Коронавирусты жеңген алғашқы ел: Израильде маусымнан бастап карантин аяқталады

Израиль пандемияға байланысты енгізілген барлық шектеуді маусымнан бастап алып тастайды. Бұл туралы елдің Денсаулық сақтау министрлігі мәлімдеді, – деп жазды Tengrinews.kz.

«Пандемия басталғаннан бері алғаш рет Израильдегі барлық шектеу 1 маусымнан бастап алып тасталады», – деді департамент өкілдері.

Алайда шетелдік туристер үшін шектеулер өз күшінде қалады, тіпті коронвирус таралмауы үшін талаптар күшейтілуі мүмкін.

Израильде бес миллионнан аса адам (халықтың 55 пайызы) коронавирусқа қарсы вакцинаның екі дозасын алды. Мейрамханалар мен спортзалдарға тек «жасыл төлқұжаты» бар, толықтай екпе салдырған немесе жазылып шыққан адамдар кіре алады. Маусымнан бастап вакцинациядан өтпеген адамдар да бұл мекемелерге кіре алады.

Израиль вакцинация бойынша әлемдік көшбасшылардың бірі. 2021 жылдың сәуірінің басында мұнда ересек тұрғындардың 80 пайызы егілді. Наурыздың басында премьер-министр Беньямин Нетаньяху Израиль COVID-19-ды жеңген алғашқы ел деп мәлімдеді.

Израильде халықты жаппай вакциналау 2021 жылдың қаңтарында басталды. Мемлекет осы қажеттіліктер үшін америкалық Pfizer препаратын сатып алды. Ең алдымен, вакцинация аға буын және созылмалы ауруы бар адамдарға салынды.

Back to top button