Елордалық полицей 20 жыл бұрын жоғалған азаматты тапты

Орал тұрғыны Наталья Константиновна учаскелік полиция инспекторы, полиция капитаны Көпжасар Жүсіповке 20 жыл бойы іздеген туысын тауып бергені үшін алғыс айтты, – деп хабарлады Нұр-Сұлтан қалалық Полиция департаменті. Ол туысын табу мақсатында елордадағы Полиция департаментінің кезекші бөліміне хабарласқан. Оған жоғалып кеткен ер адамның тұруы мүмкін ауданға жауапты учаскелік полициясының нөмірін берген. «Әйел учаскелік полициядан 20 жыл бұрын жоғалған туысын тауып беруді өтінген. Ол 2 күн ішінде ер адамды тауып, Оралға жетуіне көмектескен. Ер адамның тұрғылықты мекен-жайы болмаған және әртүрлі орайы келген жұмыстарды істеген. Полиция қызметкері оған азық-түлік пен пойызға билет сатып алып берген. Оны Оралдағы туысы күтіп алды», – делінген хабарламада.