкілдігінің басшылығына ҚазКСР-де соңғы Сыртқы істер министрі қызметін атқарған Ақмарал Арыстанбекова тағайындалды. Екінші лекте Ұлыбритания корольдігіне қоғам қайраткері, әкімшілік қызметте мол тәжірибесі бар Нұртай Әбіқаев, Үндістанға Мұхаметжан Исаев, Венгрияға Сәлім Құрманғожин, Пәкістанға Қазақстан Жоғарғы Сотының Төрағасы Тамас Айтмұхамедов, Әзербайжанға Ибрагим Аманғалиев елші болып тағайындалды. Міне, бұлар тәуелсіз еліміздің дипломатиясының алғашқы қарлығаштары еді. Мұның бәрі еліміздің сол кездегі сыртқы саясатының қалыптасуы мен дамуының алғашқы кезеңіне сәйкес келген және өзін-өзі ақтаған тағайындау болды. Ел дипломатиясын қалыптастыруда Елбасының таңдауы түскен бұл азаматтардың бәрінің де мемлекет тарихында орны бар деп білемін. − Тәуелсіздік дәуірінде де дипломатиялық қызметте болғаныңызды білеміз, қандай қызметтер атқардыңыз? − 1992 жылы аудандық оқу бөлімінің меңгерушісі болып жүрген жерімде Алматыдан Сыртқы істер министрлігінен қоңырау соғып, «Кадр бөліміненбіз. Министрлікке маман кадрларды іріктеу жұмыстары жүріп жатыр, келіп конкурсқа қатыссаңыз болады» деп хабарласты. Жаңадан құрылып жатқан Қазақстан Сыртқы істер министрлігі бұрынғы кадрларды іздестіріп жатқан болса керек, құжаттарымды тапсырып, еш кедергісіз қызметке қабылдандым. Министрліктегі алғашқы қызметім консулдық басқарманың Азия елдері бойынша бөлім меңгерушілігі болды. 1993 жылы Үндістанға консул етіп тағайындалдым. Сол қызметте жүргенімде Қазақстанның Сыртқы істер министрі болып тағайындалған Қасым-Жомарт Тоқаев мені елге шақырып алып, Сыртқы істер министрлігінің Кадр жөніндегі басқармасының бастығы етіп тағайындады. 1997 жылы Прага қаласында ашылған Қазақстан өкілдігінің басшысы болып тағайындалып, бұл қызметті 2002 жылға дейін атқардым. Сол жылы басшылық мені Моңғолияға Сенімді өкіл етіп жіберіп, бұл қызметті 2007 жылға дейін атқардым. − Қазіргі қазақ дипломатиясы туралы не дер едіңіз? − Қазіргі қазақ дипломатиясы кемеліне келген дипломатия деп сеніммен айта аламын. Осыдан 29 жыл бұрын еліміздің әлемнің 17 елінде ғана елшілігі мен консулдығы болса, қазір олардың саны 70-тен асады. Бүгінде Қазақстан өз тәуелсіздігін мойындаған 170-тен аса елдермен жан-жақты белсенді қарым-қатынас орнатқан. Мұның бәрі жас мемлекет үшін үлкен жетістік. Бүгінгі Қазақстанның Президенті Қасым-Жомарт Тоқаев дипломатия саласының үлкен тұлғалы өкілі, әлемге танымал беделді саясаткерінің бірі. Сондықтан біздің еліміздің сыртқы саясатта әлемнің барлық елмен терезесі тең. Елімізде дипломатия жүйесі қалыптасқан, дипломаттарды дайындайтын арнаулы оқу орындары бар. Сөзімді қорыта келе айтарым, қазақ дипломатиясы әлемде еліміздің беделін биіктетуге зор еңбек сіңірді және ол тәуелсіз еліміздің дүниежүзінде қуатты елдердің қатарына қосылуына үлкен ықпал етті. − Әңгімеңізге рақмет!
Сұхбаттасқан Ахмет ӨМІРЗАҚ