Риддердегі өрт: Баспанасыз қалғандарға жаздың соңына дейін жаңа үй беріледі

Шығыс Қазақстан облысында алапат өрттен баспанасыз қалғандарға жаздың соңына дейін жаңа үй беріледі.

Аймақ басшысы Даниал Ахметов тілсіз жаудан зардап шеккен Риддер тұрғындарымен кездесті.

Ол тамыз айының соңына дейін баспанасыз қалғандардың әрқайсысына жаңа үйдің кілті берілетінін айтты. Бес құрылыс компаниясы Ботаника ықшамауданында жеті үйден тұрғызады. Қазір оқиға орнында комиссия мүшелері жұмыс істеуде. Олар нақты келтірілген материалдық залал мөлшерін есептеп, азаматтарға құжаттарын қалпына келтіруге септеседі.

«Бұзылған үйлерді қалпына келтірмейміз. Үйінен айырылған әр адамға 80 шаршы метрлік баспана беріледі. Әуелде құрылысы аяқталмаған 9 қабатты тұрғын үйді сатып алу жоспарланған болатын. Алайда 1996 жылғы үйдің іші әрленбеген әрі қажетті коммуникация тартылмаған. Оның иесі шаршы метрі үшін 179 мың теңге сұрап отыр. Ал жеке сектордағы жаңа үйдің шаршы метрінің құны – 160 мың теңге. Бұл бюджет қаржысына да үнем болады. Үйлер тұрғындарға еш ақысыз беріледі», – деді Даниал Ахметов.

Қазіргі кезде сәулетшілер 35 үй аумағын бөлуде, сосын бірден құрылыс жұмыстары басталмақ.

Back to top button