Alga Peterburg: الەم جۇلدىزدارى ديماشقا قاراپ بوي تۇزەيدى
وسىدان ءۇش جىل بۇرىن ديماش قۇدايبەرگەننىڭ ونەرىنە ءتانتى بولعان سانكت-پەتەربۋرگ تۇرعىندارىYouTube پلاتفورماسىنداعى «ەحو پەتەربۋرگا» كانالىندا ول تۋرالى اقپارات بەرە باستادى. كەيىننەن ديماشتىڭ ءومىرى مەن ونەرى تۋرالى كوپ دەرەك بەرۋ ءۇشىن ولار Alga Peterburg كانالىن اشتى. باستاپقىدا تەك ديماشتىڭ شىعارماشىلىعىنا ارنالعان بۇل كانالدا بۇگىندە قازاقستان، قازاق مادەنيەتى مەن سالت-ءداستۇرلەرى تۋرالى سۇحباتتار، رەپورتاجدار، فيلمدەر كوپتەپ جۇكتەلەدى. قازىر تۇركىستان قالاسىنىڭ جاڭارۋى تۋرالى فيلم ازىرلەۋگە كىرىسىپ كەتكەن پەتەربۋرگتىك شىعارماشىلىق توپقا حابارلاسىپ، اڭگىمەلەسكەن ەدىك.
Túrkistan: العاشىندا سىزدەر ءجۇرگىزگەن «ەحو پەتەربۋرگا» كانالىنىڭ اتاۋىن Alga Peterburg دەپ ديماشتىڭ شىعارماشىلىعىمەن تانىسقان سوڭ وزگەرتتىڭىزدەر مە، الدە جاڭادان كانال اشتىڭىزدار ما؟
Alga Peterburg: جاڭا كانال اشتىق. نەگىزىنەن ءبىز سپورتپەن بەلسەندى تۇردە شۇعىلدانىپ، سپورت مەكتەپتەرىمەن تىعىز بايلانىس ورناتىپ، ءتىپتى جەكە كوماندا قۇردىق. ءسويتىپ ءجۇرگەندە ديماش تۋرالى ەستىپ-ءبىلىپ، ونىڭ شىعارماشىلىعىمەن تانىسا باستادىق. فەنومەن رەتىندە تانىلعان ونىڭ ونەرىنىڭ ادامدارعا نەلىكتەن ەرەكشە اسەر ەتەتىنىن ءبىلگىمىز كەلدى. ونەرىنەن بولەك، ونىڭ ساحنادا ءوزىن-ءوزى ۇستاۋىنا، اشىق-جارقىن مىنەزىنە، ءۇلكەندەردى سىيلاۋىنا، كىشىلەرگە قۇرمەت كورسەتۋىنە وتە-موتە ءتانتى بولدىق. ءسويتىپ، تانىستارىمىزدان، دوستارىمىزدان، سپورتشىلاردان ول تۋرالى سۇراي باستاعانىمىزدا ديماشتى ەشكىم بىلمەيتىن بولىپ شىقتى. سوسىن ول تۋرالى دەرەكتەر جيناستىرۋدى ءجون كوردىك. وسىلايشا، 2018 جىلدىڭ كۇزىندە ديماش دەگەن جاڭا الەم اشتىق. شىنى كەرەك، ول ۋاقىتتا ديماش تۋرالى مالىمەتتەر از بولدى. جوعارىدا ءسىز ايتىپ وتكەن «ەحو پەتەربۋرگا» كانالى ارقىلى ديماش پەن ونىڭ شىعارماشىلىعى تۋرالى اقپارات بەرە باستادىق. تاعى ءبىر تۇرتكى بولعان جايت، ديماش «نوۆايا ۆولنا» حالىقارالىق بايقاۋىندا «ليۋبوۆ ۋستاۆشيح لەبەدەي» ءانىن جان-تانىمەن بەرىلىپ ايتىپ شىقسا دا، زالدا وتىرعان كورەرمەننىڭ رەاكتسياسى، ولاردىڭ جىم-جىرت بولىپ وتىرۋى بىزگە ۇنامادى. ءسويتىپ، ديماشتىڭ سول كونتسەرتتەگى كەرەمەت ورىنداۋى مەن ونىڭ ونەرىنە تاڭدانعان كورەرمەننىڭ رەاكتسياسى تۇسىرىلگەن ۆيدەونى قوسىپ، فان-كليپ جاساپ شىعاردىق. وعان دەيىن مۇنداي ۆيدەونى قالاي جاسايتىنىن دا بىلمەيتىنبىز.