"كىنام جوق": ەلجان ءبىرتانوۆ سوتتا مالىمدەمە جاسادى

بۇرىنعى دەنساۋلىق ساقتاۋ ءمينيسترى ەلجان ءبىرتانوۆ ەشقانداي زاڭسىز ارەكەت، اسىرەسە كوروناۆيرۋس پاندەمياسى كەزىندە جەمقورلىق قىلمىستارىن جاساماعانىن مالىمدەدى، – دەپ حابارلايدى  Sputnik

«بۇرىنعى دەنساۋلىق ساقتاۋ ءمينيسترى رەتىندە پاندەميا الەمدىك اپات سەكىلدى كوپ ادامنىڭ ءومىرىن قيعانىن جانە بۇل ۆيرۋستان قازىر دە ادامدار كوز جۇمىپ جاتقانىن ايتقىم كەلەدى. وتكەن جىلدىڭ جازىندا مەديتسينالىق كومەك كورسەتۋدە اۋقىمدى پروبلەمالار بولدى. مەن بۇرىنعى دەنساۋلىق ساقتاۋ ءمينيسترى رەتىندە سالاعا جەتەكشىلىك ەتكەندىكتەن مەديتسينالىق كومەك كورسەتۋ ساپاسىنا جاۋاپتى ەكەنىمدى تولىقتاي تۇسىنەمىن. جاۋاپكەرشىلىكتەن جالتارىپ وتىرعان جوقپىن»، – دەدى ءبىرتانوۆ.

ول پاندەميا كەزىندە مەملەكەتتىك ورگانداردىڭ ءىس-ارەكەتىن جان-جاقتى تەرگەۋ ءادىل جۇرەدى دەپ ۇمىتتەنەتىنىن جەتكىزدى.

«قازىر ءبىز قىلمىستىق باعىتتا جانە ايىپتاۋ بەلگىلەرىمەن قۋدالاۋ ءجۇرىپ جاتقانىن كورىپ وتىرمىز. الايدا ادامدى ايىپتاماس بۇرىن الدىمەن ەپيدەميولوگيالىق تەرگەۋدى، تولىققاندى تەرگەۋدى كۇتىپ باعايىق. پاندەميا كەزىندە ەلدە نە بولىپ جاتقانىن مەن جاقسى تۇسىنەمىن. كەز كەلگەن تەرگەۋگە دايىنمىن. بىراق كوروناۆيرۋس پاندەمياسى كەزىندە بولىنگەن قاراجاتتىڭ جىمقىرىلۋىنا ەش قاتىسىم جوق»، – دەدى ءبىرتانوۆ.

ءبىراز بۇرىن نۇر-سۇلتانداعى تەرگەۋ سوتى كەزىندە پروكۋرور تولەگەن جاراسپاەۆ بۇرىنعى دەنساۋلىق ساقتاۋ ءمينيسترى ەلجان ءبىرتانوۆقا قاتىستى ايىپتاۋ اكتىسىن جاريالادى.

ونىڭ ايتۋىنشا، سوتقا دەيىنگى تەرگەۋ 2015 جىلى دەنساۋلىق ساقتاۋ مينيسترلىگى اۆتوماتتاندىرىلعان اقپارات جۇيەسىن جەتكىزۋ ءۇشىن 17،8 ميلليون دوللارعا حورۆاتيالىق Ericsson Nikola Tesla كومپانياسىمەن كەلىسىمشارت جاساعانىن انىقتادى.

پروكۋروردىڭ ايتۋىنشا، دەنساۋلىق ساقتاۋ ءمينيسترى ەلجان ءبىرتانوۆ «پلاتفورمانىڭ جۇمىس ىستەمەيتىنىن بىلە تۇرا» جانە «ولجاس ابىشەۆپەن (بۇرىنعى دەنساۋلىق ساقتاۋ ۆيتسە-ءمينيسترى) الدىن الا كەلىسۋ ارقىلى 2018 جىلدىڭ قازانىندا نۇر-سۇلتان، باتىس قازاقستان جانە شىعىس قازاقستان وبلىستارىنداعى 17 ەمدەۋ مەكەمەسىندە پلاتفورمانى پيلوتتى نەگىزدە پايدالانۋ تۋرالى بۇيرىققا قول قويعان.

«ەلجان ءبىرتانوۆ، ولجاس ابىشەۆ جانە باسقا دا تۇلعالار وزدەرىنىڭ قىلمىستىق ءىس-ارەكەتى ارقىلى سەنىپ تاپسىرىلعان بيۋدجەت قاراجاتىن تالان-تاراجعا سالىپ، مەملەكەتكە ءىرى كولەمدە، ناقتىراق ايتساق، 1،5 ميلليارد تەڭگە نەمەسە 4،1 ميلليون دوللار كولەمىندە ماتەريالدىق شىعىن كەلتىرگەن»، – دەدى مەملەكەتتىك ايىپتاۋشى.

ءبىرتانوۆتىڭ قورعاۋشىلارى ەكس-ءمينيستردىڭ كىناسىزدىگىن العا تارتىپ وتىر.

ۇقساس جاڭالىقتار

Back to top button