Бекмәмбетов отандық фильмдердің билетін арзандату керектігін айтты

Танымал режиссер әрі продюсер Тимур Бекмәмбетов отандық киноны дамыту үшін қазақстандық фильмдерге билеттердің бағасын арзандату керектігін айтты. "Әрине, қазақстандық киностудияларға америкалық киностудиялармен бәсекелесу қиын екенін мойындау керек. Біздің қазақстандық киноларға оларға қарағанда екі есеге кем қаражат бөлінеді. Сондықтан да отандық кино түсірушілер бұл ретте ұтылып қалады. Көрермен әрине, сапалы киноны таңдайды", - деді қазақстандық режиссер. "Қазіргі кезде кинотеатрлардағы билеттердің бағасы басты мәселе болып отыр. Меніңше, билеттің бағасы киноға салынған инвестицияға сәйкес болуы тиіс. Қазір киноға ақшасы бар адамдар барады. Себебі 920 теңге тұратын билет кейбір отбасыларға қымбатқа түсуі мүмкін", - деді Тимур Бекмәмбетов. Оның айтуынша, бұл мәселені шешу үшін мұнда абонемент енгізу қажет. "Мысалы, әрбір азаматта отандық киноларды көруге абонементі болады. Тіпті айына 10-15 фильм болсын. Әрине, бағасы қымбат болмаса, халық келеді ғой. Бұл тұрғындарды отандық фильмдерді көруге тартудың бір жолы болып табылады", - деп қорытындылады сөзін режиссер. Бірақ бұл ұсынысқа режиссер әрі продюсер Нұртас Адамбаев қарсылығын білдірді.  Бұл туралы Нұртас Адамбаев Қазақстандағы кинематографияны 2050 жылға дейін дамыту концепсиясы жобаларын талқылауға арналған дөңгелек үстел барысында мәлімдеді. Бекмәмбетов қазақстандық киноларға америкалық кинолармен бәсекелесу қиын екенін айтқан болатын. Оның айтуынша, егер де билет бағасы арзандайтын босла, халық та киноға жиірек барады. Ал Адамбаевтың айтуынша, қазақстандықтар сапалы әрі жақсы фильм үшін ақша төлеуге дайын. "Қазақстандықтар отандық киноларды сүйіп көреді. Біз батыс елдерінің және ресейлік фильмдерді көріп болдық. Қазақстандық фильмдерге билеттердің бағасын арзандатудың орнына басқа да әрекеттерді неге жасамасқа? Бюджеттегі қаражатты отандық фильмдерді түсіруге жұмсау керек шығар. Жеке студияларға көмек көрсету керек шығар?", - деді Адамбаев. "Тимур отандық фильмдердің билеттерінің бағасы қанша тұру керек екенін айту үшін өзі қанша қазақстандық фильм түсірді екен? Неге ол мұндай ұсынысты ресейліктерге айтпайды. Қазақстандық киноларға билеттердің бағасын арзандатып, біз өзіміздің намысымызға тиеміз. Осылайша біз барша жұртқа өзіміздің отандық өнімнің арзан екенін көрсетеміз. Бекмәмбетов кино режиссері ретінде көрерменге қызық болатындай фильм түсіруге қаражат жұмсаудың қаншалықты маңызды екенін түсінуі керек. Адамдар 100-200 теңгесін үнемдеп, сапасы онша емес киноға барады деп ойламаймын. Жақсы фильм болып жатса, халық барады. Жаман болса, бармайды. Абонементтер туралы айтатын болсам, ол бір қиын кезеңдерді елестетеді", - деді Адамбаев.