ەندى قازاقستان ازاماتتارى Amazon الاڭىندا اشىق ساۋدا جاساي الادى

بۇل تۋرالى ساۋدا جانە ينتەگراتسيا ءمينيسترى باقىت سۇلتانوۆ facebook پاراقشاسىندا جاريالادى.
«Amazon-مەن كەلىسسوزدەردى اياقتادىق. سونىمەن، 20 مامىردان باستاپ ءبىزدىڭ ەلىمىز الەمدەگى ەڭ ءىرى ەلەكتروندىق كوممەرتسيا پلاتفورمالارىنىڭ بىرىندە ساۋدا جاساۋعا «رۇقساتى بار» تىزىمىنە ەنگىزىلدى. ورتالىق ازياداعى كورشىلەرىمىزگە دە «بىزبەن بىرگە رۇقسات الىپ» ۇلگەرگەنى جاعىمدى بونۋس بولدى. ءبىز ءوز كاسىپورىندارىمىزعا، اسىرەسە شاعىن جانە ورتا بيزنەستى تەك وندىرىستە عانا ەمەس، سونىمەن بىرگە بولاشاقتا ءبىرتۇتاس ورتالىق ازيا برەندى رەتىندە ايماق ونىمدەرىن بىرلەسىپ جىلجىتۋعا كومەكتەسۋگە دەگەن نيەتىمىزدى باسشىلىققا الدىق. قازاقستاندىق كاسىپكەرلەر تولەمدى تىكەلەي قازاقستاندىق بانكتەر ارقىلى الىپ، ءوز ەلىمىزدىڭ اتىنان ساۋدا جاساي الۋ مۇمكىندىگى بار – قازاقستاندى ەندى ساتۋشى ەلدەردىڭ تىزىمىنەن تابۋعا بولادى»، – دەيدى مينيستر.
Amazon پلاتفورماسىندا الەمنىڭ 200-دەن استام ەلى مەن جۇزدەگەن ملن بەلسەندى كليەنتتەر بار. وندا 188 ەلدىڭ ساتۋشىلارى تىركەلگەن. وتكەن جىلى ونىڭ تازا ساتىلىمى 386،1 ملرد دوللاردى قۇراعان.
Back to top button