Елімізде футболдан жеке клубтар лигасы құрылды

Елімізде футболдан жеке клубтар лигасы құрылды

Елімізде футболдан жеке клубтар лигасы құрылды
ашық дереккөзі
Қазақстан футбол федерациясының бастамасы бойынша жеке клубтардың арасында футбол лигасы құрылды. Бұл туралы Қазақстан футбол федерациясының баспасөз қызметі хабарлады. ЖКФЛ деген атау алған бұл жоба Қазақстанның шалғай аймақтарының барлығын қамтиды. Соңғы жылдары облыс орталықтарында жеке клубтар құрылып, әр жастағы балалар мен жеткіншектер жеке кәсіптік клубтарда жаттығу жасап жатыр. Демек, ел футболының елеулі бір бөлігін алып отырған бұл секторды ҚФФ өз қанатының астына алып, қолдау көрсетпекші. Жобаны жүзеге асырушы Vista футбол клубының басшысы Александр Разинков жаңадан құрылған JKFL-дың президенті болып тағайындалса, лиганың бас хатшысы болып ҚФФ Бұқаралық, балалар мен жасөспірімдер және әйелдер футболы департаментінің директоры Ерлан Жамантаев бекітілді. Қазақстанның 16 облысын қамтитын ірі жоба мамыр айының соңында басталып тамыз айында мәресіне жетеді. Бұл доданың тек бірінші кезеңі ғана. Аймақтағы жарыстар өтіп, іріктеуден іркілмеген командалар тамыз-қыркүйек айларында Нұр-Сұлтан қаласында өтетін финалдық кезеңге жолдама алады. Жарыс жүйесінде де ерекшеліктер бар екенін айта кетейік. Мысалы, 2011-2012 жылғы балалар арасындағы жарыс 5+1 форматында өтеді. Ал 2009-2010 жылғы балалар жарысы 7+1, 2007-2008 жылғылар 8+1, 2005-2006 жылғылардың жарысы 10+1 форматында ұйымдастырылады. Бір кәсіби жеке клубтың осы жас санатындағы 4 командасы да жарысқа қатыса алады.