ءتىپتى، YouTube-تىڭ ءتىلىن تولىق تۇسىنبەيتىن ەدىك. سول روليك 80 ميلليوننان استام مارتە كورىلدى. بىراق كەيىننەن ول كانال بۇعاتتالىپ قالدى. ايتا كەتەرلىك جايت، ديماش تۋرالى كانال جۇرگىزە باستاعان سوڭ، ونىڭ الەمنىڭ تۇكپىر-تۇكپىرىندەگى جانكۇيەرلەرىمەن بايلانىس ورناتىپ، ارالاسا باستادىق. ديماشتىڭ كومەگىمەن گەوگرافيالىق ءبىلىمىمىزدى جاقسارتىپ الدىق دەسەك تە بولادى. سول شەتەلدىك جانكۇيەرلەرگە ديماش تۋرالى اعىلشىن جانە يسپان تىلىندە حابار تاراتاتىن Echo Pitera كانالىن اشقان بولاتىنبىز. ەكى كانالدى دامىتۋ ءۇشىن تىنباي جۇمىس ىستەدىك. الايدا 2020 جىلدىڭ باسىندا تانىمال ەكى كانالدىڭ ەكەۋى دە جابىلىپ قالدى. ءسويتىپ، اقىلداسا كەلە سول جىلدىڭ ناۋرىز ايىندا Alga Peterburg كانالىن اشتىق.
Túrkistan: ادەتتە ديماشتىڭ جانكۇيەرلەرى اۋديتوريا جيناۋ ءۇشىن YouTube-تاعى كانال اتاۋىنا ونىڭ ەسىمىن نەمەسە Dears ءسوزىن قوسقاندى قۇپ سانايدى. ال سىزدەر ديماشتىڭ شىعارماشىلىعى ءۇشىن اشقان كانالدى نەلىكتەن Alga Peterburg دەپ اتادىڭىزدار؟
Alga Peterburg: بىلتىر ءبىزدى ۇنەمى قولداپ جۇرەتىن جازىلۋشىلارعا YouTube-تا ديماش تۋرالى جاڭا كانال اشاتىنىمىزدى ايتىپ، كانالدى قالاي اتاساق بولادى دەپ اقىل-كەڭەس سۇراعان بولاتىنبىز. ولار ۇسىنعان كوپ نۇسقانىڭ ىشىنەن «العا» ءسوزى ەرەكشە ۇنادى. وعان دەيىن ءساتتى جۇرگىزىپ كەلە جاتقان ەكى كانالدى جاۋىپ تاستاسا دا، الەۋەتىمىز ارتىپ، كۇشىمىز تاسىپ تۇرعان كەزدە «العا» دەپ ءوزىمىزدى قامشىلاپ، جۇمىستى ارى قاراي جالعاستىرۋ كەرەك دەپ شەشتىك. نەگىزى، كانالدىڭ اتاۋىندا ديماشتىڭ ەسىمى بولماسا دا، جانكۇيەرلەر ءبىزدى وڭاي تاۋىپ الا الادى. YouTube-تا تەك اتاۋ بويىنشا ەمەس، باسقا جولمەن اۋديتوريا جيناۋعا بولاتىن سيقىرلى تەتىكتەر بار. ەگەر كانال اتاۋىنا ديماشتىڭ ەسىمىن قوسساق، كورەرمەن ءبىزدى تەك فان-پاراقشا رەتىندە قابىلدايتىن ەدى. ال ءبىز فان-پاراقشا ەمەس، ءۇش ادامنان قۇرالعان، ديماشتى جان-جاقتى تانىتۋ ءۇشىن قىرۋار جۇمىس اتقارىپ جۇرگەن شىعارماشىلىق توپپىز.
