مەملەكەت باسشىسى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورىمەن ونلاين كەزدەسۋ وتكىزدى

مەملەكەت باسشىسى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋسپەن ۆيدەو كونفەرەنتسيا رەجيمىندە كەزدەسۋ وتكىزدى.

كەزدەسۋ بارىسىندا قازاقستان مەن دۇنيەجۇزىلىك دەنساۋلىق ساقتاۋ ۇيىمى اراسىنداعى، اتاپ ايتقاندا، كوروناۆيرۋس پاندەمياسىنا قارسى ءىس-قيمىل بويىنشا ىنتىماقتاستىقتى نىعايتۋدىڭ پەرسپەكتيۆالارى قاراستىرىلدى.

قاسىم-جومارت توقاەۆ قازاقستاننىڭ دۇنيەجۇزىلىك دەنساۋلىق ساقتاۋ ۇيىمىمەن اراداعى ىقپالداستىقتىڭ دەڭگەيىن جوعارى باعالادى. سونداي-اق تەدروس ادحانوم گەبرەيەسۋستىڭ دۇنيەجۇزىلىك دەنساۋلىق ساقتاۋ اسسامبلەياسىنىڭ اشىلۋىندا COVID-19 ىندەتىنە قارسى ۆاكتسينالاۋ جونىندەگى جاھاندىق كۇش-جىگەردى كۇشەيتۋگە شاقىرعان ءسوزىن قولدادى. دۇنيەجۇزىلىك دەنساۋلىق ساقتاۋ ۇيىمى باس ديرەكتورىنىڭ ايتۋىنشا، قىركۇيەك ايىنا قاراي جەر شارىنداعى حالىقتىڭ 10 پايىزىنا ەكپە ەگىلىپ، جىل سوڭىنا دەيىن بۇل كورسەتكىش 30 پايىزعا جەتۋى كەرەك.

پرەزيدەنت ەلىمىزگە ناقتى كورسەتكەن قولداۋى، ياعني پاندەميانىڭ العاشقى ايلارىندا قورعانىش قۇرالدارى مەن مەديتسينالىق جابدىقتاردى جەتكىزىپ بەرگەنى ءۇشىن دۇنيەجۇزىلىك دەنساۋلىق ساقتاۋ ۇيىمىنا ريزاشىلىق ءبىلدىردى.

قاسىم-جومارت توقاەۆ تەدروس ادحانوم گەبرەيەسۋسكە قازاقستاندا كوروناۆيرۋسپەن كۇرەسۋ ءۇشىن قابىلدانىپ جاتقان شارالار جونىندە مالىمەت بەردى.

مەملەكەت باسشىسى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورىمەن ونلاين كەزدەسۋ وتكىزدى

اڭگىمەلەسۋ بارىسىندا COVID-19 ىندەتىنە قارسى ەكپە ەگۋ ۇدەرىسىنە باسا ءمان بەرىلدى. پرەزيدەنت دۇنيەجۇزىلىك دەنساۋلىق ساقتاۋ ۇيىمىنىڭ باسشىسىنا قازاقستاندىق QazVac ۆاكتسيناسىنىڭ كلينيكالىق سىنامالارىنىڭ الدىن الا ناتيجەلەرى تۋرالى ايتتى. وتاندىق ۆاكتسينانىڭ تيىمدىلىك دەڭگەيى 96 پايىز. قازىرگى ۋاقىتتا سالالىق ورگاندار وتاندىق ۆاكتسيناعا كەلىسىم الۋ ءۇشىن دۇنيەجۇزىلىك دەنساۋلىق ساقتاۋ ۇيىمىمەن جۇمىس جۇرگىزىپ جاتىر. تەدروس ادحانوم گەبرەيەسۋس قاسىم-جومارت توقاەۆتىڭ پاندەمياعا قارسى كۇرەستەگى ەڭبەگىنە جوعارى باعا بەردى.

– بۇگىنگە دەيىن 2 ميلليون ادامعا ۆاكتسينا سالىنعان ەكەن. بۇل وتە جاقسى كورسەتكىش. كوپتەگەن ەل مۇنداي دەڭگەيگە جەتكەن جوق. حالىقتىڭ 55 پايىزىنا ەكپە سالامىز دەگەن ماقساتتارىڭىز قولداۋعا تۇرارلىق، – دەدى دۇنيەجۇزىلىك دەنساۋلىق ساقتاۋ ۇيىمىنىڭ باسشىسى.

سونىمەن قاتار ول QazVac ەكپەسىنىڭ ازىرلەمەسىن قولدايتىنىن جانە دۇنيەجۇزىلىك دەنساۋلىق ساقتاۋ ۇيىمى توتەنشە جاعداي كەزىندە پايدالانۋعا بولاتىن ءدارى-دارمەكتەردىڭ تىزىمىنە قوسۋ مۇمكىندىگىن قاراستىرۋعا دايىن ەكەنىن ايتتى.

تاراپتار العاشقى مەديتسينالىق-سانيتارلىق كومەك قىزمەتىنىڭ دامۋ پەرسپەكتيۆالارىن، اتاپ ايتقاندا، 2018 جىلى قابىلدانعان استانا دەكلاراتسياسىن ىلگەرىلەتۋ ماسەلەسىن قوزعادى. وسى ورايدا مەملەكەت باسشىسى قازاقستاننىڭ باستاماسى بويىنشا ازىرلەنەتىن العاشقى مەديتسينالىق-سانيتارلىق كومەك تۋرالى ساياسي رەزوليۋتسيانى قولداۋعا شاقىردى. اتالعان قۇجات 2022 جىلى وتەتىن بۇۇ باس اسسامبلەياسىنىڭ كەزەكتى سەسسياسىندا قابىلدانۋى مۇمكىن. رەزوليۋتسيا جوباسىندا استانا دەكلاراتسياسىنىڭ مىندەتتەرى مەن العاشقى مەديتسينالىق-سانيتارلىق كومەك مەحانيزمدەرى قامتىلعان.

قاسىم-جومارت توقاەۆ تەدروس ادحانوم گەبرەيەسۋسقا «One Health» باعدارلاماسى اياسىندا دايىندالعان ورتالىق ازيانىڭ الەۋەتىن ارتتىرۋ جونىندەگى قازاقستاننىڭ پيلوتتىق جوباسىن ۇسىندى. بۇل جوبا اۋرۋ مەن بيوقاۋىپسىزدىكتى باقىلاۋدىڭ وڭىرلىك ورتالىعىن قۇرۋدى ماقسات ەتەدى.

تاراپتار پاندەميانىڭ سىن-قاتەرلەرىن ەڭسەرۋ ماقساتىندا تىعىز ىنتىماقتاسا جۇمىس ىستەۋدى جالعاستىرۋعا ۋاعدالاستى. مەملەكەت باسشىسى قازاقستاننىڭ دۇنيەجۇزىلىك دەنساۋلىق ساقتاۋ ۇيىمىنىڭ قۇندىلىقتارى مەن ماقساتتارىن ودان ءارى ىلگەرىلەتۋگە ءازىر ەكەنىن ناقتىلادى.

 

ۇقساس جاڭالىقتار

Back to top button