Өрт кезінде қаза тапқан құтқарушының отбасына баспана берілді

ПП-12 бөлімінің командирі Арыстанбек Машраптың отбасы бір бөлмелі пәтердің кілті мен тұрмыстық техника сатып алуға сертификат алды, – деп жазды Pavlodarnews.kz. 25 ақпанда кезекшілік кезінде азаматтық қорғау сержанты Арыстанбек Машрап өрт сөндіру кезінде қаза тапты. Артында әйелі Бибінұр Қаниева мен әкесі, қайтыс болған күні небәрі бір айға толған баласы Әзім қалды. «Қоныс тойы кезінде «Нұр-Ана әлемі» қоғамдық бірлестігінің төрайымы Рымкеш Сламбекова шашу шашып, Бибінұрға мықты, қайратты болуды және ұлын өз Отанының лайықты азаматы етіп өсіруді тіледі», – деп хабарлады Ақсу қаласы әкімдігінің баспасөз қызметі. Облыстық төтенше жағдайлар департаменті өрт сөндіру және авариялық-құтқару жұмысы қызметінің бастығы Сүлеймен Бимағамбетов құтқарушының отбасына көрсеткен көмегі үшін Ақсу қаласының әкімдігіне ризашылығын білдірді.