«Жедел жәрдем шақырмаған»: өзіне оқ атқан полицейдің туыстары оқиғаның мән-жайын айтты
«Жедел жәрдем шақырмаған»: өзіне оқ атқан полицейдің туыстары оқиғаның мән-жайын айтты
Аудандық прокуратура ғимаратында өз-өзіне оқ атқан полиция қызметкері Железин ауданының 29 жастағы аға тергеушісі Рахым Оңбаев болып шықты. Бұл туралы зардап шеккен қызметкердің әкесі Нұрлан Оңбаев мәлімдеп, оқиғаның мән-жайын айтты, – деп жазды Tengrinews.kz.
Полиция қызметкерінің әкесінің айтуынша, 23 мамырда ұлын шұғыл түрде прокуратураға шақырған.
«Оқиға жексенбіде болды. Ұлым жұмысқа кеткен еді, бірнеше сағаттан кейін оның ауруханаға түскенін айтты. Рахымның айтуынша, сол күні оны прокуратураға бірнеше рет шақырған, соңғы рет ол алты сағатқа дейін құжаттарға қол қойып шықты. Сол кезде ол жұмыс бөлмесінде прокуратура қызметкерлері ішімдік ішіп отырғанын көрген. Ұлым олардың әрекетіне наразы болған. Олар не айтқанын білмеймін, мүмкін қорлаған шығар. Бірақ олар шектен шыққан. Ұлым ашудан өзіне оқ атқан. Оның айтуынша, оқ атылғаннан кейін ол құлаған, ал прокуратура қызметкерлері көмек көрсетіп, жедел жәрдем шақырудың орнына видеоларды өшіріп, кеңсені тазалай бастаған», – дейді қызметкердің әкесі.
Нұрлан Оңбаевтың айтуынша, ұлы сол жерден жергілікті полиция қызметінің бастығын көріп қалған. Ол прокуратурада өз жұмысымен келген екен, жедел жәрдем шақырған.
Бұл жазбаға қатысты Павлодар облысының прокуратурасы кейінірек түсінік беруге уәде береді.
Зардап шеккен полицейдің туыстары бұл оқиғаға жаңадан тағайындалған прокурордың көмекшісін кінәлап отыр.
«Прокурордың жаңа көмекшісі келісімен Рахым жиі жұмыста қалатын болды. Ол оған үнемі кінә тағып, күніне бірнеше рет жұмыс бөлмесіне шақыратынын айтты. Былтыр тамызда ол мерзімінен бұрын полиция майоры атағын алды. Ол өз жұмысын өте жақсы көреді. Оны бәрі сабырлы және байсалды адам ретінде біледі. Оның отбасы бар, 4 жасар ұлы өсіп келеді», – деді Н.Оңбаев.
Полицейдің туыстары кінәлілерді тауып, жазалауды талап етеді.
«Менің ұлымды осындай жағдайға жеткізген адамдар тиісті жазаға тартылуы керек. Мұндай қызметкерлер прокуратура қатарында жұмыс істемеуі керек деп санаймын», – деді полицейдің әкесі.