Túrkistan: كانالدىڭ سيپاتتاماسىندا «ءبىز تەك ديماش تۋرالى ايتاتىن بولامىز» دەلىنگەن. بىراق ديماشتان وزگە قازاقستاندىق انشىلەر، ارتىستەر ءارى قازاق مادەنيەتى، سالت-داستۇرلەرى تۋرالى دا كوپ كونتەنت ازىرلەپ جۇرسىزدەر. مۇنىڭ بارلىعىن قامتۋعا ديماشتىڭ شىعارماشىلىعى تۇرتكى بولدى ما؟
Alga Peterburg: ادەپكىدە Alga Peterburg-ءتى تەك ديماشتىڭ شىعارماشىلىعىنا ارنايمىز دەپ ويلاعانبىز. ديماش پاندەمياعا دەيىن Arnau الەمدىك تۋرنە اياسىندا كوپ كونتسەرت قويىپ، ءتۇرلى ءىس-شارالارعا قاتىستى. ديماشتىڭ شىعارماشىلىعىنداعى ورلەۋ سول كەزەڭ بولدى. ءتىپتى، ءىس-شارالاردىڭ كوپتىگىنەن كانالعا ماتەريالدار جاريالاپ ۇلگەرمەي قالىپ جۇردىك. پاندەميا باستالعان سوڭ، الەم انشىلەرى سەكىلدى ديماشتىڭ دا بارلىق جوسپارى كەيىنگە شەگەرىلىپ، شىعارماشىلىعىندا ءۇزىلىس بولدى. ال سول ۋاقىتتا ءبىزدىڭ الەۋەتىمىزدىڭ مول بولعانى سونشالىق، اقىرىندا ءوز-ءوزىمىزدى «توقتاتا» الماي، كانالعا قازاق ءمادەنيەتى مەن ونەرىنە قاتىستى وزگە قىزىقتى ماتەريالدار ازىرلەپ سالعىمىز كەلدى. ءسويتىپ، قازاقستاننىڭ مادەنيەتىن، جاس ونەرپازداردى، اسىرەسە ەرجان ماقسىم مەن دانەليا تولەشوۆانىڭ ءومىرى مەن شىعارماشىلىعىن زەرتتەي باستادىق. كەيىننەن بۇل قاتارعا يمانبەكتى قوستىق. وسى زەرتتەۋلەردەن قازاقتىڭ جاس ونەرپازدارىنىڭ الەم انشىلەرىنە ساحنادا ءوزىن-ءوزى قالاي ۇستاۋ كەرەك جاعىنان عانا ەمەس، سونداي-اق، قالاي ەڭبەكتەنۋ، دىتتەگەن ماقساتقا قالاي جەتۋ كەرەك ماسەلەسى بويىنشا دا ۇلگى كورسەتىپ ءجۇرگەنىن بايقادىق. جالپى، باستاپقىدا ءۋادەلەسكەندەي شىعارىلىمداردا ءدىن، ۇلت، ساياسات تۋرالى ءسوز قوزعامايمىز. Alga Peterburg – ءمادەني كانال، ماقساتىمىز – اقپاراتتى ءمادەنيەت پريزماسى ارقىلى تاراتۋ. ءا دەگەندە ديماشتىڭ شىعارماشىلىعىنا قىزىقتىق، كەيىننەن ديماش ارقىلى قازاق مادەنيەتىن تانىپ-بىلۋگە قىزىعۋشىلىق پايدا بولدى. سوسىن بۇل كەرەمەت ءمادەنيەت جايىندا ءبىز عانا ءبىلىپ قويماي، الەم جۇرتشىلىعى ءبىلۋى كەرەك دەگەن وي تۇيدىك. وعان قوسا، كوپتەگەن دەرەكتەن حاباردار بولا باستاعان سوڭ، قازاقستان مادەنيەتىن الەمگە تانىتا الاتىنىمىزعا، وعان بىلگەن-تۇيگەنىمىز، الەۋەتىمىز جەتەتىنىنە كوز جەتكىزدىك. ديماش