Су тасқанына қарсы 45 пойыз жасақталып жатыр – министр

ҚР Индустрия және инфрақұрылымдық даму министрі Бейбіт Атамқұлов елімізде су тасқанына қарсы 45 пойыз жасақталып жатқанын айтты. «Поездардың үздіксіз және қауіпсіз қозғалысын қамтамасыз ету, жолдарды, ғимараттарды уақтылы дайындау мақсатында «Қазақстан темір жолы» ұлттық компаниясының бұйрығы бекітілген. Онда су тасқыны кезінде жол қауіпсіздігін, жолдың және ғимараттардың тұрақты жұмысын қамтамасыз етудің ұйымдастыру-техникалық іс-шаралары қарастырылған. Аумақтық ұйымдармен бірлесіп, су қоймаларының жайы, агротехникалық дамбалар тексерілуде. Сондай-ақ, күрделі жағдай туындаған жағдайда төтенше жағдайлар жөніндегі облыстық құрылымдарымен өзара әрекет ету жұмысы жүргізілуде», – деді ол Үкімет отырысында. Министрдің айтуынша, былтырғы көрсеткішке сәйкес, тасқын суды өткізу бойынша барлық аумақта 673 қауіпті жердің тізімі анықталған. Су тасыған кезде тәулік бойы жауапты тұлғалардың кезекшілігі ұйымдастырылады. Олар қауіпті жерлерді айналып, қосымша тексеріп шығады. «Көпірлердің, құбырлардың, дренажды құдықтардың тесіктерін қардан тазалау, тауды және су бұрғыш арықтарды, науаларды және кюветтерді ашу бойынша дайындық жұмысы басталды. Кесек тастар, рельсті пакеттер, стандартты емес темірбетон шпалдар тиелген су тасқанына қарсы 45 пойыз жасақталып жатыр», – деді Бейбіт Атамқұлов.