باعدات مۋسين: «IT-مەكتەپتەر اشۋ جوسپارلانىپ وتىر»

قازاقستان تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين «Digital Almaty 2021– تسيفرلىق قايتا جاڭعىرۋ: جاڭا جاعدايعا سەرپىلىس» فورۋمى اياسىنداعى «GovTech جانە ۇزدىك سەرۆيستەر» پلەنارلىق سەسسياسىنا قاتىستى، دەپ حابارلايدى اتالعان مينيسترلىكتىڭ ءباسپاسوز قىزمەتى.

مينيستر ەلىمىزدىڭ IT-لاندشافتىن قۇرۋ جونىندەگى پلاتفورمالىق مودەلگە ءوتۋى كەرەك ەكەندىگىن اتاپ ءوتتى.

«پلاتفورمالىق مودەل دەگەنىمىز – قانداي دا ءبىر بيزنەس-پروتسەستى اۆتوماتتاندىرۋ بارىسىندا پروبلەمالارعا تاپ بولمايمىز. بۇل وڭاي، قۇجاتتارعا قول قويماستان جانە بىرنەشە قىزمەتتەرمەن بىرىكتىرىلمەستەن بولۋى كەرەك. ءبىز بيزنەس-پروتسەستەردىڭ ناقتى ارحيتەكتۋراسى بولاتىن جۇيە ەرەجەلەرى مەن مەملەكەتتىڭ بەلگىلى ءبىر پلاتفورماسىن جاساعىمىز كەلەدى. اۆتوماتتاندىرۋ قىزمەتى التى ايعا سوزىلماۋى ءۇشىن تەك ءبىر ايدا جاسالۋىن قاراستىرۋدامىز. سول سەبەپتى، اعىمداعى كەزەڭدە ارحيتەكتۋرانى ازىرلەپ جاتىرمىز جانە نارىقتان ساراپشىلاردى تارتاتىن بولامىز، وعان وتاندىق IT-كومپانيالار قاتىساتىن بولادى. IT-كومپانيالار ءوز قىزمەتتەرىن وسى پلاتفورما ارقىلى مەملەكەتكە ساتاتىن بولادى»، – دەدى باعدات مۋسين.

بۇدان باسقا، مينيستر قازاقستانعا IT سالاسىنداعى كادرلىق ماسەلەنى شەشۋ كەرەكتىگىن ايتتى. «بۇگىندە قازاقستان IT-ونىمدەرىن ەكسپورتتاۋدا باسقا ەلدەردەن ارتتا قالۋدا. سەبەبى، ادامي كاپيتالدىڭ جەتىسپەۋشىلىگى بار. جىل سايىن قازاقستاندا 20 000 IT-مامان وقۋ ورنىندا ءبىلىمىن اياقتايدى، بىراق بۇل تەك ستاتيستيكا عانا. سوندىقتان IT-نارىعى ءۇشىن ءبىز قازاقستان رەسپۋبليكاسىنىڭ ءبىلىم جانە عىلىم مينيسترلىگىمەن بىرلەسىپ، گرانتتىق باعدارلامالاردى IT-مەكتەپتەر جاعىنا قاراي قايتا قۇرىپ جاتىرمىز»، – دەدى باعدات مۋسين. سونداي – اق، مينيسترلىك باسشىسى وڭىرلەردە IT-مەكتەپتەر اشۋ جوسپارلانىپ وتىرعانىن ايتتى.

سونىمەن قاتار، پلەنارلىق سەسسياعا حقو باسقارۋشىسى جانە قر سجرا توراعاسى قايرات كەلىمبەتوۆ، BI.Zone ديرەكتورى دميتري سامارتسەۆ، Kaspi.kz باسشىسى ميحايل لومتادزە، IDC ۆيتسە-پرەزيدەنتى اندرەي بەكلەميشەۆ، ەادب باسقارما توراعاسىنىڭ ورىنباسارى تيگران ساركيسيان، Re-State قورىنىڭ باس ديرەكتورى اناستاسيا كالينينا، DeltaWorks نەگىزىن قالاۋشى دەنيەل سيلي جانە بۇۇ اتمەاك اكت جانە اپاتتار قاۋپىن ازايتۋ دەپارتامەنتىنىڭ ديرەكتورى تيتيانا بونوپاچە قاتىستى.

ەستەرىڭىزگە سالا كەتەيىك، الماتى قالاسىندا جاھاندىق جانە وڭىرلىك تسيفرلىق كۇن ءتارتىبىن، سىن-تەگەۋرىندەردى، تسيفرلاندىرۋ سالاسىنداعى شەشىمدەر مەن ساياساتتى قالىپتاستىرۋ جانە تالقىلاۋ ءۇشىن نەگىزگى الاڭداردىڭ ءبىرى – «Digital Almaty 2021» فورۋمى وتۋدە. بيىلعى جىلعى فورۋم بىرىككەن فورماتتا، سونداي-اق، ءىس-شارالاردىڭ باسىم بولىگى ونلاين تۇردە وتكىزىلۋدە.

ۇقساس جاڭالىقتار

Back to top button