سوڭعى قوڭىراۋدى وتكىزۋ تالاپتارى بەكىتىلدى – دسم

قر دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق باقىلاۋ كوميتەتى كارانتين كەزىندە سوڭعى قوڭىراۋ مەن اتتەستاتتاردى تاپسىرۋ سالتاناتىن وتكىزۋ تالاپتارىن جاريالادى.

مينيسترلىكتىڭ اقپاراتىنا سايكەس، كوروناۆيرۋس ينفەكتسياسىنىڭ تارالۋىن بولدىرماۋ ماقساتىندا قابىلدانعان شەكتەۋ شارالارى (قاۋىپ-قاتەر ايماعىنا قاراماستان) كەزىندە جالپى ءبىلىم بەرەتىن مەكتەپتەردە سوڭعى قوڭىراۋ جانە اتتەستاتتاردى تاپسىرۋ سالتاناتىن وتكىزۋ تەك سانيتارلىق-ەپيدەميولوگيالىق تالاپتار قاتاڭ ساقتالعان جاعدايدا عانا رۇقسات ەتىلەدى.

وسى رەتتە 9، 11-سىنىپ تۇلەكتەرىنىڭ مەكتەپپەن قوشتاسۋ سالتاناتتارى (سوڭعى قوڭىراۋ، اتتەستاتتاردى تاپسىرۋ) تەك اشىق الاڭدا (تازا اۋادا) وتكىزىلەتىن بولادى. بۇدان باسقا ەشقانداي شارالاردىڭ وتكىزىلۋىنە رۇقسات بەرىلمەيدى.

سالتاناتتى شارا باستالماس بۇرىن مەكتەپ الاڭىن تازالاپ، قوقىستىڭ ۋاقىتىلى شىعارىلۋىن قامتاماسىز ەتۋ قاجەت. شاراعا مەكتەپ تۇلەكتەرىنەن باسقا ولاردىڭ اتا-انالارىنىڭ نەمەسە قامقورشىلارىنىڭ ء(ار تۇلەكتىڭ) ءبىر وكىلى، سونداي-اق مەكتەپ وقىتۋشىلارى قۇرامىنان ارتىق دەگەندە 6 ادام قاتىسا الادى.

كارانتيندەگى ازاماتتاردىڭ (كۆي-عا شالدىققان ناۋقاسپەن جاقىن بايلانىستاعى ادام، كۆي-عا شالدىققان ناۋقاس) اتالمىش شاراعا قاتىسۋىنا تىيىم سالىنادى. سونىمەن قاتار، مەكتەپ اۋماعىندا ادامداردىڭ، قوناقتاردىڭ (اتا-انالار، جاقىن تۋىستار، قامقورشىلار جانە ت.ب) جينالۋىنا جول بەرىلمەيدى. سالتاناتتى شارانىڭ كەزەڭ-كەزەڭىمەن وتكىزىلەتىنىن اتاپ ءوتۋ كەرەك. دالىرەك ايتقاندا، مەكتەپ اۋماعىنداعى شارا تەك ءبىر سىنىپ تۇلەكتەرى ءۇشىن وتكىزىلەدى.

شارانىڭ ۇزاقتىعى 45 مينۋتتان اسپاۋى ءتيىس. ءار سىنىپ ءۇشىن وتكىزىلەتىن سالتاناتتى شارالاردىڭ ارالىعى 30 مينۋتتان كەم بولماۋى كەرەك.

سوڭعى قوڭىراۋ، اتتەستاتتاردى تاپسىرۋ كەزىندە قول الىسۋعا تىيىم سالىنادى. شاراعا قاتىسۋشىلار بەتپەردەنى كيىپ، 2 مەترلىك الەۋمەتتىك قاشىقتىقتى ساقتاۋعا مىندەتتى. سالتاناتتى شارالارعا قاتىساتىن پەداگوگيكالىق ۇجىم، وقۋشىلار جەكە انتيسەپتيكالىق قۇرالدارىن قولدانعانى ءجون. سوڭعى قوڭىراۋ، اتتەستاتتاردى تاپسىرۋ سالتاناتى اياقتالعان سوڭ كوشەدە، قوعامدىق تاماقتانۋ ورىندارىندا (مەيرامحانا، ءدامحانا جانە ت.ب.) بۇقارالىق شارالاردى وتكىزۋگە تىيىم سالىنادى.

بۇدان بولەك، سوڭعى قوڭىراۋ، اتتەستاتتاردى تاپسىرۋ سالتاناتى اياقتالعان سوڭ دەزينفەكتسيالىق قۇرالداردى قولدانا وتىرىپ، مەكتەپ عيماراتتارىندا ىلعالدى تازالاۋ شارالارىن جۇرگىزۋ قاجەت.

ءبىلىم بەرۋ نىساندارىندا قر دەنساۋلىق ساقتاۋ ءمينيسترىنىڭ 2017 جىلعى 16 تامىزداعى № 611 بۇيرىعىمەن بەكىتىلگەن «ءبىلىم بەرۋ نىساندارىنا قاتىستى سانيتارلىق-ەپيدەميولوگيالىق تالاپتار» سانيتارلىق ەرەجەلەردىڭ 10-ءبولىمى تالاپتارىنىڭ جانە قر باس مەملەكەتتىك-سانيتارلىق دارىگەرى قاۋلىلارىنىڭ ساقتالۋىن قامتاماسىز ەتۋ قاجەت.

سونىڭ ىشىندە: ءبىلىم بەرۋ نىسانىنىڭ عيماراتتارىنا اتا-انالاردىڭ (زاڭدى وكىلدەرىنىڭ) جانە باسقا دا كەلۋشىلەردىڭ كىرۋىن شەكتەۋ; مەكتەپتىڭ 1-قاباتىندا قولدى زارارسىزداندىرۋعا ارنالعان سانيتايزەرلەردى ورناتۋ; سۋ ءىشۋ رەجيمىن ساقتاۋ ء(بىر رەتتىك ستاقاندار، جەكە قۇتىلار); سانتوراپتاردا دەزينفەكتسيالىق رەجيمدى كۇشەيتىلگەن تۇردە قامتاماسىز ەتۋ; سانتوراپتاردى سۇيىق سابىنمەن، قولدى زارارسىزداندىرۋعا ارنالعان دەزينفەكتسيالىق قۇرالدارمەن، ەلەكتر ورامالدارمەن ۇزدىكسىز قامتاماسىز ەتۋ.

وقۋشىلاردىڭ، قىزمەتكەرلەردىڭ دەنساۋلىعى، كوروناۆيرۋس ينفەكتسياسىنىڭ تارالۋىنا ءبىلىم بەرۋ نىسانىنىڭ باسشىسى جاۋاپ بەرەدى.

ۇقساس جاڭالىقتار

Back to top button