ەرەگىسكەن جاياۋ جۇرگىنشىنى ادەيى باسىپ ءولتىرىپ كەتكەن...

الماتى وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە، 19 مامىر كۇنى ساعات 19:00 شاماسىندا قاراساي اۋدانىنىڭ پوليتسيا باسقارماسىنا كەلىپ تۇسكەن حابارلامادا الماتى وبلىسىنداعى قاسكەلەڭ قالاسىندا 50 جاستاعى جەرگىلىكتى تۇرعىنمەن بەلگىسىز ازاماتتىڭ اراسىندا كيكىلجىڭ تۋىنداپ، كولىك يەسى قاساقانا وزىمەن جانجالداسقان ادامدى كولىگىمەن باسىپ، قاشىپ كەتكەن.

ءتارتىپ ساقشىلارى وقيعا ورنىنا بارىپ، كۋاگەرلەردىڭ ايتۋىمەن كولىكتىڭ ماركاسى مەن باعىت العان مەكەنجايىن انىقتاپ، كوپ ۇزاماي ولار اۋىلدىڭ شەتىنەن «فولكسۆاگەن گولف-3» كولىگىن تاپقان. كەيىن ونىڭ 61 جاستاعى يەسى دە قولعا تۇسكەن. ول قاسكەلەڭ قالاسىنىڭ تۇرعىنى بولىپ شىققان.

ۇستالعان كولىك يەسىنىڭ ىشىمدىك ىشكەنى انىقتالعان جانە ول بولعان وقيعاعا كىنالى ەكەنىن مويىنداعان. جابىرلەنۋشى مەن كۇدىكتى جول ەرەجەسىنە بايلانىستى كەلىسپەي قاپ، جاياۋ جۇرگىنشى كولىكتىڭ ۇستىنە شىعىپ، تەرەزەسىن ۇرعان. سول ساتتە جۇرگىزۋشى كولىكتى جۇرگىزىپ بارىپ، بىردەن توقتاتقان كەزدە جۇرگىنشى جەرگە قۇلاعان، سول كەزدە اۆتوكولىك يەسى ونى كولىگىمەن باسىپ بولىپ، وقيعا ورنىنان تەز كەتىپ قالعان.

61 جاستاعى ازامات قاماۋعا الىندى. قازىر سوتقا دەيىنگى تەرگەۋ جۇرگىزىلۋدە.

ۇقساس جاڭالىقتار

Back to top button