ۇزدىك زاڭگەرلەر Nur Otan الاڭىندا تەگىن كەڭەس بەرەدى

«Nur Otan» پارتياسى رەسپۋبليكالىق ادۆوكاتتار القاسىمەن جانە قازاقستان زاڭگەرلەر وداعىمەن ىنتىماقتاستىق تۋرالى مەموراندۋمدار جاساستى.

سوڭعى 5 جىلدا «Nur Otan»-عا 1،2 ملن. ادام وتىنىشپەن جۇگىنسە، بيىل جىل باسىنان بەرى ەلىمىز بويىنشا قوعامدىق قابىلداۋ بولمەلەرىنە 74،1 مىڭنان استام ءوتىنىش ءتۇستى. بۇل حالىقتىڭ پارتياعا دەگەن سەنىمىن كورسەتىپ، ادامداردىڭ ماسەلەلەرىن شەشۋدە مەملەكەتكە ناقتى كومەكتەسىپ وتىرعانىن ايعاقتايدى.

پارتيانىڭ رەسپۋبليكالىق قوعامدىق قابىلداۋ بولمەسىنىڭ باسشىسى ءاليا سادىرباەۆانىڭ پىكىرىنشە، ازاماتتاردان كەلىپ تۇسەتىن وتىنىشتەردىڭ باسىم بولىگى ولاردىڭ ءوز قۇقىقتارىن بىلمەۋىندە جاتىر.

«وكىنىشكە قاراي، جەرگىلىكتى شەنەۋنىكتەر كوبىنەسە ازاماتتاردىڭ وتىنىشتەرىنىڭ مانىسىنە بارا بەرمەي، قۇرعاق جاۋاپ بەرۋمەن اينالىسىپ، ءتىپتى، ءىستىڭ ءمانىن تۇسىنۋگە دە تىرىسپايدى. ماسەلەن، جەرگىلىكتى بيۋروكراتتاردىڭ «ارقاسىندا» وبلىستا شەشىلۋى ءتيىس ماسەلەلەر رەسپۋبليكالىق دەڭگەيگە، ياعني مينيسترلىكتەر مەن ۆەدومستۆولارعا دەيىن شىعادى. ەگەر ازاماتتار ءوز قۇقىقتارىن بىلەتىن بولسا، ولار ورتالىق ورگانداردىڭ تابالدىرىعىن توزدىرۋعا كۇشىن، جۇيكەسى مەن قاراجاتىن جۇمساماي، ءوز اۋدانىندا، قالاسىندا پروبلەمالاردى شەشۋگە قول جەتكىزە الار ەدى»، – دەدى ءاليا سادىرباەۆا.

ول وتىنىشتەردى تالداۋ نەگىزىندە پارتيانىڭ رەسپۋبليكالىق ادۆوكاتتار القاسىمەن جانە قازاقستاننىڭ زاڭگەرلەر وداعىمەن ىنتىماقتاستىق تۋرالى مەموراندۋمدار جاساعانىن اتاپ ءوتتى.

«رەسپۋبليكالىق قوعامدىق قابىلداۋ بولمەسىنىڭ الاڭىندا ەلىمىزدىڭ ۇزدىك ادۆوكاتتارى مەن زاڭگەرلەرى تەگىن قابىلداۋ جۇرگىزەدى. كۇن سايىن، دۇيسەنبىدەن بەيسەنبىگە دەيىن ەلىمىزدىڭ كەز كەلگەن ازاماتى ءارتۇرلى ماسەلەلەر بويىنشا زاڭگەرلىك كەڭەس الا الادى. ازاماتتاردىڭ اسا مۇقتاج ساناتتارى ءۇشىن ءتىپتى تەگىن زاڭدى سۇيەمەلدەۋ جانە سوتتا وكىلدىك ەتۋ مۇمكىندىگى دە قاراستىرىلعان.

قازىرگىدەي نارىقتىق كەزەڭدە ادۆوكاتتىق كەڭسەنىڭ قاراپايىم ءوتىنىشتى جازىپ بەرۋىنىڭ ءوزى كوپ قاراجاتتى تالاپ ەتەدى. وسىنداي جاعدايدا بۇل – «Nur Otan» پارتياسىنىڭ ناقتى ىستەرىنىڭ ءبىرى. ءبىز مۇنىمەن توقتاپ قالمايمىز، ماقتانبايمىز جانە ەرەكشە العىس تا كۇتپەيمىز. تەك ءوز جۇمىسىمىزدى اتقارامىز. وتانداستارىمىزدىڭ ءومىرى جايلى جانە ەش قيىندىقسىز بولعانىن قالايمىز»، – دەپ اتاپ ءوتتى قوعامدىق قابىلداۋ بولمەسىنىڭ باسشىسى.

كەڭەس الۋعا جازىلۋ ءۇشىن Call-ورتالىققا: 8 800 080 4441 (قازاقستان بويىنشا قوڭىراۋ شالۋ تەگىن) نومىرىنە تەلەفون شالۋ نەمەسە WhatsApp-قا: 87008004441 ءنومىرى ارقىلى جازۋعا بولادى.

ۇقساس جاڭالىقتار

Back to top button