شەتەلدىك ازاماتتار مەن ەتنيكالىق قازاقتاردىڭ زاڭدىق ستاتۋسى ناقتى بەلگىلەنۋى قاجەت

وتكەن ايدا قازاقستانداعى شەتەل ازاماتتارى ەل اۋماعىندا ءجۇرىپ-تۇرۋ قۇقىعىن بايلانىستى  قازاقستان ۇقك شەكارا قىزمەتىنىڭ شەكارالىق باقىلاۋ دەپارتامەنتى باسشىسىنىڭ ورىنباسارى مۇڭداش موللاشەۆ مالىمدەمە جاساعان بولاتىن.

– 2021 جىلعى 5 ماۋسىمدا شەتەل ازاماتتارىنىڭ قازاقستان اۋماعىندا ۋاقىتشا ءجۇرۋ مەرزىمى اياقتالادى. اتالعان مەرزىم ۆەدومستۆوارالىق كوميسسيانىڭ (ۆاك) 2020 جىلعى 29 جەلتوقسانداعى شەشىمىمەن پاندەمياعا بايلانىستى ۇزارتىلعان بولاتىن. قازىرگى ۋاقىتتا قازاقستان رەسپۋبليكاسىنىڭ مەملەكەتتىك شەكاراسى ارقىلى قۇرلىقتاعى جانە اۆياتسيالىق وتكىزۋ بەكەتتەرى شتاتتىق رەجيمدە جۇمىس ىستەيدى. سونداي-اق، بۇگىندە 15 مەملەكەتپەن تۇراقتى اۋە قاتىناسى قايتا جاڭارتىلدى، – دەگەن ەدى مۇڭداش موللاشەۆ اتالعان ۆەدومستۆودا وتكەن ءباسپاسوز ءماسليحاتىندا.

دۇنيەجۇزى قازاقتارنىڭ قاۋىمداستىعىنا موڭعوليادان كەلگەن ءبىر توپ قانداسىمىز وسى ماسەلەگە بايلانىستى ارىز-تىلەكتەرىن ايتتى.

– شەتەل ازاماتتارى رەتىندە بۇدان بۇرىن ءارتۇرلى ماقساتتا قازاقستانعا كەلىپ-كەتىپ جۇردىك. الايدا 2020 جىلى پاندەمياعا بايلانىستى مونعوليا اراسىنداعى شەكارا جابىلىپ، ول جاققا قايتا الماي قالدىق. وسى جاعدايعا بايلانىستى نۇر-سۇلتان قالاسىنداعى كوشى-قون پوليتسياسى العاشقىدا بىزگە 2021 جىلى 5 ماۋسىمعا دەيىن قازاقستاندا تۇرۋعا رۇقسات بەرگەن. ال قازىر اتالعان مەكەمە وكىلدەرى ايىپپۇل تولەپ، 15 كۇننەن كەيىن ەلدەن شىعۋدى تالاپ ەتىپ وتىر. ءبىزدىڭ «شەكارا جابىق، قالاي كەتەمىز؟» دەگەن ۋاجىمىزگە: «ۇشاق ارقىلى شىعىڭدار» دەيدى، الايدا رەيستەر تىم از جانە قىمبات بولعاندىقتان ۇشاق بيلەتىن الۋعا مۇمكىندىگىمىز جوق. ىقتيارحات الۋعا قۇجات تاپسىرايىق دەسەك، كورسەتىلگەن مەرزىم ءوتىپ كەتكەن دەپ قۇجاتىمىزدى قابىلدامايدى. ەگەر اكىمشىلىك جاۋاپكەرشىلىككە تارتىلعان جاعدايدا كەلەشەكتە قازاقستانعا كەلۋگە جانە ازاماتتىق الۋعا ۇلكەن كەدەرگى بولماقشى. وسىنداي جاعداي تاعى ءبىراز قانداستاردىڭ باسىندا تۋىنداپ وتىر، – دەيدى قانداستارىمىز.

بۇل ماسەلەگە بايلانىستى دۇنيەجۇزى قازاقتارى قاۋىمداستىعىنىڭ وكىلى قارلىعىش بەكپاتشاقىزى: «بۇگىنگى بىزگە كەلگەن موڭعوليالىق قانداستاردىڭ بۇل ماسەلەدە ەش كىناسى جوق. قازىر موڭعوليانىڭ شەكاراسى اشىلدى. بىراق وعان ءبىزدىڭ ەلدىڭ شەكارسى ءالى تولىق اشىلعان جوق. ورتادا رەسەي شەكاراسى جانە بار. ۇشاقپەن جۇرتتىڭ ءبارى كەتە المايدى. بىرىنشىدەن، رەيس از. ەكىنشىدەن، ۇشاق بايان-ولگەي ايماعىنا ەمەس، ۇلانباتىرعا قانادى. بۇل – قانداستار ءۇشىن كوپ شىعىن. سوندىقتان شەتەلدىك ازاماتتار مەن ەتنيكالىق قازاقتاردىڭ زاڭدىق ستاتۋسىن ناقتى بەلگىلەمەي، قانداستاردىڭ مۇنداي ماسەلەسى كۇردەلەنە بەرەدى. ويتكەنى، ەلىمىزدە جۇرگەن شەتەلدىكتەردىڭ ءبىر بولىگى ءوزىمىزدىڭ قارا كوز قانداستارىمىز»، – دەيدى.

ال قانداستاردىڭ ايتۋىنشا، نۇر-سۇلتان قالاسىنان باسقا وڭىرلەردەگى كوشى-قون مەكەمەلەرى قانداستارعا ارى قاراي تۇرۋعا رۇقسات بەرىپ، ۆيزالارىن ۇزارتىپ، ىقتيارحاتقا دا قۇجاتتارىن قابىلداپ جاتقان كورىنەدى. وسىعان وراي «ءبىزدىڭ سۇرايتىنىمىز، ىقتيارحات الۋ جولدارىن قاراستىرىپ نەمەسە ۆيزانىڭ ۋاقىتىن سوزىپ بەرۋگە ۇكىمەتتەن جەڭىلدىك بولسا»، – دەيدى ولار.

ادىلەت مەيرامبەكوۆ

Back to top button