كوكشەتاۋداعى ساياجايلار ورتكە وراندى

كەشە ساعات 12.44-تە «101» پۋلتىنە «تسەليننيك» جانە «اۆياتور» كووپەراتيۆتەرىنىڭ ساياجايلارىنا اۋىسقان قۇرعاق ءشوپتىڭ جانعانى تۋرالى تەلەفون حابارلاماسى كەلىپ تۇسكەن. جالپى اۋدانى 5 گا. ءورتتى سوندىرۋگە 8 بىرلىك تەحنيكا، اقمولا وبلىسى توتەنشە جاعدايلار دەپارتامەنتىنىڭ 73 قىزمەتكەرى، سونىمەن قاتار، قر توتەنشە جاعدايلار مينيسترلىگىنىڭ 25 كۋرسانتى جانە 2 بىرلىك تەحنيكا تارتىلدى، جەرگىلىكتى اتقارۋشى بيلىكتىڭ 4 جۇمىسشىسى مەن 4 تەحنيكاسى جۇمىلدىرىلدى، – دەپ حابارلايدى اقمولا وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى.

ءورت سالدارىنان 16 ساياجاي ورتكە وراندى («تسەليننيك» – 6، «اۆياتور» – 10). زارداپ شەككەندەر مەن جاراقات العاندار جوق.

ايتا كەتۋ كەرەك، ءورتتىڭ سەبەبى بىرقاتار ساراپتامالار كەزىندە انىقتالادى. بولجام بويىنشا ءورت وتقا بەي-جاي قاراۋ، قوقىس پەن قۇرعاق ءشوپتى جاعۋ سالدارىنان بولعان.

«كوكشەتاۋ قالاسى تۇرعىندارىنا، اسىرەسە ساياجاي تۇرعىندارىنا ۇندەۋ تاستاعىم كەلەدى. قۇرعاق شوپتەر مەن قوقىستاردى جاعۋعا بولمايدى. ناتيجەسىندە ءورت پايدا بولادى. ءورتتىڭ شىعۋ سەبەپتەرىن انىقتاۋ ءۇشىن ءورت-تەحنيكالىق زەرتتەۋ تاعايىندالدى»، – دەدى كوكشەتاۋ ق. توتەنشە جاعدايلار ءبولىمىنىڭ باستىعى اسەت جاقسىلىقوۆ.

اقمولا وبلىسىنىڭ توتەنشە جاعدايلار قىزمەتى ءورت قاۋىپسىزدىگى ەرەجەلەرىن ساقتاۋ قاجەتتىگىن ەسكە سالادى، ءورت بولعان جاعدايدا شۇعىل تۇردە «101» نەمەسە «112» نومىرلەرىنە حابارلاسىڭىز.

Back to top button