Алғаш рет тілдескен Джо Байден мен Си Цзиньпин не талқылағаны белгілі болды

АҚШ президенті Джо Байден ҚХР Төрағасы Си Цзиньпинмен телефон арқылы сөйлесті, деп хабарлады Ақ үй. Мемлекет басшылары коронавирустың таралуына қарсы күресті, климаттың өзгеруін және әлемде қару-жарақтың таралуын болдырмауды талқылады. Байден Гонконгтағы, Шыңжаң-Ұйғыр автономиялық ауданындағы (ШҰАА) және Тайваньдағы жағдайға алаңдаушылық білдірді. АҚШ президенті қауіпсіздікті қамтамасыз етудің, америкалықтардың денсаулығы мен өмір салтын қорғаудың және Үнді-Тынық мұхиты аймағының еркін және ашық кеңістігін сақтаудың басым сипатын растады, деп қосты Ақ үй. Сондай-ақ, "АҚШ президенті Қытай халқына ай күнтізбесі бойынша Жаңа жыл мерекесіне арналған құттықтауы мен ізгі тілектерін жеткізді", - делінген хабарламада.