ۇلكەن كونتسەرت وتەدى: نيۋ-يوركتە پاندەميا تامىزدا اياقتالادى

الەمدە كوروناۆيرۋس پاندەمياسىنىڭ ناقتى اياقتالۋ كۇنىن بولجاۋ قيىن، دەگەنمەن نيۋ-يورك بيلىگى تامىز ايىندا اياقتالادى دەپ وتىر. ءدال سول كەزدە مەر بيلل دە بلازيو ورتالىق ساياباقتا مەگاپوليستىڭ قالىپتى ومىرگە ورالۋىنا بايلانىستى كونتسەرت وتكىزۋدى ۇسىندى، – دەپ جازدى Reuters اگەنتتىگى.

ۆاكتسينا العانداردىڭ سانى ءوسىپ، ۆيرۋس ازايىپ كەلە جاتىر. سوعان بايلانىستى نيۋ-يورك بيلىگى قالادا جاندى مۋزىكامەن ءىس-شارا وتكىزۋدى ۇيعاردى. ءىس-شارا ءبىر اپتاعا جالعاسادى دەپ كۇتىلۋدە.

«بۇل نيۋ-يورك ءۇشىن تاڭعاجايىپ، ۇمىتىلماس اپتا بولادى»، – دەدى قالا اكىمى ءباسپاسوز ءماسليحاتىندا.

دە بلازيو كونتسەرتتىڭ ناقتى كۇنىن، سونداي-اق وندا ونەر كورسەتەتىندەردىڭ ءتىزىمىن ءالى جاريالاعان جوق. دەگەنمەن New York Times بۇل ءىس-شارا 21 تامىزدا ورتالىق ساياباقتا وتكىزىلەدى دەپ جوسپارلانعانىن مالىمدەدى.

بارلىق جۇلدىز ونەر كورسەتەتىن ۇلكەن ءىس-شارانى مۋزىكا يندۋسترياسىنىڭ اتى اڭىزعا اينالعان مايتالمانى كلايۆ دەۆيس جۇرگىزەدى.

تايمس كونتسەرتتە ۆاكتسينا العان جانە ۆاكتسينا الماعان كورەرمەندەرگە دە ورىن بەرىلەتىنىن جانە بيلەتتەردىڭ شامامەن 70%-ى ۆاكتسينا العان مۋزىكا اۋەسقويلارىنا ساتىلاتىنىن ايتتى.

ايتا كەتۋ كەرەك، كوشەلەر، مەيرامحانالار مەن ساياباقتاردا قايتا تىرشىلىك لەبى سەزىلەدى. Covid-19 سالدارىنان ۇزاق ايلار بويى ءبارى قاڭىراپ قالعان ەدى.

دۇيسەنبىدە دە بلازيونىڭ ايتۋىنشا، نيۋ-يوركتە پاندەميا باستالعاننان بەرى پتر تەستىلەرىنىڭ ەڭ تومەنگى دەڭگەيى تىركەلدى – 0،71%. قالادا شامامەن 4،5 ميلليون ادام كوروناۆيرۋس ۆاكتسيناسىنىڭ كەم دەگەندە ءبىر دوزاسىن الدى.

نيۋ-يورك گۋبەرناتورى ەندريۋ كۋومو دۇيسەنبىدە جەكە ءباسپاسوز ءماسليحاتىندا شتات COVID-19-عا قاتىستى قالعان شەكتەۋلەردىڭ كوپشىلىگىن الىپ تاستايدى دەدى. بۇل كەزدە تۇرعىنداردىڭ 70%-ى ۆاكتسينانىڭ كەم دەگەندە ءبىر دوزاسىن الۋى ءتيىس، بۇل قازىرگى دەڭگەيدەن 1،4% -عا از.

ۇقساس جاڭالىقتار

Back to top button