جۇرگەن جەرىندە ءوز مادەنيەتىن، ادەت-عۇرپىن اركەز ناسيحاتتاپ جۇرەدى. ديماش سەكىلدى قازاق مادەنيەتىن الەمگە تانىتۋ از دا بولسا ءبىزدىڭ دە قولىمىزدان كەلىپ جاتقان سەكىلدى. ءبىز مۇنى يگى ءىس دەپ بىلەمىز. ويتكەنى وزگە ۇلتتىڭ مادەنيەتىمەن تانىس بولساڭ، ءناسىلى، ءدىلى، دىنىنە قاراماستان ادامدى تەز ءتۇسىنەسىڭ، وڭاي ءتىل تابىساسىڭ. ديماش وسىعان كوزىمىزدى جەتكىزدىك. نەگىزى، وسى كانالدى ءجۇرگىزگەلى بەرى كوپ نارسەنى تۇسىندىك، تۇيدىك، ەسەيدىك. نۇر-سۇلتان قالاسىندا وتكەن ديماشتىڭ كونتسەرتىنە بارعانىمىزدا جەرگىلىكتى جانكۇيەرلەر ۇيىمداستىرعان Nomad time دەگەن ءىس-شاراعا قاتىستىق. وندا قولونەرشىلەر مەن بۇركىتشىلەردىڭ ونەرىن، ۇلتتىق ويىنداردى تاماشالادىق. ۇلكەن كيىز ءۇي تىگىلدى. سونداي-اق، قازاقتىڭ ۇلتتىق تاعامدارىنان ءدام تاتتىق. كەرەمەت ۇيىمداستىرىلعان بۇل ءىس-شارادان اسەر العانىمىز سونشالىق، ءتىپتى ءالى كۇنگە دەيىن باۋىرساقتىڭ ءتىل ۇيىرگەن ءدامى ەسىمىزدەن كەتپەيدى. سول كەزدەسۋدە قازاق حالقىنىڭ قوناقجايلىعىنا ءتانتى بولعان ءبىز ءتىپتى جۇرگىزۋشىدەن ميكروفوندى «ج ۇلىپ» الماقشى بولىپ، بىزگە باۋىرمالدىق تانىتقان قازاق حالقىنا ىستىق لەبىزىمىزدى ءبىلدىرىپ، جىلى ءسوز ايتپاقشى بولدىق. ايتا كەتەرلىك جايت، Alga Peterburg كانالىنىڭ الپىس پايىزعا جۋىق جازىلۋشىسى – قازاق. دوستارىمىزدىڭ كوبى دە – قازاقتار. ءبىزدىڭ شىعارىلىمداردى قالت ءجىبەرمەي كورەتىن ولار ءبىزدى ارا-تۇرا تۇزەپ، اقىل-كەڭەس بەرىپ وتىرادى. سول سەبەپتى ولارمەن ءبىر وتباسىنىڭ مۇشەسى سەكىلدى ارالاساتىنىمىزعا شەكسىز ريزامىز.
Túrkistan: «دۋشا كازاحا، سەردتسە كازاحا – دومبىرا» دەگەن شىعارىلىمدا الماتىداعى مۋزەيلەردىڭ بىرىنەن رەپورتاج جاساپ، قازاقتىڭ ۇلتتىق اسپاپتارى، سونىڭ ىشىندە دومبىرا تۋرالى جاساعان زەرتتەۋلەرىڭىزدى جاريالادىڭىزدار. سوندا سول ءۇشىن الماتىعا ارنايى باردىڭىزدار ما، الدە؟
