جاڭالىقتار

«جەدەل جاردەم شاقىرماعان»: وزىنە وق اتقان پوليتسەيدىڭ تۋىستارى وقيعانىڭ ءمان-جايىن ايتتى

اۋداندىق پروكۋراتۋرا عيماراتىندا ءوز-وزىنە وق اتقان پوليتسيا قىزمەتكەرى جەلەزين اۋدانىنىڭ 29 جاستاعى اعا تەرگەۋشىسى راحىم وڭباەۆ بولىپ شىقتى. بۇل تۋرالى زارداپ شەككەن قىزمەتكەردىڭ اكەسى نۇرلان وڭباەۆ مالىمدەپ، وقيعانىڭ ءمان-جايىن ايتتى، – دەپ جازدى Tengrinews.kz.

پوليتسيا قىزمەتكەرىنىڭ اكەسىنىڭ ايتۋىنشا، 23 مامىردا ۇلىن شۇعىل تۇردە پروكۋراتۋراعا شاقىرعان.

«وقيعا جەكسەنبىدە بولدى. ۇلىم جۇمىسقا كەتكەن ەدى، بىرنەشە ساعاتتان كەيىن ونىڭ اۋرۋحاناعا تۇسكەنىن ايتتى. راحىمنىڭ ايتۋىنشا، سول كۇنى ونى پروكۋراتۋراعا بىرنەشە رەت شاقىرعان، سوڭعى رەت ول التى ساعاتقا دەيىن قۇجاتتارعا قول قويىپ شىقتى. سول كەزدە ول جۇمىس بولمەسىندە پروكۋراتۋرا قىزمەتكەرلەرى ىشىمدىك ءىشىپ وتىرعانىن كورگەن. ۇلىم ولاردىڭ ارەكەتىنە نارازى بولعان. ولار نە ايتقانىن بىلمەيمىن، مۇمكىن قورلاعان شىعار. بىراق ولار شەكتەن شىققان. ۇلىم اشۋدان وزىنە وق اتقان. ونىڭ ايتۋىنشا، وق اتىلعاننان كەيىن ول قۇلاعان، ال پروكۋراتۋرا قىزمەتكەرلەرى كومەك كورسەتىپ، جەدەل جاردەم شاقىرۋدىڭ ورنىنا ۆيدەولاردى ءوشىرىپ، كەڭسەنى تازالاي باستاعان»، – دەيدى قىزمەتكەردىڭ اكەسى.

نۇرلان وڭباەۆتىڭ ايتۋىنشا، ۇلى سول جەردەن جەرگىلىكتى پوليتسيا قىزمەتىنىڭ باستىعىن كورىپ قالعان. ول پروكۋراتۋرادا ءوز جۇمىسىمەن كەلگەن ەكەن، جەدەل جاردەم شاقىرعان.

بۇل جازباعا قاتىستى پاۆلودار وبلىسىنىڭ پروكۋراتۋراسى كەيىنىرەك تۇسىنىك بەرۋگە ۋادە بەرەدى.

زارداپ شەككەن پوليتسەيدىڭ تۋىستارى بۇل وقيعاعا جاڭادان تاعايىندالعان پروكۋروردىڭ كومەكشىسىن كىنالاپ وتىر.

«پروكۋروردىڭ جاڭا كومەكشىسى كەلىسىمەن راحىم ءجيى جۇمىستا قالاتىن بولدى. ول وعان ۇنەمى كىنا تاعىپ، كۇنىنە بىرنەشە رەت جۇمىس بولمەسىنە شاقىراتىنىن ايتتى. بىلتىر تامىزدا ول مەرزىمىنەن بۇرىن پوليتسيا مايورى اتاعىن الدى. ول ءوز جۇمىسىن وتە جاقسى كورەدى. ونى ءبارى سابىرلى جانە بايسالدى ادام رەتىندە بىلەدى. ونىڭ وتباسى بار، 4 جاسار ۇلى ءوسىپ كەلەدى»، – دەدى ن.وڭباەۆ.

پوليتسەيدىڭ تۋىستارى كىنالىلەردى تاۋىپ، جازالاۋدى تالاپ ەتەدى.

«مەنىڭ ۇلىمدى وسىنداي جاعدايعا جەتكىزگەن ادامدار ءتيىستى جازاعا تارتىلۋى كەرەك. مۇنداي قىزمەتكەرلەر پروكۋراتۋرا قاتارىندا جۇمىس ىستەمەۋى كەرەك دەپ سانايمىن»، – دەدى پوليتسەيدىڭ اكەسى.

 

Back to top button