Қазақстан балаларды қорғау рейтингінде 50-орында тұр

Save The Children халықаралық қорының балаларды қорғау рейтингінде Қазақстан 180 елдің ішінде 50-ші орынды иеленді. Сингапур мен Словения балалар үшін ең жақсы, Нигерия және Орталық Африка Республикасы ең қолайсыз болды, – деп хабарлайды Курсив.

Индекс денсаулық сақтау, білім беру көрсеткіштерін және жалпы балалардың қауіпсіздігін ескереді.

«Сингапур 1000-нан 989 баллмен рейтингте көш бастап тұр. Батыс Еуропаның сегіз елі денсаулық, білім және балаларды қорғау бойынша өте жоғары балл жинап, топ-10 қатарына кіреді. Нигерия соңғы орында», – делінген рейтингте.

Алғашқы бестікке Сингапур, Словения, Финляндия, Швеция және Норвегия кірді.

ТМД елдері арасында Қазақстанды Беларусь пен Ресей басып озды.

Рейтинг деректері бойынша, Қазақстанда 5 жасқа дейінгі балалардың өлім-жітім деңгейі 10 000 тууға шаққанда 99 өлім екен. Балалардың 6% – ы (негізінен қыздар) 15-19 жас аралығында үйленеді, балалардың 8% – ы 5 жасқа дейін дұрыс тамақтанбайды, балалар еңбегінің таралуы 2,2%. Жасөспірімдер жүктілігінің коэффициенті 1000 қызға 29,8, балалар суицидінің коэффициенті 100 мың тұрғынға 1,3 болған.

Айта кету керек, өткен жылғы рейтингте Қазақстан 933 ұпай жинап, 40-орында тұрған.

Back to top button