Alga Peterburg: نۇر-سۇلتاندا وتكەن كونتسەرتكە بارعاندا كوپتەگەن اداممەن بايلانىس ورناتتىق. سولاردىڭ ءبىرى مۋزەيدە قىزمەت ەتەدى ەكەن. ول كىسى الماتىعا كەلىپ، مۋزەي جايىندا رەپورتاج جاساۋدى ۇسىندى. ءبىر جىلدان سوڭ الماتىداعى شىعارماشىلىق توپتا جۇمىس ىستەيتىن دوستارىمىز مۋزەيدەگى اسپاپتار تۋرالى ۆيدەولار ءتۇسىرىپ بەردى. ءماتىنى مەن ءسۋبتيترىن ازىرلەپ، كانالعا جۇكتەدىك. تۇسىنگەنىمىزدەي، قازاقتىڭ سالت-ءداستۇرى بارلىق ادامزاتقا سايكەس كەلەتىن سەكىلدى. بارىنەن بۇرىن ءبىزدى وتباسى مادەنيەتى مەن تۇرمىس سالتى قاتتى تاڭعالدىردى. مەيلى قالادا بولسىن، اۋىلدا بولسىن، ۇلكەن جانۇيانىڭ ۇستەل باسىندا وتىرۋى، ۇلكەندەردىڭ داستارقان باسىندا كىمنىڭ قايدا وتىراتىنىن شەشۋى، داستارقانعا تاباقپەن ەت اكەلگەندە ءۇيدىڭ ۇلكەنىنىڭ ەتتى اركىمگە ءبولىپ بەرۋى ەرەكشە ۇنادى. ۇرپاقتان ۇرپاققا بەرىلىپ كەلە جاتقان بۇل داستۇرگە تاڭىرقاماۋ ءمۇمكىن ەمەس. مۇنداي ەرەكشە سالت-داستۇرلەردى زەرتتەۋدىڭ ءوزى قىزىقتى. سوسىن جەتى اتاعا دەيىن قىز الىسپاۋ سالتى بويىنشا زەرتتەۋ ءجۇرگىزدىك. سونىمەن قاتار، ديماش اتا-اجەسىنىڭ قولىندا وسكەندىكتەن، قازاقتاردىڭ تۇڭعىش نەمەرەنى اتا-اجەسىنىڭ تاربيەسىنە بەرۋ ماڭىزىن زەرتتەدىك. ءبىز تۇگىلى، ءتىپتى ديماشتىڭ كوپتەگەن شەتەلدىك جانكۇيەرلەرى دە مۇنىڭ ءمانىن ءوز بەتىنشە زەرتتەپتى. تۇسىنۋىمىزشە، قازاقتار ءبىرىنشى نەمەرەنى جاڭادان وتباسىن قۇرعان جاس اتا-اناعا وڭاي بولسىن دەپ ۇلكەندەردىڭ تاربيەسىنە بەرگەن.
Túrkistan: كانالدارىڭىزداعى ايدارلار اتاۋى ۇنەمى وزگەرىپ وتىراتىن سەكىلدى…
Alga Peterburg: نەگىزى، بىزدە وتىزعا جۋىق ايدار بار. ۋاقىت وتە كەلە كوزقاراس، قىزىعۋشىلىق وزگەرەدى، سول سەكىلدى ايدارلار دا ۇنەمى وزگەرىپ وتىرادى. «جاڭالىقتار» ايدارىندا ديماش پەن وزگە قازاقستاندىق ونەرپازدار تۋرالى جاڭالىقتار جاريالايمىز. ال «شولۋ» ايدارىندا ديماش فەنومەنىن زەرتتەيمىز. بۇدان بولەك، جوعارىدا ايتقانداي، قازاقتىڭ ونەرى، سالت-ءداستۇرى تۋرالى جاساعان ءوز زەرتتەۋلەرىمىزدى جاريالايمىز. سونداي-اق، ابايدىڭ 175 جىلدىعى قارساڭىندا اباي ءومىرىن ءجىتى زەرتتەگەن قاۋىمداستىقپەن بايلانىس ورناتىپ، كوپ مالىمەت بىلدىك. «كوزقاراس» ايدارىندا ديماشتىڭ اندەرىن تىڭداۋ كەزىندەگى تىڭداۋشىنىڭ رەاكتسيالارىن جاريالايمىز. ءوزىڭىز بىلەتىندەي، قازىر ديماشتىڭ ورىنداۋىنداعى انگە رەاكتسيا ءبىلدىرۋ ارقىلى تانىمال بولىپ جاتقاندار جەتەرلىك. اراسىندا از قارالىم جيناعاندارى دا بار. ولاردى دا الەم تانىسىن دەگەن ماقساتپەن ۆيدەولاردى