وليمپيادا چەمپيونى جاقسىلىق ۇشكەمپىروۆتىڭ تۋعانىنا 70 جىل

بۇگىن قازاقتان شىققان تۇڭعىش وليمپيادا چەمپيونى جاقسىلىق ۇشكەمپىروۆتىڭ تۋعان كۇنى.  كلاسسيكالىق كۇرەستىڭ شىن شەبەرى كوزى ءتىرى بولسا 70 جاسقا تولار ەدى.

وكىنىشكە قاراي، الەمدى جايلاعان ىندەت قازاقتىڭ الىپ تۇلعالارىن دا اياعان جوق. داڭقتى بالۋان ءوزىنىڭ ماسكەۋدەگى تاريحي جەڭىسىنە قىرىق جىل تولعان سوڭ، اراعا ساناۋلى كۇن سالىپ، ماڭگىلىك مەكەنىنە اتتاندى.

وليمپيادا چەمپيونى جاقسىلىق ۇشكەمپىروۆتىڭ تۋعانىنا 70 جىل

جاقسىلىق ۇشكەمپىروۆتىڭ كىلەمدەگى عۇمىرى وڭاي بولعان جوق. ون بەس وداقستاس ەلدىڭ ىشىنەن ءوزىڭدى مويىنداتىپ، كسرو قۇراماسىنا ىلىگۋ ەكىنىڭ بىرىنە بۇيىرمايتىن باق ەدى. بىراق بىلىكتى باپكەر ۆاديم پسارەۆتىڭ الدىن كورگەن ول ءوزىنىڭ تالانتى مەن قابىلەتى ارقاسىندا باس كومانداعا قابىلداندى. 1972 جىلدان باستاپ ۇشكەمپىروۆ تۇراقتى تۇردە كسرو چەمپيوناتىندا جۇلدەلى ورىنداردان كورىنىپ، تۇعىردان تۇسكەن جوق. الايدا، الىستاعى قازاق جەرىنەن كەلگەن بالۋاندى وداق باپكەرلەرى وليمپياداعا اپارۋعا دا اسىقپادى. ۇشكەمپىروۆ كىلەمدەگى جەتى جىلىن قۇرامانىڭ ەكىنشى ءنومىرلى بالۋانى رەتىندە وتكىزگەن. تۇتاستاي ەكى وليمپيادالىق تسيكلدە مۇنداي ءتوزىم تانىتۋ كەز كەلگەننىڭ قولىنان كەلمەيتىنى تاعى دا راس. 1976 جىلى مونرەال وليمپياداسى قارساڭىندا جاقسىلىق ناعىز بابىندا بولاتىن. الايدا، تورتجىلدىق دوداسىنا باپكەرلەر رەسەيلىك الەكسەي شۋماكوۆتى اتتاندىردى. ارينە، شۋماكوۆ ءۇمىتتى اقتاپ، كانادادان التىنمەن ورالدى. ال ۇشكەمپىروۆ بولسا، ءوزىنىڭ جۇلدىزدى ءساتىن تاعى دا ءتورت جىل كۇتۋگە بەكىندى.
ماسكەۋ وليمپياداسىنا قازاق بالاسىنىڭ قاتىساتىنى تۋرالى جاڭالىق بارشا حالىقتى قۋانتتى. ويتكەنى، كسرو قۇراماسىنا ەنگەن قازاق سپورتشىلارىنىڭ سانى ءبىر قولدىڭ ساۋساعىنا دا جەتپەيتىن. جاقسىلىق بولسا، الىستاعى اعايىننىڭ، قالىڭ ەلدىڭ نامىسىن قورعاۋ ءۇشىن سوڭعى كۇشى سارقىلعانشا كۇرەسۋگە بەل بۋدى. بىراق ەڭ العاشقى بەلدەسۋىندە-اق الەمنىڭ جانە ەۋروپانىڭ ەكى دۇركىن چەمپيونى كۇتىپ تۇرعاندا، بالۋاننىڭ كوڭىلى سولعىن تارتقانى دا راس.
ماسكەۋ كىلەمىندە جاقسىلىق ۇشكەمپىروۆ ءتورت كەزدەسۋ وتكىزدى. العاشقى اينالىمدا رۋمىن بالۋانىن جەڭسە، ەكىنشى كەزەڭدە پولشالىق رومان كيرپاچتى 13:10 ەسەبىمەن، ءۇشىنشى بەلدەسۋدە ۆەنگريالىق فەرەنتس شەرەشتى 17:6 ەسەبىمەن ۇتتى. ءتورتىنشى اينالىمدا دەمالىس السا، فينالدىق بەسىنشى بەلدەسۋدە بولگاريالىق پاۆەل حريستوۆتى 12:7 ەسەبىمەن جەڭىپ، گرەك-ريم كۇرەسىنەن قازاقتان شىققان تۇڭعىش وليمپيادا چەمپيونى اتانعان ەدى.

ۇقساس جاڭالىقتار

Back to top button