فرانتسيامەن ەكونوميكالىق بايلانىس نىعايماق

تۇركىستان وبلىسىنىڭ اكىمى ومىرزاق شوكەەۆ تۇركىستانعا جۇمىس ساپارىمەن كەلگەن فرانتسيانىڭ قازاقستانداعى توتەنشە جانە وكىلەتتى ەلشىسى ديدە كانەسپەن كەزدەستى. كەزدەسۋ بارىسىندا تاراپتار وبلىس پەن فرانتسيا رەسپۋبليكاسى اراسىنداعى ەكىجاقتى قارىم-قاتىناستاردىڭ دامۋىن تالقىلادى. ديدە كانەسس تۇركىستان وبلىسىنا دەگەن ۇلكەن قىزىعۋشىلىقتىڭ ايقىن ەكەنىن اتاپ كورسەتىپ، ەكى ەل اراسىندا ءتۋريزمدى دامىتۋعا توقتالدى.

ءوز كەزەگىندە ومىرزاق ەستاي ۇلى ءوڭىردىڭ ەكونوميكالىق الەۋەتىمەن تانىستىرىپ، بىرلەسكەن جوبالاردى جۇزەگە اسىرۋعا شاقىردى. ءوڭىر باسشىسى فرانتسيا قازاقستانمەن ستراتەگيالىق سەرىكتەستىك تۋرالى شارتقا قول قويعان العاشقى ەۋروپالىق ەلدىڭ ءبىرى بولعانىن اتاپ ءوتتى. ەكىجاقتى قارىم-قاتىناستاردىڭ بۇگىنگى جوعارى دەڭگەيى قر تۇڭعىش پرەزيدەنتى نۇرسۇلتان نازارباەۆتىڭ 2015 جىلى پاريجگە رەسمي ساپارى بارىسىندا قول جەتكىزىلگەن ۋاعدالاستىقتاردىڭ ناتيجەسى بولىپ تابىلاتىنىن اتاپ ءوتتى.

«وزدەرىڭىزگە بەلگىلى، 2018 جىلدىڭ 19 ماۋسىمىندا ەلباسى ن.نازارباەۆتىڭ جارلىعىمەن تۇركىستان وبلىسى قۇرىلىپ، ونىڭ اكىمشىلىك ورتالىعى تۇركىستان قالاسى بولدى. قالاعا وبلىس ورتالىعى مارتەبەسىن بەرۋ ينۆەستيتسيا تارتۋعا ايتارلىقتاي سەرپىن بەردى. ءبىز ءوز تاراپىمىزدان فرانتسۋز كومپانيالارىنىڭ ءبىزدىڭ وبلىستا بيزنەستى دامىتۋ بويىنشا باستامالارىنا تولىق قولداۋ كورسەتۋگە دايىنبىز جانە ىنتىماقتاستىعىمىزدى ودان ءارى دامىتۋعا سەنىم بىلدىرەمىز. تۇركىستان ءوڭىرىنىڭ ەكونوميكاسىن ىلگەرىلەتۋ ءۇشىن كاسىپكەرلىك جانە اۋىل شارۋاشىلىعى سالالارى مەن تۋريزم يندۋسترياسىن دامىتۋ باستى باعىتتاردىڭ ءبىرى»، – دەدى ءو.شوكەەۆ.

سونىمەن قاتار، تاراپتار تۋريزم جانە ءبىلىم بەرۋ سالالارىنداعى ەكى ەل اراسىنداعى ىنتىماقتاستىق ستراتەگيالىق سەرىكتەستىكتىڭ باسىمدىقتارىنىڭ ءبىرى بولىپ تابىلاتىنىن اتاپ ءوتتى. اتاپ ايتقاندا، وتكەن جىلى تۇركىستان قالاسىنداعى حالىقارالىق تۋريزم جانە قوناقجايلىلىق ۋنيۆەرسيتەتى مەن انجە ۋنيۆەرسيتەتى اراسىندا ىنتىماقتاستىق تۋرالى كەلىسىمگە قول قويىلعان. قۇجات ءبىلىم الۋ، زەرتتەۋلەر جۇرگىزۋ جانە تاجىريبە الماسۋ ماقساتىندا ستۋدەنتتەرمەن، پروفەسسورلىق-وقىتۋشىلىق قۇراممەن تاجىريبە الماسۋدى، سونداي-اق تۋريزم يندۋسترياسى مەن قوناقجايلىلىقتى دامىتۋ سالاسىندا بىرلەسكەن كونفەرەنتسيالار، سەمينارلار وتكىزۋدى كوزدەيدى. بولاشاق ماماندار ءۇشىن تىلدىك كۋرستاردى ۇيىمداستىرۋ ماسەلەسىنە ەرەكشە نازار اۋدارىلادى.

فرانتسۋز ديپلوماتى ءوزارا ىنتىماقتاستىقتى كەڭەيتۋ ءۇشىن ءتيىستى جۇمىستار جۇرگىزىلەتىنىن ايتىپ، كۇللى تۇركى الەمىنىڭ رۋحاني استاناسى – تۇركىستاننىڭ جاڭارعان كەلبەتى تاڭ قالدىرعانىن جانە ءوڭىردىڭ ەكونوميكالىق الەۋەتى جوعارى ەكەنىن ايتىپ ءوتتى. ديدە كانەس وبلىس باسشىسىنا جىلى قابىلداعانى ءۇشىن ريزاشىلىعىن ءبىلدىرىپ، ىسكەرلىك ءارى سەرىكتەستىك ىنتىماقتاستىقتى ودان ءارى نىعايتۋ جونىندە سەنىمدىلىك ءبىلدىردى.

Back to top button