بىرىكتىرىپ، جاريالاپ وتىردىق. ءتىپتى بۇل ۆيدەولار كوپكە دەيىن ترەنتدە بولدى. الايدا اۆتورلىق قۇقىق بويىنشا شەكتەۋلەرگە بايلانىستى ولاردىڭ سانىن قىسقارتۋعا تۋرا كەلەدى. «قوناق» ايدارىندا ديماشتىڭ شىعارماشىلىعىمەن تانىس تانىمال ادامدارمەن ونلاين سۇحبات جۇرگىزەمىز. مىسالى، قۇدايبەرگەنوۆتەر جانۇياسىنىڭ جاقىن دوسى، ول كەزدە اكادەميا رەكتورى قىزمەتىن اتقارعان اسحات ماەميروۆپەن، سونداي-اق، جۋرناليست دانا نۇرجىگىتپەن سۇحبات قۇردىق. سونداي-اق، ديماشتىڭ شىعارماشىلىعىمەن ەتەنە تانىس شەتەلدىكتەرمەن دە اڭگىمە-دۇكەن قۇردىق. مىسالى، ليۆاندا تۇراتىن كاسىبي مۋزىكانت حامدا فارحات ديماشتىڭ ورىنداۋىنداعى اندەردىڭ ادام دەنساۋلىعىنا وڭ اسەر ەتەتىنىن، ونىڭ اندەرى اۋرۋدى جازاتىنىن تۇسىندىرەدى. «Dears حيكايالارى» ايدارىندا الەمنىڭ ءار بۇرىشىنداعى ديماشتىڭ جانكۇيەرى ونىڭ شىعارماشىلىعىمەن تانىسقان سوڭ ءومىرىنىڭ قالاي وزگەرگەنىن باياندايدى. سونداي-اق، ونىمەن كەزدەسكەن ساتتەرىن باياندايدى. ءبىر جانكۇيەردىڭ ديماشقا مايكل دجەكسوننىڭ قولى قويىلعان كارتينا سىيلاعانى تۋرالى ايتقانى ەسىمىزدە. ال «رەپورتاج» ايدارىندا قازاقستاننىڭ قالالارى مەن سانكت-پەتەربۋرگتە وتكەن ءىس-شارالار جانە ديماشتىڭ كونتسەرتتەرى تۋرالى سيۋجەتتەر جاسايمىز. ۇلكەن سۇرانىسقا يە «العا ديماش» ايدارىندا كاسىبي انشىلەر مەن قاراپايىم جانكۇيەرلەردىڭ قاتىسۋىمەن ونلاين كونتسەرت ءوتكىزەمىز. كۇنى بۇگىنگە دەيىن ەكى ساعاتقا جالعاسقان التى كونتسەرت ۇيىمداستىردىق. ءار كونتسەرت سايىن قاتىسۋشىلار ءتىزىمىن ۇلعايتۋعا تىرىسامىز. الداعى ۋاقىتتا «ساياحات» ايدارىن اشقىمىز كەلەدى. قازاقستانعا تەك ديماشتىڭ كونتسەرتتەرىن تاماشالاۋعا بارىپ قايتپاي، قالالاردى كولىكپەن، موتوتسيكلمەن ارالاعىمىز كەلەدى. جۋىردا تۇركياعا بارىپ كەلدىك. وندا تۇراتىن قازاقتارمەن تانىسىپ، داستارقانداس بولدىق. بۇل كەرەمەت كەزدەسۋلەر جايىندا ازىرلەگەن روليكتەر كورەرمەننىڭ كوڭىلىنەن شىقتى. قازىر Alga Peterburg-تەن (115 000 جازىلۋشى) بولەك، ديماشتىڭ شەتەلدىك جانكۇيەرلەرىنە ارنالعان Echo Pitera (22 000 جازىلۋشى) كانالىن قايتا قالپىنا كەلتىردىك جانە ساياحات تۋرالى رەپورتاجدار جاريالايتىن «ەحو جيزني» كانالىن اشتىق.
