زاڭعا تۇزەتۋ: بالا وتىرعان كولىكتە شىلىم شەككەندەر ايىپپۇل تولەيدى

ەندى ۋچاسكەلىك پوليتسەيلەر بالالار وتىرعان كولىك سالونىندا شىلىم شەككەن تۇرعىندارعا ءوز بەتىنشە ايىپپۇل سالا الادى. پارلامەنت سەناتى اكىمشىلىك قۇقىق بۇزۋشىلىق تۋرالى كودەكسكە ەنگىزىلەتىن تۇزەتۋلەردى قابىلدادى.

زاڭ جوباسىندا قۇقىقبۇزۋشىلىقتاردىڭ ءتورت ءتۇرىن قاراۋ جانە جازا قولدانۋ بويىنشا ۋچاسكەلىك ينسپەكتورلاردىڭ وكىلەتتىكتەرى كەڭەيتىلەدى:

  • كامەلەتكە تولماعانداردىڭ تۇنگى ۋاقىتتا ويىن-ساۋىق مەكەمەلەرىندە ءجۇرۋى;
  • كولىك قۇرالدارىندا كامەلەتكە تولماعان بالالار وتىرعان جاعدايدا تەمەكى ونىمدەرىن تۇتىنۋعا تىيىم سالۋ ەرەجەلەرىن بۇزۋ;
  • باس بوستاندىعىنان ايىرۋ ورىندارىنان بوساتىلعان ادامنىڭ اكىمشىلىك باقىلاۋ ەرەجەلەرىن نەمەسە وعان قاتىستى سوت بەلگىلەگەن شەكتەۋلەردى ورىنداماۋى;
  • كولىك قۇرالدارىنىڭ قوزعالىسىنا قاساقانا كەدەرگى جاساۋ.

«كولىك قوزعالىسىنا كەدەرگى جاساۋ بويىنشا بىلتىر 23 500 ادام جاۋاپقا تارتىلىپ، اكىمشىلىك حاتتاما تولتىرىلىپ، 2020 جىلى ويىن-ساۋىق مەكەمەلەرىندە مىڭعا جۋىق كامەلەتكە تولماعان بالا انىقتالدى. بيىل 400-گە جۋىق حاتتاما تولتىرىلدى. قازىر ىشكى ىستەر ورگانى باسشىسىنىڭ ورنىنا بۇل قۇزىرەت ۋچاسكەلىك پوليتسيا ينسپەكتورلارىنا بەرىلەدى»، – دەدى سەناتور لۋكين پالاتا وتىرىسىندا.

قولدانىستاعى حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكسكە سايكەس، قازاقستاندا تەمەكى ونىمدەرىن، قىزدىرىلاتىن تەمەكىسى بار ونىمدەردى، كاليانعا ارنالعان تەمەكىنى، كاليان قوسپاسىن، تەمەكىنى قىزدىرۋعا ارنالعان جۇيەلەردى، ەلەكترون تۇتىنۋ جۇيەلەرىن كولىكتە كامەلەتكە تولماعان بالالار وتىرعان كەزدە قولدانۋعا تىيىم سالىنادى. ول ءۇشىن 15 اەك مولشەرىندە ايىپپۇل سالىنادى.

ۇقساس جاڭالىقتار

Back to top button