ستۋدەنتتەرگە ستيپەنديا بيۋدجەتتەن تىكەلەي اۋدارىلادى

باكالاۆريات، ماگيستراتۋرا جانە دوكتورانتۋرا بولىمىندە گرانتتا وقيتىن ستۋدەنتتەردىڭ ستيپەندياسى تىكەلەي كارتا شوتتارىنا تۇسەتىن بولادى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ مينيسترلىكتىڭ Facebook-تەگى پاراقشاسىندا حابارلادى.

«گرانت – بۇل ستۋدەنت الاتىن قاراجاتتىڭ ماقساتتى سوماسى. قازىر بۇل قاراجات تىكەلەي جوو-عا اۋدارىلعان كەزدە، ستۋدەنت مەملەكەت وعان اقشا تولەيتىنىن، ول ءۇشىن اقىلى نەگىزدە وقيتىندار سياقتى توقسان سايىن وقۋ اقىسى تولەنەتىنىن سەزبەيدى. سوندىقتان، قازىر ءبىز شارتتى تۇردە ستۋدەنتتىڭ ەسكروۋ-شوتىنا اقشا ءتۇسۋى ءۇشىن جۇمىس ىستەپ جاتىرمىز. بىراق، ستۋدەنت بۇل قاراجاتتى ۋنيۆەرسيتەتتەگى وقۋ اقىسىن تولەۋدەن باسقا ماقساتتا پايدالانا المايدى. كرەديتتەردىڭ جيناقتالۋىنا قاراي ول بۇل تولەمدى جوو-عا بانك ارقىلى اۋداراتىن بولادى»، – دەپ اتاپ ءوتتى ءبىلىم جانە عىلىم ءمينيسترى اسحات ايماعامبەتوۆ.

«سوڭعى 30 جىلدىڭ ىشىندە ستيپەنديا جانە جالپى مەملەكەتتىك تاپسىرىس جوو-عا اۋدارىلاتىن. ودان ءارى جوعارى وقۋ ورىندارى ستۋدەنتتەردىڭ ۇلگەرىمىنە قاراپ، ستيپەنديا بەرەتىن. ءبىز مۇندا كوپتەگەن تاۋەكەلدەردى، سونىڭ ىشىندە سىبايلاس جەمقورلىق ىقتيمالىن دا كورىپ وتىرمىز. ءبىز مۇندا كوپتەگەن تاۋەكەلدەردى، سونىڭ ىشىندە سىبايلاس جەمقورلىق ىقتيمالىن دا كورىپ وتىرمىز »، – دەيدى قر ءبىلىم جانە عىلىم ۆيتسە-ءمينيسترى ب.اسىلوۆا.

ءمينيستردىڭ حابارلاۋىنشا، قازىر بۇل پيلوتتىق جوباعا ءۇش جوو قاتىسىپ جاتىر. بۇدان بولەك، 21 جوو وسى سحەما بويىنشا شارت جاساستى. مينيسترلىك بۇل پيلوتتىق جوبانى شىلدە ايىنا دەيىن اياقتاۋدى جانە شىلدە ايىنان باستاپ وسى جۇيەنى ەنگىزۋدى جوسپارلاپ وتىر.

بۇدان بولەك، جۇيەدەگى تاعى ءبىر وڭ وزگەرىس – باسقا جوو-عا اۋىسقان ستۋدەنتتەرگە گرانتتى ساقتاي وتىرىپ، ستيپەنديانى ۇزدىكسىز تولەۋ مۇمكىندىگى.

Back to top button