Túrkistan: سانكت-پەتەربۋرگتە وتكەن كونتسەرتتە ديماشپەن كەزدەسە الدىڭىزدار ما؟ ديماش Alga Peterburg كانالى تۋرالى بىلە مە، قالاي ويلايسىزدار؟
Alga Peterburg: ديماش Alga Peterburg تۋرالى بىلەدى دەپ سەنەمىز. ال سانكت-پەتەربۋرگتە 2019 جىلعى 29 قاراشادا وتكەن كونتسەرت تۋرالى رەپورتاج ازىرلەگەنبىز. ديماشپەن كەزدەسە الماساق تا، وسىنداي قۋانىشتى بولىسەتىن دوستارىمىزدى، كونتسەرتكە كەلگەن جانكۇيەرلەردى شاقىرىپ، كەزدەسۋ ۇيىمداستىردىق. بۇل كەشكە جالپى سانى ءۇش جۇزدەي ادام كەلدى. ءتۇرلى بايقاۋلار وتكىزىپ، ءان ايتىپ، بي بيلەپ، كەرەمەت كوڭىل كوتەردىك. ەستەن كەتپەس كۇن بولدى. ال ديماشپەن مينسكىدە وتكەن ءىى ەۋروپالىق ويىنداردىڭ اشىلۋ سالتاناتىنان كەيىن كەزدەيسوق كەزدەسىپ قالدىق. ءبىز سول اشىلۋ سالتاناتىندا ءان شىرقايتىن ديماش تۋرالى رەپورتاج جاساۋ ءۇشىن ارنايى بارعان ەدىك. سول كەزدە ديماش سانكت-پەتەربۋرگ حالقىنا سالەم جولداپ، ىستىق لەبىزىن بىلدىرگەن بولاتىن.
Túrkistan: الداعى ۋاقىتتا كانالعا جازىلۋشىلار سانىن قازىرگىدەن بەتەر كوبەيتۋ ءۇشىن قانداي جوسپار قۇرىپ وتىرسىزدار؟
Alga Peterburg: قازىر بىزدە يدەيا كوپ، ءتيىسىنشە جوسپار دا وتە كوپ. جانكۇيەرلەر كۇن سايىن نەبىر قىزىقتى يدەيالار ۇسىنىپ، ويىمىزعا وي قوسىپ وتىرادى. جوسپارلارىمىز تۋرالى ءسوز ەتسەك، ماۋسىم ايىندا ءتۇركيانىڭ الانيا قالاسىندا اباي ەسكەرتكىشىنىڭ اشىلۋى تۋرالى رەپورتاج ازىرلەمەكشىمىز. وندا تۇراتىن قازاقتار ءبىزدى كۇتىپ الىپ، كومەكتەسۋگە نيەت تانىتىپ وتىر. سوسىن تۇركىستان قالاسىنىڭ جاڭارۋىنا قاتىستى فيلم ازىرلەۋگە كوشەمىز. قازىر بارلىق تۇركىتىلدەس حالىقتىڭ رۋحاني تۇرعىدا باسىن بىرىكتىرەتىن تۇركىستان تۋرالى زەرتتەۋلەر ءجۇرگىزىپ، دەرەكتەر جيناستىرىپ جاتىرمىز. سوسىن، البەتتە، پاندەميا تەزىرەك اياقتالىپ، ديماش گاسترولگە شىقسا ەكەن دەيمىز. سول كەزدە ءومىر باسقا ارناعا بۇرىلاتىنى انىق. وسى رەتتە ايتا كەتەتىن جايت، ديماش ادامدى وزگەرتەدى، اسىرەسە، بەدەلى جوعارى جۇلدىزداردىڭ مىنەز-ق ۇلىعىن وزگەرتەدى. قازىر بارلىعى ديماشقا قاراپ بوي تۇزەيدى. ونىڭ شىعارماشىلىعىمەن ەتەنە تانىسقان كەز كەلگەن ادامنىڭ جۇرەگى جىلىپ شىعا كەلەتىنى حاق. كانالىمىزدا قوناق بولاتىن ساراپشىلار ونىڭ شىرقاعان ءانىن تىڭداعان سوڭ، ادامداردىڭ مەيىرىمدى، راقىمشىل، قايىرىمدى بولا باستايتىنىن ءجيى ايتادى. جالپى، ديماشتىڭ شىعارماشىلىعىمەن تانىسقانعا دەيىنگى ءومىرىمىز بەن كەيىنگى ءومىرىمىزدىڭ اراسى جەر مەن كوكتەي. جالعىز ءبىز ەمەس، كوپشىلىك تە وسىلاي وزگەردى دەپ ويلايمىز. ءبىزدىڭ نەگىزگى ماقساتىمىزدىڭ ءبىرى – كوپشىلىككە ديماشتىڭ وسىنداي ەرەكشە قىرى تۋرالى ايتۋعا ءمۇمكىندىك بەرۋ.
اڭگىمەلەسكەن
ءاليا تىلەۋجانقىزى
